Познатата фирма за стратегиски комуникации од Северна Ирска, „Стратагем интернешнл“, потпишала меморандум за сорботка со Владата
за консултантски услуги, за кои што Владата нема да издвои ниту денар од буџетот. Според информациите финансискиот товар, ќе падне врз грбот на амбасадата на Велика Британија, велат познавачите за Канал 5.
Референдумот и онака создава тензии правејќи го општеството поделено, а последниот развој на настаните во регионот со Косово и Србија навестува потреба за спроведување на успешна кампања,велат аналитичарите и од јавен интерес е референдумот да биде успешен.
Странските консултанти веќе го опипале предреферендумскиот амбиент во земјава. Според информациите, во комуникација со Владини претсавници, со интелектуалци и со бизнис-заедницата, се обиделе да дознаат за расположението кај граѓаните, за тоа во кој обем и на кој начин во јавноста биле претставени целите на договорот со Грција.
Првични проценки од теренот биле дека станува збор за сложен процес, споменувајќи го својот успешен ангажман во кампањата пред 20 години за прифаќање на Договорот на Велипеток, кога е решен Северноирскиот судир.
Во портофолиото на интернет-страницата на „Стратагем“, стои дека станува збор за стратегиски консултант за политички работи и комуникации со богато интернационално искуство. Специјализирани се за сложени и несигурни средини.
Партиципирале и во мировните преговори на Блискиот Исток, поточно тесно соработувале со преговарачки тим советувајќи го и обучувајќи го пред разговорите од тактички и стратегиски аспект.