Владата доцни со енергетскиот план за претстојната зима, сметаат дел од експертите, откако министерот за економија Крешник Бектеши пред некој ден најави дека од следниот месец ќе се прогласи кризна состојба се со цел ЕСМ со 100те милиони евра од ЕБОР да набавува мазут и јаглен. Професорот по енергетика Константин Димитров за Канал 5 вели дека домашните капацитети се во лоша состојба и се помалку произведуват електрична енергија, па најавите дека допрва ќе се набавуваат енергенси ги смета како несериозни.
„Јас како граѓанин не се чуствувам безбеден, сум загрижен дека и покрај верувањата на Владата нема да е се мазно. / Доколку нема од кај да се купи, ако има блокади на границите епа можни се рестрикции. Ако не сме купиле досега, не сме направиле долгорочни договори ќе купиме, ќе имаме проблеми.“ изјави за Канал 5 Константин Димитров, енергетски експерт.
Дека власта неподготвена ја дочекува претстојната зима смета и опозициската ВМРО-ДПМНЕ. Лидерот на партијата Христијан Мицкоски вели дека е против воведување на нова кризна состојба во енергетиката, бидејќи како што кажа најпрво треба да се провери колку од досега предвидените финансиски средства за кризата се потрошени..Обвинува дека власта сака да воведе енергетска криза се со цел да може да склучува договори во четири очи
„Јас сум против воведување на енергетска кризна состојба и ќе отворам дебата за да видиме каде отидоа парите од граѓаните во изминатиов период под превезот на енергетската криза. Да видиме колку тендери се потпишани во четири очи, колку пари отидоа за ископ во РЕК „Битола“, колку пари отидоа за мазут во „Битола“, „Осломеј“, ТЕЦ „Неготино“, колку пари отидоа за поддршка на ликвидноста на ЕСМ за да набавува електрична енергија. Сакам прво да видам каде отидоа народните пари, па дури потоа можеме да зборуваме за поддршка на следната, условно кажано, кризна состојба поврзана со енергетската криза.“ изјави Христијан Мицкоски, претседател на ВМРО-ДПМНЕ.
Министерот за економија Крешник Бектеши пред некој ден го објави планот за справување со енергетската криза, според кој предвидено е во функција да се стават сите домашни капацитети. Ако се оди според предвиденото и доколку нема забрана за увоз на струја како што еднаш направи Бугарија - не се очекуваат рестрикции со струјата.
-Владата бара и алтернативи за рускиот гас. Земјава нема да го плаќа во рубљи ако така одлучат европските држави, па доколку секне испораката - преку писмо ќе се бара Газпром да ослободи дел од цефките за да може да се набавува од други земји. А, во игра е и опцијата – топланите наместо на гас да работат на мазут, министерот Бектеши.
Инаку, Европа веќе го презентираше кризниот план за штедење за претстојната зима.