Македонија

Гимназијата „Никола Карев“ се прости од своите доскорешни ученици, кои загинаа на скопската обиколница

Со огромна тага и неверување ја примивме веста за сообраќајната несреќа во која ги загубивме нашите поранешни ученици, Марко, Петар и Адам, матуранти во генерацијата 2020-2024 година.

Со огромна тага и неверување ја примивме веста за сообраќајната несреќа во која ги загубивме нашите поранешни ученици, Марко, Петар и Адам, матуранти во генерацијата 2020-2024 година, момчиња познати по насмевките, шармот и другарувањата со сите.

Срцето на Карев денес плаче.

Нашите деца, кои до пред некоја година чекореа по ходниците, седеа во училишните клупи и сонуваа за иднината....тешко е да се поверува дека нивните животи згаснаа прерано.

Изразуваме најискрено и длабоко сочувство до семејствата и најблиските. Нека почиваат во мир, се наведува во објавата на гимназијата „Никола Карев“ од Скопје.

Вчеравечер Обвинителството побара мерка притвор за Косовецот, на 76 години кој директно со камионот се заби во автомобилот во кој се возеле Марко Ѓирѓиевски, Петар Миланов, Адам Велков и неговиот татко, оперскиот баритон Ристе Велков.

Јавен обвинител од Основното јавно обвинителство Скопје донесе Наредба за спроведување истражна постапка против косовски државјанин осомничен за – Тешки дела против безбедноста на луѓето и имотот во сообраќајот од член 300 став 2 во врска со член 297 став 1 од Кривичниот законик.

Осомничениот 76-годишник управувал товарно возилo МАН со прикачена полуприколка со косовски регистарски таблички, по северната обиколница на град Скопје во насока од запад кон исток.

Притоа, не се придржувал кон прописите и со тоа го загрозил јавниот сообраќај и го довел во опасност животот на луѓето.

Кога дошол во близина на клучката Мирковци брзината на движење на возилото не ја приспособил спрема својствата и состојбата на патот, густината на сообраќајот и другите сообраќајни услови, така што да може навремено да го запре возилото пред секоја пречка што под дадени услови можел да ја предвиди. Во еден момент изгубил контрола над возилото и свртел во лево, па удрил и ја пробил металната одбојна ограда и продолжил со движење, преминувајќи на коловозот од автопатот наменет за движење на возилата од спротивната насока, каде во него со предната страна удрил автомобил „БМВ“ кој се движел во насока од исток кон запад.

По ударот автомобилот и камионот се запалиле. Во несреќата на лице место починале четворицата патници во патничкиот автомобил.

Бидејќи постојат околности кои укажуваат на опасност од бегство и можност осомничениот да го повтори делото, јавниот обвинител до судијата на претходна постапка достави предлог за определување мерка притвор.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Костадиновска-Стојчевска: СДСМ предлага воведување на државните награди „Блаже Конески“ и „Ремзи Несими“

Пратеничката група на Социјалдемократскиот сојуз и коалицијата го поднесе законот за изменување и дополнување на Законот за државни награди, со којшто предвидуваме воведување на две нови државни награди.

Овој закон предвидува воведување на Државна награда „Блаже Конески“ и Државна награда „Ремзи Несими“.

Советот за македонски јазик, со иницијатива доставена до Владата во 2019 година, предложи да се воспостави нова државна награда за оддавање признание за високи стручни и научни достигнувања од областа на македонскиот јазик во земјата и во странство, за која се предлага да го носи името „Блаже Конески“, кој е основач на современата македонска наука за јазикот, лингвист, литературен и културен историчар, поет, прозаист и преведувач.

Значењето на „Блаже Конески“ е непроценливо и сестрано: тој е прв претседател на Друштвото на писатели на Република Македонија, претседател на Друштвото на писатели на Југославија, член на првата генерација академици и прв претседател на МАНУ во два мандата, колку да напоменеме некои од неговите достигнувања.

Исто така, со иницијатива на Институтот за духовно и културно наследство на Албанците, се предлага да се воспостави нова државна награда за оддавање признание за високи стручни и научни достигнувања од областа на албанскиот јазик и албанологијата во земјава, за која се предлага да го носи името „Ремзи Несими“, кој е лингвист, просветен работник и учесник на Конгресот за правопис на албанскиот јазик во 1972 година.

Ремзи Несими е истакнат лингвист, просветител и универзитетски професор со богата научна и образовна кариера и со врвни заслуги за албанологијата во Северна Македонија, но и за едукација на голем број филозофи во земјава.

Тој е единствен делегат од Македонија кој на Конгресот за правопис на албанскиот јазик, одржан во периодот од 20 до 25 ноември 1972 година, учествувал со научна тема и е потписник на Резолуцијата за албанскиот правопис.

Почитуван од сите албанолози во земјава и во светот, сè до неговата смрт бил референца за секое прашање поврзано со албанскиот стандарден јазик.

