Тенис

Финале за Грабул на фјучрсот во Скопје

Македонскиот тенисер Димитар Грабул успеа да се пласира во финалето на фјучрсот во Скопје што се игра на терените на „Тенис парк“ во склоп на СЦ „Јане Сандански“. Тој денеска по голема борба и меч што траеше 2 часа и 50 минути го победи Кристијан Месарош од Хрватска со 2-1 во сетови.

Првиот сет Грабул го доби со 7:5 во гемови. Најпрвин Месарош имаше брејк за водство од 4:3 во сетот, а Грабул веднаш возврати со ри-брејк, а потоа направи и втор брејк во сетот за 7:5. Во вториот сет Месарош доминираше и веднаш имаше водство од 4:0 и сетот го доби со 6:1.

Во решавачкиот сет Грабул поведе со 2:0, а потоа Месарош изедначи и имаше постојано предност се до 6:6. Тај брекот го реши победникот на мечот. Месарош имаше два мини-брејка за водство 2:1 и 4:3, но потоа Грабул имаше два врзани мини-брејка за водство од 5:4. Нашиот тенисер поведе и со 6:4, а на свој сервис имаше и меч топка која не ја искористи, но сепак имаше и втора и тоа на сервис на ривал успеа да освои поен за 7:5 и пласман во финале.

Негов ривал ќе му биде Александар Милер од Франција, седми носител кој денеска во продолжението на полуфиналето го победи Александар Лазов со 6:4 и 6:4 во сетови. Милер беше финалист и на првиот фјучрс во Скопје одигран претходната недела, но загуби од Данило Петровиќ од Србија.

Почетокот на финалето е закажано 17 часот.

Македонија

Во Штип одржана манифестацијата „Велигденски игри без граници“

Во ЗОО парк „Бриони“ во Штип денеска се одржа манифестацијата „Велигденски игри без граници“ во која учествуваат деца од штипските градинки.

Директорот на ЈП „Исар“-Штип, Кирил Зајков вели дека во соработка со локалната самоуправа и градинките денеска по третпат се организира „Велигденски игри без граници“ и се надева дека ќе прерасне во традиција.

-По повод велигденските празници, ЗОО парк „Бриони“ во соработка со Општина Штип и градинките во општината го организира третиот по ред настан „Велигденски игри без граници”. Настан во кој учествуваат децата, настан од децата за децата, настан во кој имаме разни игри со цел анимација на децата, славење на велигденските празници на симболот на христијанството и јајцата. Овој настан преминува во традиција во кој ние како ЈП „Исар“ учествуваме во организацијата заедно со Општина Штип и се надеваме дека ова прекрасна традиција ќе продолжи и во годините кои следуваат, рече Зајков.

Македонија

Гордана Сиљановска- Давкова на трибината на тема "Жени"

Во рамките на Активностите на претседателскиот кандидат Гордана Сиљановска-Давкова се обрати на трибината на тема „Жени“ која се одржа во Јавна соба.

Таа истакна : Во мојата програма има посебен дел посветен на жените. Подолго светот живеел како патријархат отколку матријархат. Повеќе жени во политика, повеќе гаранции за помалку насилство. Срамота е 30 години да не сме имале жена претседателка, жена премиер. Да им ставиме крај на Венецијанските трговци.

Жените имаат што да покажат, имаме вулканска сила! Работата е мажите да се инспирираат од нас жените. Времето на жените доаѓа. Сега е време за машка еманципација. Македонија е во женски род, политиката е во женски род. Женскоста е квалитет неискористен. Промените наскоро доаѓаат.

Свет

Сијарто: Посетата на кинескиот претседател Си Џинпинг на Унгарија е од историско значење

Посетата на кинескиот претседател Си Џинпинг на Унгарија оваа недела е од историска важност и во голема мерка ќе придонесе за зајакнувањето на Унгарија.

Посетата на кинескиот претседател Си Џинпинг на Унгарија оваа недела е од историска важност и во голема мерка ќе придонесе за зајакнувањето на Унгарија, развојот на билатералните економски и трговски односи и се надеваме, за успех на мировните напори, изјави денеска унгарскиот министер за надворешни работи и трговија Петер Сијарто.

Одговарајќи на прашање на заедничката прес-конференција со неговиот ерменски колега Арарат Мирзојан, Сијарто рече дека Си Џинпинг, кој предводи голема делегација ќе посети само две земји-членки на ЕУ: Унгарија и Франција, пренесе МТИ.

Една од главните теми на разговорите меѓу претседателите на двете земји ќе биде натамошниот развој на билатералната економска соработка, рече Сијарто, наведувајќи дека Кина во Унгарија донела најмногу странски директни инвестиции во 2020 и 2023 година.