Точно пред една година на денешен ден Никола Груевски ја напушти Македонија, а два дена подоцна откако беше распишана национална потерница по него заради издржување на двегодишната затворска казна поранешниот премиер преку Фејсбук се огласи дека се наоѓа во Будимпешта каде побарал азил. Но, точно како и со чија помош избегал се уште не е познато.
Обвинителството веднаш отвори предистражна постапка, но до денес резултат нема.
“ Во изминатиот период се сослушани 56 лица, воедно до повеќе надлежни институции е доставено барање за податоци во насока дали имале сознанија дека сега осудениот Груевски се подготвува за бегство и сите институции одговорија дека немале такви сознанија ниту информации. До овој момент не е утврдено постоење на кривична одговорност.” - велат од ЈО.
Вината за бегството со месеци си ја префрлаа судот, СЈО и финасовата полиција, МВР. Нејасно остана како ниту една инситуција не забележала и не реагирала кога Груевски неколку недели пред бегството повлекол околу 200 илјади евра од банкарските сметки во земјава.
Во меѓувреме се развија многу теории како тој ја напуштил државава. За институциите несомнено е дека Груевски излегол од Албанија кон Црна Гора, а потоа преку Србија се упатил до Унгарија, но како ја поминал границата со нашиот западен сосед се уште е мистерија....
„Во текот на ноќта на 11 ноември, некаде меѓу еден и два часот, лицето Никола Груевски влегло на албанска територија во придружба на две лица од унгарска националност,” изјави Александар Вучиќ – Претседател на Р. Србија (19.11.2018 ).
Премиерот Заев во јуни годинава за еден германски весник изјави дека Груевски се сокрил во багажник на автомобил и така бил пренесен во Албанија, каде го чекало унгарско дипломатско возило. Но оваа изјава на Заев, повторно преку Фејсбук ја демантираше Груевски.
„Јас знам дека во животот напамет не ми паднало да влегувам во багажник за било какви цели. Вистината ја знае и Заев. Заминав бидејќи во Македонија се водеа политички мотивирани процеси против мене.”
Засега фотографијата на Груевски се уште стои на веб страната на МВР во полето на потраги – со назнака за меѓународна потерница. Во меѓувреме, додека во македонскиот Кривичен суд се уште се водат постапки против него, поранешниот премиер според тоа што може да се види на фотографиите и снимките кои излегоа во медиумите во Будимпешта живее лагоден живот.