Свет

ЕМА препорачува „бустер“ доза на три месеци по вакцинацијата

Регулаторот за лекови на Европската Унија (ЕМА) објави дека има смисла да се прими трета доза од вакцината против коронавирус три месеци по втората доза поради исклучително загрижувачките показатели за инфекција во Европа.

„Иако сегашната препорака е да се дава бустер по шест месеци, моментално достапните податоци ја поддржуваат безбедната и ефективна употреба на бустерите веќе три месеци по вакцинацијата“, рече на брифингот со новинарите Марко Кавалери, менаџер за стратегија за вакцинација на ЕМА.

Иако се појави новата варијанта омикрон, ширењето на доминантната делта варијанта на вирусот треба да биде главниот фокус на борбата против актуелниот бран.

„Имунолошката ситуација во Европа останува крајно загрижувачка. Делта останува главниот фокус на активностите на јавното здравство во справувањето со пандемијата и нејзините последици“, рече Кавалери.

Главниот извршен директор на ЕМА рече дека производителите на вакцини треба да достават резултати од лабораториските тестови за да се утврдат нивоата на неутрализирачки антитела произведени од нивните вакцини против омикрон, како дел од процесот на утврдување дали ќе биде потребна надградба на вакцината.

Партнерите BioNTech и Pfizer вчера станаа првите производители на вакцини кои објавија такви податоци, велејќи дека три дози од нивната вакцина може да го неутрализираат омикронот.

Кавалери, исто така, рече дека засега нема причина за загриженост по кампањата за вакцинација за деца на возраст од пет до 11 години во САД, каде што повеќе од пет милиони од таа возрасна група примиле најмалку една доза од вакцината.

Светската здравствена организација (СЗО) соопшти дека за повеќето луѓе, вакцините обезбедуваат силно ниво на заштита од сериозни инфекции најмалку на шест месеци.

Агенцијата на ОН нагласи дека распределбата на основните дози на луѓето во посиромашните земји треба да биде приоритет и дека во моментов им препорачува трета доза на луѓето со веќе постоечки здравствени проблеми или оние кои примиле инактивирачка вакцина.

Македонија

Тешка сообраќајка на „Водњанска“, повредени седум лица

Седум лица се повредени во тешката сообраќајна несреќа која синоќа се случи на улица „Водњанска“, пред влезот на Клиничкиот центар.

-Сообраќајната несреќа се случила помеѓу автомобил „БМВ“, автомобил „Ауди“, и две паркирани патнички возила „Голф“ и „Мерцедес“, сите со скопски регистарски ознаки, соопштија од МВР..

Во незгодата со телесни повреди се здобиле седум лица констатирани во ГОБ „Св. Наум Охридски“ и Комплекс клиники Мајка Тереза во Скопје. Извршен бил увид од увидна екипа на СВР Скопје, но причините се уште не се познати.

Регион

Каселакис до Мицотакис: Ако сметате дека договорот од Преспа е предавнички, поништите го

Во Грција и понатаму една од главните политичките теми во пресрет на евроизборите е Преспанскиот договор, што се отвори по неупотребата на „Северна“ од страна на Сиљановска за време на заклетвата.

По многу жестоки реакции од Мицотакис, лидерот на СИРИЗА, Стефанос Каселакис му фрли ракавица од синоќешниот митинг во Солун. Ако навистина договорот од Преспа го смета за предавнички, да го раскине. Во спротивно да се извини на грчкиот народ, како и на Ципрас и Коѕијас.

-Испраќам јасна и едноставна порака до премиерот. Договорот од Преспа е билатерален. Ако продолжувате да сметате дека е предавнички, постои само еден начин. Да го сторите она што го кажуваа вашите претставници, а многумина од нив сè уште го кажуваат: „Ако ВМРО ни даде шанса, ќе го поништиме договорот“. Ова го кажуваа. Истото го посакуваат и т.н. „борци за Македонија“ што ги вадевте на улица и се ваши гласачи: Да го поништите. Па, еве го Скопје, отидете. Да видиме. Но, нема да го сторите тоа. И знаете зошто нема да го сторите тоа? Бидејќи Договорот од Преспа е тоа што го сакавте како партија, но тогаш Груевски во никој случај не прифаќаше да направи толку отстапки, како што направија пред Владата на СИРИЗА, пред Алексис Ципрас и Никос Коѕијас, рече Каселакис.

Регион

Вучиќ утре ќе отпатува во Њујорк за да се спротивстави на резолуцијата за Сребреница

Вучиќ најави дека утре ќе отпатува во Њујорк за да се спротивстави на усвојувањето на резолуцијата за Сребреница.

Претседателот на Србија, Александар Вучиќ рече дека утре ќе отпатува за Њујорк, каде со делегацијата ќе се спротивстави на усвојувањето на резолуцијата за Сребреница, која наредната недела е на дневен ред на Генералното собрание на ОН, а амандманите кои Црна Гора ги поднесе на резолуцијата ги нарече „валкана игра“.

„Утре одиме во Њујорк, четири до пет дена ќе поминеме во Њујорк, ќе имам голем број средби, а во четврток сите заедно ќе се бориме“, истакна денеска Вучиќ во телевизиско интервју.

Тој рече дека со него во делегацијата треба да одат само оние кои се „подготвени за борба на секој можен начин“.

Предлагачите на нацрт-резолуцијата за Сребреница ја утврдија конечната верзија на тој документ, за кој ќе расправа Генералното собрание на Обединетите нации (ОН) на 23 мај, а во преамбулата на текстот стои дека „кривична одговорност според меѓународното право за злосторството геноцид е индивидуализирана“.

Иницијатори на предложениот текст беа Германија и Руанда, а амандманите на нацртот беа поднесени од Владата на Црна Гора.

Осврнувајќи се на амандманите што Црна Гора ги достави на резолуцијата за Сребреница, а кои главно беа прифатени, Вучиќ тоа го нарече „валкана игра“.

„Тоа е валкана игра и перфиден трик. Тие намерно оставаат простор за јасен заклучок за морална и политичка одговорност“, рече Вучиќ и додаде дека по враќањето од Њујорк ќе каже со кого за тоа преговарата Црна Гора. /МИА