Кардиналот Матео Зупи, претседател на италијанската бискупска конференција, пред една недела, во пресрет на празникот Успение, предводеше трогателно молитвено бдение каде што беа прочитани имињата на сите деца убиени во конфликтот меѓу Израел и Хамас од почетокот на војната пред две години, објави ABCMedia.

Седум часа молитва за 12.227 деца жртви

За време на долгото бдение, кардиналот Зупи и десетици членови на неговата епархија наизменично ги читаа имињата и возрастите на 16 израелски деца убиени во напад на Хамас на 7 октомври 2023 година и 12.211 имиња на палестински деца убиени во израелската окупација на Газа до 25 јули 2025 година. Списокот со имиња, долг 469 страници, бил составен врз основа на податоци од израелската влада за израелските жртви и податоци од Министерството за здравство на Газа за палестинските жртви.

„Ги кажуваме нивните имиња едно по едно“, рече Зупи на почетокот на бдението. „Тие бараат од сите нас да се посветиме на наоѓање или следење на патот на мирот со поголема интелигенција и страст, почнувајќи со прекин на огнот и нудење услови за него, од ослободување на заложниците до тоа да не се држи цела нација како заложник.“

Читањето на имињата на убиените деца траеше речиси седум часа. Бдеењето започна попладне и траеше до вечерта.

Место на сеќавање на страдањето

Молитвеното бдение се одржа во паркот Монте Соле ди Марцабото, недалеку од Болоња, на место со силна симболика. Настанот се одржа во урнатините на црквата Казаља, која беше запалена од нацистите за време на масакрот во кој беа убиени речиси 800 луѓе, вклучувајќи деца, помеѓу 29 септември и 5 октомври 1944 година.

„Ова е за да се сетиме, да обрнеме внимание, од ова место кое е место на страдање и кое отсекогаш било место за сеќавање на сите жртви“, нагласи Зупи. Иницијативата ја организираше монашката заедница на Малото семејство на Благовештението, која се грижи за зачувување на сеќавањето на нацистичкиот напад, во соработка со Училиштето за мир на Монте Соле.

Апел за мир

Во последните недели, соочени со зголемен број на жртви и глад што ѝ се заканува на енклавата, католичките водачи ги засилија своите повици против војната во Газа. Меѓународната унија на врховни верски претпоставени организираше ден на пост и молитва на 4 август, повикувајќи на „правда и помирување“.

Свештеникот на единствената католичка парохија во Газа, преподобниот Габриел Романели, во видео порака од 14 август ја опиша тешката ситуација: „Ситуацијата е сè уште многу сериозна: насекаде има бомбардирања, а исто така и смрт и уништување. Опасноста за целото население предизвикува голем страв кај цивилите“. Неговата црква на Светото семејство во Газа беше бомбардирана на 13 јули, при што загинаа две жени кои побараа засолниште таму.

Ерусалимскиот патријарх, кардиналот Пјербатиста Пицабала, за време на мисата на 15 август рече: „Крвта на невините во Газа и во светот не е заборавена“. И папата Лав XIV повика на прекин на огнот и насилство. „По сето ова време, која е целта на војната? Секогаш мора да бараме дијалог, дипломатски напори, а не насилство, а не оружје“, изјави тој пред новинарите на 13 август.

Кардиналот Зупи, кој беше назначен од папата Франциск за мировен пратеник за Украина, е познат по неговото посредување во размената на заложници меѓу Русија и Украина. За време на конклавата на која беше избран папата Лав XIV, Зупи се сметаше за еден од веројатните кандидати за папството.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.