Местото кое што годишно било посетувано од само неколку стотина туристи, денес е една од главните шпански атракции, а сето тоа е благодарение на големото "реновирање" кое што ова село го доживеало во 2011 година.
Имено, се до пред две години, ова место било обично село во кое што селаните живееле нормален, вообичаен живот без голема посета од туристи, но денес, тие дури и живеат од туризмот, а сето тоа е благодарение на продуцентите од "Sony Pictures" студиото.
Така, во 2011 година продуцентите започнале со потрага на село во Андалузија чии што бели куќи би биле обоени во сина боја, а изборот паднал токму на ова прекрасно место.
Најпрво, жителите биле скептични, но маркетинг виртуозите ги убедиле дека станува збор само за промотивен трик за премиерата на филмот "The Smurfs" и дека сето тоа ќе направи ова село да се издвои од останатите.
И така, во 2011 година, по гласањето на жителите и ветувањето дека по премиерата, на нивните домови повторно ќе им биде вратена првичната боја, дотогаш снежно белите куќи се претвориле во небесно сини домови кои што едноставно воодушевуваат. При фарбањето на куќите биле искористени повеќе од 4.000 литри сина боја и така, селото Јузкар станало село на Штрумфовите.
По преобразбата, се што се случувало во ова село имало поврзаност со Штрумфовите, па така, се приредувале тематски изложби и натпревари, па бил подигнат дури и штрумфовски пазар.
"Треската" отишла дотаму што дури и локалната црква воспримила карактеристики од Штрумфовите, па се приредувале и т.н. сини свадби. Ова, дотогаш обично село, тогаш се претворило во вистинска светска и единствена атракција.
Но, по шест месеци, во селото дошле "виновниците" за таа трансформација и им соопштиле на селаните дека било време да си го одржат ветувањето и да им ги префарбаат домовите со вар, какви што биле претходно... Тогаш се случило и нешто неочекувано!
Имено, селаните одржале повторно гласање и резултатите биле изненадувачки: дури повеќе од 140 жители гласале дека сакаат нивните домови да го задржат штрумфовскиот изглед, а само 30 рекле дека назад ја посакуваат белата боја на куќите.
Така, одлуката била донесена и ден денес, селото Јузкар останува да привлекува огромен број на туристи ширум светот како единствена светска атракција, па според последните информации, од претходните стотина туристи на годишно ниво, денес во Селото на Штрумфовите доаѓаат и повеќе од 80.000 посетители!
Во продолжение уживајте во прошетката низ сината штрумфовска бајка! /Извор: Точка/