Исвиркувањето на националната химна среде Скопје пред вчерашното финале од македонскиот куп од страна на навивачката група „Балисти“ и одбивањето на фудбалерите на Шкенидија да ги примат медалите за второ место резултираше со шест дицсиплински за тетовскиот клуб од страна на ФФМ.

Од македонската куќа на фудбалот, во острото соопштение наведуваат дека ваквото недолично однесување нема место на терените и го нарушуваат угледот на спортот во земјава. Воедно, упатија и остра критика кон раководството и играчите на Шкендија оти не ја испочитуваа церемонијата при доделувањето на наградите, за што клубот претходно кажа дека не слушнале дека спикерот ги повикал и дека не сакале никого да навредат.

„Недозволиво е раководни структури и поединци, наместо да придонесуваат за смирување на тензиите, да создаваат атмосфера на поделби, провокации и континуирано барање алиби за сопствените неуспеси, неспособност и незнаење. ФФМ оценува дека последното соопштение на ФК Шкендија е целосно неприфатливо, неосновано и во очигледна спротивност со утврдената фактичка состојба, со содржина која претставува навреда за здравиот разум и интелигенцијата на спортската јавност.“ – велат меѓудругото од Федерацијата.

Според експертите, често она што се случува во политиката и на улиците, се прелева и на трибините, а во изминатата недела слична атмосфера ги одбележа протестите за правосуден испит и на албански јазик, .. Според универзитетскиот професор Иван Анастасовски, желбата на политиката за влијание врз спортот секогаш била силна, но клучно е да се искористи законот за недолично однесување а ФФМ да реагира со ригорозни казни.

„Политиката секогаш сакала да има влијание врз спортот, особено на фудбалот, оти масите или толпата или мнозинството на млади луѓе се интересни за политичките елити, оти политичките елити најлесно можат да предизвикаат хаос преку навивачки групи, кои ги злоупотребуваат, ова можно е да рефлексија на сето тоа и притоа да се дава на конфликтите на вербалното понижување една етничка конотација со што се остава впечаток во јавност дека се нарушуваат етничките односи во државата.“

Исвиркувањето на химната и одбивањето на медалите најостро го осудија и од министерството за спорт, кои за ваквите појави најавија законски измени, кои би предвидувале казни во кои на екипите ќе им се запира државната помош, или во најригорозен случај, ке се одземаат решенијата за дејност во спорт, со што ќе се изгуби правото за настап во националните првенства. Порачуваат – правилата мора да ги почитуваат сите.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.