Свет

Германскиот претседател при денешната посетата на Турција, си понесе мајстор за донер

Германскиот претседател Франк-Валтер Штајнмаер од денеска ја започна деликатната посета на Турција, носејќи со себе берлински ќебаб мајстор, во обид да ги докаже блиските врски меѓу двете нации и покрај несогласувањата со неговиот турски колега.

Штајнмаер, кој е во посета на Турција за прв пат откако стана претседател, има комплицирани односи со турскиот лидер Реџеп Таип Ердоган.

Шефот на германската држава ја критикува политиката на Ердоган кон Израел и јавно изразува загриженост за падот на демократските норми во Турција. Тоа што патувањето не започнува во главниот град Анкара значи нешто, изјави извор од германското претседателство кој сакал да остане анонимен.

Наместо тоа, првата станица на Штајнмаер ќе биде Истанбул, каде што ќе се сретне со активисти на граѓанското општество и со градоначалникот, лидерот на опозицијата Екрем Имамоглу. Разговорите со Ердоган во Анкара ќе почекаат до среда.

Наместо да му се додворува на претседателот, Штајнмаер се надева дека ќе ги нагласи врските меѓу луѓето.

Германскиот претседател особено сака да го истакне придонесот на генерациите турски мигранти кои дојдоа да работат во Германија од шеесеттите години.

Меѓу оние кои се населиле во Германија бил и дедото на Ариф Келеш, сопственик на ќебапчилница во Берлин, кого Штајнмаер го поканил на патувањето. Главниот скараџија ќе им служи донер ќебап на гостите на вечерата во Истанбул.

Јадење од тенко исечено месо на скара на вертикална шипка е донесено во Германија од турски мигранти.

Наполнето со сецкан зеленчук и прелиено со мајонез, донер ќебапот има легендарен статус. „Тоа стана еден вид германско национално јадење“, рече еден од советниците на Штајнмаер. Продажбата на донери во Германија се проценува на седум милијарди евра, што е успешната приказна на имигрантите што сака да ја нагласи германското претседателство.

Патувањето на Штајнмаер има за цел да ги истакне „личните приказни и достигнувања на четири генерации турски имигранти“ како дел од германската историја, соопшти претседателскиот кабинет. Околу три милиони луѓе со турско потекло живеат во Германија, но тие често се предмет на жестока дебата за поделени лојалности.

Поддршката за Ердоган во турската дијаспора ги иритира германските власти, кои често имаат заладени односи со Анкара. Поддршката на Ердоган за Хамас во последно време е особено вознемирувачка за официјален Берлин.

И покрај тоа што е претседател седум години, ова е прва посета на Штајнмаер на Турција како шеф на државата. Мајсторот за ќебапи Келеш е третата генерација што го води семејниот бизнис во југозападен Берлин. Неговиот дедо се преселил во Германија и со години работел во фабрика пред да отвори свој ресторан во 1986 година.

„Сега претседателот ме носи во домот на моите предци“, изјави Келеш.

„Тоа е голема чест за мене.“

Живот

Ја нарекуваа „Чудо од Чандигар“ – на 101 година истрчала спринт за една минута (ВИДЕО)

Ќе очекувате стогодишник да ги поминува деновите тивко, но Ман Каур имала поинакви планови.

Подобро ѝ било да фрла копје или ѓуле, да тренира и да победува, отколку да седи пред телевизор.

Дали некогаш сте слушнале за „Чудото од Чандигар“? Ако не, прочитајте ги следните редови.

Ман Каур е родена на 1 март 1916 година. Таа водеше тивок, обичен живот, а потоа се се промени кога го прослави својот 93-ти роденден.

На убедување на нејзиниот син Гурдев Синг, кој учествувал на меѓународни трки, таа започнала да тренира. Таа претходно посетила лекар и добила дозвола да биде физички активна во подоцнежните години.

Редовно вежбала, менувајќи го режимот на работа од ден на ден, под будното око на Гурдев.

„Некои денови трча, а на други вежба копје и фрлање ѓуле. Одиме и во теретана, каде што тренира со тегови“, открил нејзиниот син.

Во времето кога Ман почнала да тренира, Гурдев имал 79 години, а заедно учествувале на десетици атлетски средби ширум светот.

