Регион

Грција се подготвува за удар на реткиот ураган: Одете кај роднини или пријатели

Грција се подготвува за ударот на големиот циклон, односно невремето Јанус, кое утре ќе ја погоди земјата.

Експертите апелираат на претпазливост, а генералниот секретар за цивилна заштита денес издаде посебни упатства до граѓаните.

Грците се повикуваат да бидат внимателни и сите што живеат на приземје да бараат сместување кај роднините или пријателите за да се заштитат од овој медитерански циклон. Заменик министерот за цивилна заштита, Никос Хардалиас, во обраќањето до нацијата рече дека се очекува многу лошо време. Тој предупреди на поплави и дека може да паднат дрвја и да се подигне нивото на морето, особено во областите Закинтос, Келафониа, Итака, Месинија, Евија ...

Медикан или медитеранскиот тропски ураган е многу редок метеоролошки феномен во Средоземното море, а најмногу се јавува само во најтоплиот дел на Медитеранот.

За развој на урагани на Медитеранот, условите се многу неповолни: температурата на морето не е доволно висока, честопати нема доволно влага, а Медитеранот е едноставно премал за нивно развивање. Од 1948 до 2011 година се забележани вкупно само 99 циклони кои потсетуваат на ураган.

„Ефектите од Јанус, мора да бидеме јасни, ќе бидат слични на оние од посилно невреме. Обилните врнежи од дожд ќе донесат поплави во урбаните делови на Грција, а може да има и привремени потешкотии во снабдувањето со електрична енергија, вода и телекомуникациите. За сите што живеат на овие места потребно е да ги следите трите главни упатства: Оние што живеат во области кои претходно претрпеле поплави или во близина на реки и брегови,да избегнуваат престој на риземје, подруми и сутерени “, рече заменик-министерот за цивилна заштита.

"Размислете да одите кај роднини или пријатели неколку дена поради лошите временски услови. Избегнувајте какво било непотребно движење за време на овие тешки услови и заштитете ги прозорците и вратите, секогаш имајќи ја предвид можноста да се качите на горниот кат. Не преминувајте преку поројни води и поплавени патишта без причина. Следете ги медиумите за понатамошни насоки “, додаде Хардалиас.

Бурата Јанус се очекува утре, во четврток, но циклонот ќе се движи до сабота.

Последниот медикан беше оној наречен Зорбас, кој ја погоди областа во Грција кон крајот на септември 2018 година, а неговата траекторија беше скоро идентична со онаа што се предвидува за претстојниот систем.

Поради тоа невреме, сообраќајот со траекти беше запрен, како и авиосообраќајот, а училиштата беа затворени неколку дена.

Култура

Хуманитарен концерт во сеќавање на Климентина Рафајловска

Во Салон 19:19 во Скопје вечерва ќе се одржи концерт во сеќавање на Климентина Рафајловска (1977-1994), која била ученик на пијано и харфа во училиштето „Илија Николовски-Луј”.

На програмата ќе бидат изведени дела од композиторите Сен Санс, Равел, Буланже, Штолцел, Пијацола, Хенсон, Капле, Форе и Шостакович.

На концертот ќе учествуваат музичари од нејзината генерација, Ема Абаџиева – обоа, англиски рог, Весна Ангелова Христов – пијано, Орце Ицковски – фагот, Гордана Јаневска – виолина, Тереза Крцоска – виолина, Јанинка Невчева – пијано, Јулија Нелковска – виолина, Надежда Рубен – сопран, Боро Станковски – виола, Елена Стојческа – флејта, Дарко Трајковски – виолина, Мерсиха Шукри – харфа.

Соученичката на Рафајловска, Мерсиха Шукри, која е единствената харфистка во земјава во изјава за МИА вели дека целта, меѓудругото, е и да се подигне свеста и поддршката за болните од рак.

- Климентина Рафајловска ни беше соученичка во музичкото училиште. За жал, за кратко време нѐ напушти, се разболе од леукемија. Оваа година се навршуваат 30 години од нејзината смрт. Во таа чест, генерацијата се собравме да одржиме концерт во нејзина чест. Воедно, да ја подигнеме свеста и поддршката за сите заболени од лошата болест, вели Шукри, додавајќи дека животот е непредвидлив и затоа е потребно многу повеќе љубов и разбирање.

Човекот е покршлив од стаклото и многу малку е свесен дека секому може да му се случи, вели Мерсиха Шукри.

Во чест на Рафајловска, од 1995 до 2008 година беше доделувана наградата „Климентина Рафајловска” за првенец на генерација, од страна на истоимената Фондација. Меѓу добитниците на оваа награда се и Симон Трпчески, Ирина Наумовска, Никола Атанасов, Александар Краповски и други.

Средствата собрани со продажба на билетите и од донаторската кутија, ќе бидат донирани на Здружението посветено на пациенти болни со рак и нивни негуватели ХЕМА-ОНКО, а наменети за потребите на пациентите на Универзитетска клиника за хематологија.

Регион

Единаесет лица се повредени во сообраќајка на бугарски автобус во Турција

Единаесет лица се повредени кога автобус со бугарски регистарски таблици што сообраќал од Истанбул за Бугарија се превртел во областа Киркларели во Турција, јави агенција та Анадолија.

Сообраќајната несреќа се случила на 50 километри од бугарската граница. Автобусот е на компанијата „Метро туризам“.

На местото на несреќата се упатени екипи на полиција и медицински лица.

Повредените, вклучувајќи го и возачот на автобусот, се хоспитализирани во околните болници. /МИА

Македонија

Сообраќајот тековно и без застои

Сообраќајот на државните патишта се одвива непречено, по претежно суви коловози.

Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

Патниот правец Охрид – Ресен, преку националниот парк Галичица од 01.04.2024 е пуштен за сообраќај за сите видови возила со вкупна тежина до 3.5 тони.