Со голема тага ја примивме веста за смртта на Мартин Треневски – поранешен министер, амбасадор, истакнат новинар и публицист. Тимот на Канал 5 изразува искрено сочувство до неговото семејство, блиските, пријателите и сите кои го познаваа и почитуваа неговото дело. Неговиот придонес во новинарството, јавниот живот и дипломатијата ќе остане запаметен.

Мартин Треневски, истакнат македонски новинар, публицист, поранешен министер и дипломат, во текот на својата богата професионална кариера остави значаен белег во новинарството, државните институции, дипломатијата и врските со македонското иселеништво.

Треневски го започна својот професионален пат како новинар, потоа извршува високи државни функции, а кариерата ја продолжива во дипломатската служба на Република Македонија.

Роден е во 1949 година во Скопје. Потекнуваше од македонско христијанско семејство со силни патриотски традиции. Неговиот татко, Злате Треневски, бил првоборец од 1941 година, учесник во Народноослободителното движење, делегат на Второто заседание на АВНОЈ и на Првото заседание на АСНОМ.

Мартин Треневски дипломирал на Филолошкиот факултет при Универзитетот „Св. Кирил и Методиј“ во Скопје, на групата англиски јазик и литература. Подоцна посетувал постдипломски студии по масовни комуникации и информирање на Институтот за социолошки и правно-политички истражувања, каде се стекнал со академскиот степен магистер по политички науки.

Новинарската кариера ја започнал во Скопје, со текстови во повеќе дневни, неделни и месечни информативни гласила. Професионалниот врв во новинарството го достигнал во тогашната агенција ТАНЈУГ, каде во 1986 година бил именуван за дописник од Австралија и Јужниот Пацифик. Во тој период активно ја следел и афирмирал македонската заедница во Австралија.

Со осамостојувањето на Република Македонија, Треневски беше именуван за министер за информации во првата влада на Република Македонија. Подоцна, како министер во Министерството за иселеништво, работеше на унапредување на врските меѓу државата и македонското иселеништво ширум светот.

Во неговиот јавен ангажман посебно место имаа македонските иселеници. Треневски учествуваше на бројни средби, манифестации и разговори со македонските заедници во Австралија, САД, Канада, Европа, Турција и Израел, залагајќи се за зачувување на македонскиот јазик, култура, традиција и идентитет.

Во дипломатската служба, Мартин Треневски беше амбасадор на Република Македонија во Шведска, Норвешка, Финска, Естонија, генерален конзул во Торонто, Канада, како и македонски амбасадор во НАТО. На овие функции ја претставуваше Македонија во важни меѓународни центри и даде значаен придонес во афирмацијата на македонските државни интереси.

Треневски беше активен и во политичкиот живот како член и активист на ВМРО-ДПМНЕ од самите почетоци на партијата. Во јавноста беше препознаен како човек посветен на македонското прашање, на државноста и на поврзувањето на Македонците во татковината и во дијаспората.

За својата работа како новинар, публицист и дипломат, добитник е на повеќе награди и признанија, меѓу кои и највисоката новинарска награда во Македонија – „Мито Хаџивасилев-Јасмин“, која ја доби во 1983 година. Исто така беше член на Order of Saint George – Habsburg-Lorraine и беше одликуван како Империјален Витез на Честа (Imperial Knight of Honor) на Редот на Свети Ѓорѓи од страна на Куќата Хабсбург-Лотарингија (House of Habsburg-Lorraine)

Покрај своите професионални достигнувања, Мартин Треневски беше посветен сопруг, татко и дедо. Зад себе ја остави сопругата, проф. д-р Василка Попоска Треневска, ќерките Бела, Галена и Марија, како и внуките Мила, Викторија, Софи и Оливија.

Со смртта на Мартин Треневски, Македонија загуби значајна личност од јавниот живот – новинар, публицист, државник и дипломат кој со својата работа остави трајни траги во македонската историја, новинарство, дипломатија и иселеничка поврзаност.

Погребот ќе се одржи на 27 мај 2026 година (среда), во 13:00 часот во Капела Бутел,Скопје.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.