Прес-конференција на СДСМ , Бисера Костадиновска-Стојчевска, пратеничка

Скопје, 12.06.2026

СДСМ

Култура

60. издание на МТФ „Војдан Чернодрински“. Две награди за МНТ со Страв и надеж“

МНТ ја доби главната награда гран при за уметничко остварување во целина за претставата „Страв и надеж“ на јубилејното 60. издание на МТФ „Војдан Чернодрински“

На јубилејното 60-то издание на МТФ „Војдан Чернодрински“ претставата „Страв и надеж“ е добитник на две награди.

Жири-комисијата, во состав:

Снежана Коневски-Руси, актерка, која активно работи како режисер, педагог и уметнички координатор на многубројни театарски, едукативни и културни проекти и претседател на жирито; Дарко Лукиќ – академски истражувач, педагог, консултант и театарски практичар од Хрватска; Аида Буквиќ – театарска и филмска режисерка и редовна професорка на Академијата за драмска уметност во Загреб, ги додели наградите: Главната награда ГРАН ПРИ за уметничко остварување во целина како и за најдобра музика во претставата за композиторката, Ирена Поповиќ-Драговиќ.

Македонскиот народен театар со претставата „Страв и надеж“, по мотивите на Франц Ксавер Крец, а

во адаптација и режија на Татјана Мандиќ Ригонат, на 10 јуни учествуваше во официјалната натпреварувачка програма, во конкуренција со уште осум театарски куќи.

Во претставата игра извонредна актерска екипа: Сашко Коцев, Сашка Димитровска, Александар Микиќ, Дарја Ризова, Наталија Теодосиева, Никола Ристановски, Тони Михајловски, Тања Кочовска, Дамјан Цветановски и Нела Павловска.

Свеченото затворање на фестивалот и доделувањето на наградите ќе биде на 12 јуни со почеток во 19 часот во Центарот за култура „Марко Цепенков“. Во чест на наградените ќе се одигра претставата „Црно злато“ по текст на нашиот култен драматург, Дејан Дуковски, а во продукција на Београдско драмско позориште.

Фотографиите се превземени од архивата на МТФ Војдан Чернодрински и од архивата на НУ МНТ.

Македонија

Перински од Кисела Вода: Сите општини и граѓаните кои живеат во нив се подеднакво важни

„Нашата определба е да бидеме постојан партнер на општините и да обезбедиме конкретна поддршка таму каде што е најпотребна.

Во рамки на караванот „Каде што срцето е дома“, министерот за локална самоуправа Златко Перински, оствари работна посета на Општина Кисела Вода, каде одржа средба со градоначалничката Бети Стаменкоска-Трајкоска, членовите на Советот на општината и општинската администрација.

На средбата се разговараше за тековните активности на општината, развојните приоритети, реализацијата на капиталните инвестиции и потребите за понатамошно јакнење на административните капацитети во насока на поефикасно извршување на надлежностите и обезбедување поквалитетни услуги за граѓаните.

Посебно внимание беше посветено на можностите што ги нуди Ресурсниот центар за поддршка на општините, преку кој Министерството за локална самоуправа обезбедува стручна, техничка и советодавна поддршка за општините во различни области од нивното работење.

Министерот Перински истакна дека директната комуникација со локалната самоуправа е неопходна за навремено препознавање на предизвиците со кои се соочуваат општините и за креирање соодветни решенија.

„Нашата определба е да бидеме постојан партнер на општините и да обезбедиме конкретна поддршка таму каде што е најпотребна. Преку Ресурсниот центар создаваме систем преку кој на нивно барање, ќе им помогнеме на општините полесно да ги надминуваат административните и техничките предизвици и поефикасно да ги реализираат своите развојни цели“, изјави министерот Перински.

Тој посочи дека Владата продолжува со силна поддршка на локалниот развој преку капитални инвестиции во општините.

„Во рамки на двата владини јавни повици, за Општина Кисела Вода се одобрени вкупно 24 проекти во вредност од 528.529.882 денари. Овие средства претставуваат значајна поддршка за реализација на проекти кои директно ќе придонесат за подобрување на условите за живот на граѓаните и за понатамошен развој на општината“, нагласи Перински.

Градоначалничката Бети Стаменкоска – Трајкоска потенцираше дека директната соработка помеѓу централната и локалната власт е клучна за ефикасен развој на општините, па оттука и денешната работна посета на министерот за локална самоуправа, Златко Перински е исклучително важна.

„Ова е можност за суштински дијалог за предизвиците и стратешките цели пред кои се наоѓа Кисела Вода. Во рамките на денешните состаноци, како со мене така и со претседателката на Советот, советниците и раководителите на општинските сектори, разговаравме за конкретни модели за поддршка од страна на Министерството. Од особена важност е што министерството за локална самоуправа стави на располагање Ресурсен центар за поддршка на развојот на општините. Ова за нас претставува вреден дополнителен инструмент кој нуди стручна помош и дигитални алатки, што ќе ни овозможат уште подинамично и поуспешно да пристапиме кон изработка и реализација на нашите идни проекти“

Министерството продолжува и во наредниот период, со посети и непосредни средби во општините, со цел зајакнување на соработката и унапредување на локалниот развој.