Израел ги продолжи нападите во Газа, има мртви

Израелската армија денеска, по истекот на рокот за почеток на примирјето во Газа, гаѓа цели во северниот и јужниот дел на палестинската енклава, потврдија нејзините жители за Ројтерс.

Израелската армија денеска, по истекот на рокот за почеток на примирјето во Газа, гаѓа цели во северниот и јужниот дел на палестинската енклава, потврдија нејзините жители за Ројтерс, а израелските сили потврдија дека нападнале „терористички цели „ во северните и централните делови на Газа со тенкови.

Новинар на АФП во Сдерот, израелски град на северниот раб на палестинската територија, видел неколку експлозии и облаци од црн чад што се издигале во областа Беит Ханун по осум часот наутро.

Тројца Палестинци утрово се убиени во израелски напад врз источниот дел на Газа во, според медицински извори.

Израелската армија утринава соопшти дека прекинот на огнот не стапил во сила во 7:30 часот бидејќи Хамас не доставил список на израелски заложници кои требало да бидат ослободени според договорот за прекин на огнот.

Портпаролот на израелската армија Даниел Хагари изјави дека нападите на израелската армија ќе продолжат се додека палестинската исламистичка организација не ги исполни своите обврски.

Тој додаде дека армијата е подготвена да го спроведе договорот за прекин на огнот, но е подготвена и да одговори доколку Хамас ги прекрши неговите одредби.

Израелскиот премиер Бенјамин Нетанјаху, во последниот час пред првично договорениот прекин на огнот да стапи на сила во 7:30 часот, рече дека прекинот на огнот со Хамас нема да започне додека палестинското исламистичко движење не ја предаде листата на заложници, а Хамас цитираше технички проблеми на теренот.

Нетанјаху „синоќа изврши безбедносна проценка во врска со одложувањето на добивањето на списокот со заложници што треба да бидат ослободени“, се вели во соопштението од кабинетот на премиерот.

„Тој ја информираше израелската војска дека прекинот на огнот што требаше да стапи на сила во 7:30 нема да започне додека Израел не добие список на заложници што треба да бидат ослободени, што Хамас се обврза да го обезбеди“, се додава во текстот.

Прекинот на огнот за кој Катар преговараше со помош на САД и Египет треба да стапи на сила во 7:30 часот.

Хамас во соопштението рече дека има намера да го испочитува договорот, но призна дека доцнело со обезбедувањето на имињата на заложниците кои треба да бидат ослободени, „поради технички причини на теренот“.

СЗО: Масовната вакцинација на децата во Газа против детска парализа ќе продолжи во сабота

Светската здравствена организација (СЗО) денеска објави дека во сабота ќе продолжи масовна кампања за вакцинација против детска парализа во Појасот Газа, со цел да се вакцинираат повеќе од половина милион деца.

„Сегашната средина во Газа, вклучително и пренатрупаноста во засолништата и сериозно оштетената водоводна и санитарна инфраструктура и инфраструктурата за одржување хигиена, што го олеснува фекално-оралниот пренос, создава идеални услови за понатамошно ширење на полиовирусот“, се вели во соопштението на СЗО.

Се додава дека големите движења на населението поради сегашниот прекин на огнот најверојатно ќе го влошат ширењето на инфекцијата со полиовирусот.

Детската парализа е многу заразна вирусна болест која примарно ги погодува децата на возраст под пет години и може да предизвика неповратна парализа на екстремитетите.

Вирусот, категоризиран како тип еден, тип два и тип три, се шири преку контаминирана вода или храна и го напаѓа нервниот систем. /МИА

Ел Сиси: Да се усвои план за обнова на Газа без раселување на Палестинците

Ел Сиси ја повика денеска меѓународната заедница во Мадрид да усвои план за обнова на Газа разурната од војна без раселување на Палестинците

Египетскиот претседател Абдел Фатах ел Сиси ја повика денеска меѓународната заедница во Мадрид да усвои план за обнова на Газа разурната од војна без раселување на Палестинците, откако американскиот претседател Доналд Трамп ги налути Арапите со неговата визија за енклавата.

„Истакнавме колку е значајно меѓународната заедница да усвои план за обнова на Појасот Газа без раселување на Палестинците - повторувам, без раселување на Палестинците од нивната земја“, рече Ел Сиси на заедничката прес-конференција со шпанскиот премиер Педро Санчез во Мадрид.

Тој додаде дека Агенцијата на ОН за помош на палестинските бегалци (УНРВА) им е неопходна на Палестинците./МИА

Уставниот суд поведе постапка за оценување на стажот на членовите на Советот на ЈО

 Уставниот суд на Република Македонија донесе одлука да поведе постапка за оценување на стажот на членовите на Советот на јавни обвинители кои се избрани од редот на јавните обвинители. 

Оваа одлука е резултат на иницијативата поднесена од обвинителката Ленче Ристоска, која го оспори Член 4 став 7 од Деловникот за работа на Советот. Според оспорената одредба, мандатот на овие членови се смета за позитивно оценет јавно-обвинителски стаж, освен во случаи предвидени во член 35-а од Законот за Советот на јавните обвинители.

Во иницијативата е наведено дека оспорената одредба е во спротивност со Амандманот XXX од Уставот, членот 7 од Законот за Совет на јавни обвинители и членовите 36 и 62 од Законот за јавното обвинителство. Подносителката наведува дека за времетрањето на мандатот, членовите на Советот на јавни обвинители избрани од редот на јавните обвинители не вршат јавно-обвинителска функција и не може да бидат оценувани, односно тие во конкретниот период не може да реализираат „позитивно оценет јавно-обвинителски стаж”. Се тврди дека станува збор за прашање кое не може да се уредува со Деловник, бидејќи изворно не е уредено со законски пропис, па се остава впечаток дека членовите сами си доделиле право и поволност кои Законодавецот не им го гарантирал. Од ова придобивка имаат самите членови кои по завршување на мандатот во Советот на јавни обвинители се унапредени во повисоки позиции во јавните обвинителства, се наведува во иницијативата.

Во врска со иницијативата за Изборниот законик со која се оспорени членовите 17 и 18 од Законот за изменување и дополнување на Изборниот законик, која што, исто така, беше на денешната седница, како што соопштуваат од Уставен, немало мнозинство бидејќи гласањето било изедначено поради отсуство на судијката Ана Павловска Данева. Ќе се гласа повторно на следната седница.

Подносителите на иницијативата Лилјана Поповска, Ѓорѓи Танушев, Костадин Ристоманов, Стојанчо Велков, Невена Георгиевска, Татјана Стојановска, Дејан Димитровски, Драгана Велковска, Горјан Јовановски, Јана Белчева-Андреевска, Јане Димески преку полномошник адвокатска канцеларија Петрушева, сметаат дека со оспорените членови се прави измена на членовите 61 и 62 од Изборниот законик, кои се однесуваат на условите за поднесување листи на независни кандидати за пратеници, како и за членови на совети и градоначалници. Се тврди дека е драстично подигнат прагот за поднесување на независни граѓански листи на изобри на 1 отсто од гласачкото тело, што според нив предизвикува нееднаква положба на граѓаните при здружување во иницијативни групи за поднесување на независни листи за учество на изборите. Се наведува дека овие измени создале нееднаквост на граѓаните и дискриминација во корист на партиите, имајќи предвид дека секоја партија која исто така претставува група граѓани, може да поднесе листи со кандидати, а е регистрирана со 1000 гласачи. Дополнително, според подносителите спорно е што измените се донесени во нетранспарентна и скратена постапка, без претходни консултации и јавна расправа.

притисни ентер