Седмиот по ред состанок кој се одржа во Софија од двете страни беше квалификуван како најбесполезен и најнеспокоен до сега. Ден по средбата, предводникот на македонскиот тим Драги Ѓеоргиев, за Канал 5 признава дека таа поминала во тензична атмосфера, а клучен камен на сопнување бил средниот век и поимите кои ги користат бугарските историчари во нивните учебници за територијата на земјава.
Дека разговорите во Софија не се поместиле од мртва точка, вчера потврдија и Ѓеоргиев и неговиот бугарски колега Ангел Димитров, кој порача дека вината за неуспехот не ја гледа во бугарската страна од комисијата. Сепак, двајцата се согласни дека, ваквата ситуација се должи на големите разлики во толкувањето на минатото и начинот на решавање на споровите.
Денешната средба ни беше седма по ред и слободно можам да кажам дека беше најнеуспешната. Најбезплодната е можеби најточниот збор, но во никој случај не беше најспокојна. Вчера и денес имавме многу интензивна, многу исполнета понекогаш со емоции работа. Но, резултатите се на нула. Не го сакавме тоа од бугарска страна, може да бидете сигурни дека е така. Почувствувавме неподготвеност за да се направат оние исчекори, кои нашата работа ги бараше.
Следната средба на мешовитата македонско-бугарска комисија е предвидена да се одржи на средината на октомври во Македонија, каде повторно ќе биде отворено прашањето за Гоце Делчев, за кое вчера многу малку станало збор. Со тоа, пропаднаа и оптимистичките очекувања на премиерот Борисов до крајот на месецов да се затвори темата за револуционерот.