Таа го освоила еден од првите медали во родниот град, а славата ја стекнала по Светското Мастерс првенство во Нов Зеланд во 2017 година, каде победи на трката на 100 метри.

Таа го истрча делот за нешто повеќе од една минута, што е неверојатно достигнување. Дали спомнавме дека во тоа време имала 101 година!

Така стана најстарата и најбрзата (стогодишна) спортистка, а беше номинирана и за престижната награда „Лауреус“, во категоријата Најдобар спортски момент на годината.

Во својата кариера освоила 31 златен медал на меѓународни натпревари (за ветерани). Треба да се спомене и Светскиот шампионат на Мастерс во Полска, во 2019 година, каде таа ги освои најдобрите почести во четири дисциплини - фрлање ѓуле, фрлање копје, трки на 60 и 200 метри.

„Вежбањето и учеството на натпревари ме прават среќна“, изјавила таа во едно од интервјуата.

Новинарите се интересираа како ја одржува физичката кондиција и како поднесува напор во подоцнежните години.

„Редовно вежбајте и хранете се здраво. Избегнувајте брза храна. Бидете вистински пријател и дружете се со добри луѓе“, одговорила таа.

Ман Каур била вегетаријанец, пиела кефир и јадела житарки секое утро. Редовно трчала, а особено работела на зајакнување на горниот дел од телото.

Нејзините успеси не останаа незабележани во Индија, па на почетокот на 2020 година ѝ била врачена престижната награда Нари Шакти Пураскар.

Признанието го доделува Владата на Индија на поединци или институции кои се борат за зајакнување на жените.

По некое време таа починала од здравствени компликации. Доживеала 105 години, а зад себе оставила два сина и ќерка.

Нејзината неверојатна приказна служи како инспирација и доказ дека „годините се само бројка“, односно дека ниту една цел не е недостижна ако се вложи доволно труд.

Свет

Уапсени се тинејџери во Германија- на мобилните имале упатства за составување бомби

Четворица тинејџери биле уапсени за католички Велигден во Германија под обвинение дека подготвувале напади со исламистичко потекло, информирајќи се за склопување на експлозивни направи, објавија денеска германските медиуми.

„Обвинетите се подготвувале за напади со експлозивни направи кои првенствено служат за ширење оган и за напади со мачети“, известува јавниот сервис WDR, повикувајќи се на извори во истражните кругови.

При анализата на податоците на мобилните телефони на четворицара малолетници, уапсени во април под сомнение дека подготвувале напад со исламистичка позадина, пронајдени се упатства за составување експлозивни направи.

При претресот во станот на еден од осомничените биле пронајдени нож и мачета. Во исто време, како што се наведува, не се пронајдени информации за можни конкретни цели, туку како места на можни напади се споменуваат само градови како Келн, Дизелдорф, Дортмунд и Штутгарт.

Четири малолетници на возраст од 15 и 16 години, од кои три се момчиња и едно девојче, се уапсени во сојузните покраини Северна Рајна-Вестфалија и Баден Виртемберг откако Канцеларијата за заштита на уставниот поредок ги следела активностите на еден од осомничените на форуми каде што се собрани од исламистите и поддржувачите на т.н исламски држави.

Во последно време исламистите, меѓу другото, поради зголемениот број на пропалестински протести кои често ги организираат забранети организации поврзани со Хамас, повторно станаа во центарот на вниманието на истражните органи.

Минатиот викенд во Хамбург се одржа протест на кој отворено се повика на воведување шеријат во Германија, поради што на удар е министерката за внатрешни работи Ненси Фезер.

Македонија

Двајца загинати во тешка сообраќајна несреќа на патот Радовиш-Штип

Во сообраќајната несреќа што се случи на магистралниот пат Радовиш-Штип загинаа двајца возачи, а сопатничка од едното возило е пренесена во штипската Болница.

Веста за МИА ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.

- На местото на несреќата починале возачите на двете возила, а сопатничка од патничкото возило „опел" е пренесена во Медицински центар Штип, изјави Трајанова.

Увид на местото на несреќата врши јавен обвинител, а сообраќајот се пренасочува по стариот пат.

Од полицијата повеќе детали за несреќата најавуваат за утре.