Автомобилизам

Гужва на пазарот на електрични возила, уште еден бренд ги намали цените

„Lucid Group“ ги намали цените на својата серија на луксузни лимузини „Air“ на ограничено време пред празничната сезона, поради силната конкуренција и забавувањето на побарувачката за електрични возила.

Високите каматни стапки го погодија пазарот, а производителите, предводени од „Tesla“, одговорија со намалување на цените.

Шефот на „Tesla“, Илон Маск, оваа година неколкупати реагираше со намалување на цените за да го задржи пазарниот удел, а на ист начин „Lucid“ се обидува да се пробие, па неговите модели сега се поевтини до крајот на месецот.

Имено, моделот „Air Touring“ сега чини 87.500 долари во однос на претходните 95.000 долари, а „Grand Touring“ е 115.600 долари, додека беше околу 125.500 долари.

„Air Pure“ со погон на четири тркала чини 74.900 долари (бил 82.400 долари), додека со погон на задните тркала останува 77.400 долари. Како одговор, „Tesla“ ги намали и цените на својот премиум седан „Model S“, најблискиот конкурент на „Lucid Air“, на 74.990 долари, пренесува „Reuters“.

„Lucid“ се соочува со прилично големи загуби во производството, но поддршката на Фондот за јавни инвестиции на Саудиска Арабија и дава доволно силен грб на компанијата, особено во споредба со нејзините конкуренти.

Извор: Б92

Свет

Најмалку 10 загинати или повредени во напад во болница во Кина

Неколку лица се убиени или повредени во напад во болница во југозападна Кина, јави ДПА, повикувајќи се на кинеската агенција Ксинхуа.

ДПА пренесе дека во нападот имало најмалку 10 жртви, но првично не било јасно колку се повредени, а колку загинале.

Во првичните извештаи од настанот немало информации за осомничениот сторител.

Според Ксинхуа, нападот се случил во раните попладневни часови во болница лоцирана во провинцијата Џенксионг во јужната кинеска провинција Сечуан.

На кинеската социјална мрежа Веибо, слична на X, корисниците споделуваа видеа на кои се гледа апсењето на осомничениот сторител.

Македонија

Најстудено утрово во Лазарополе

Најниска температура утрово е измерена во Лазарополе од 3 степени Целзиусови.

Следат Берово и Попова Шапка со 5 степени, 6 во Претор, 7 во Крива Паланка и Охрид, 8 Тетово, Маврови Анови, Битола, Демир Капија, 9 Скопје-Петровец, Прилеп, Гевгелија, Велес, 10 во Скопје-Зајчев Рид, Штип, Куманово, Крушево, Дојран, Кавадарци и 11 степени во Виница.

Времето денеска сончево и топло со мала до умерена облачност. Попладне и во текот на ноќта ќе има локална појава на пороен дожд и грмежи. Ќе дува слаб до умерен ветер претежно од југозападен правец. Максималната температура ќе биде во интервал од 20 до 27 степени.

Во Скопје сончево со мала до умерена облачност и со слаб ветер од јужен правец. Кон крајот на денот и во текот на ноќта во делови од котлината ќе има краткотраен пороен дожд и грмежи. Максималната температура ќе достигне до 27 степени.

НБА

Вембањама прогласен за дебитант на годината во НБА

Центарот на Сан Антонио, Виктор Вембањама е прогласен за најдобар дебитант на годината во НБА, објавено е на официјалната веб-страница на лигата.

Дваесетгодишниот Французин во гласањето освои 495 поени. Второто место му припадна на кошаркарот на Оклахома, Чет Холмгрен со 295 поени, додека трет е членот на Шарлот, Брендон Милер со 86 поени.

Вембањама беше избран од Сан Антонио како прв пик на драфтот на НБА во 2023 година.

Во сезоната 2023/24, кошаркарот учествуваше на 71 натпревар од регуларниот дел од сезоната, со просек од 21,4 поени, 10,6 скока и 3,9 асистенции по натпревар.

Сан Антонио заврши на 14. место во Западната конференција и не успеа да се квалификува за плејофот.