Дали пораките од европските државници ќе влијаат на домашното политичко разногласие за уставните измени? По посетите на Вархеји, Борел, Бербок и Ван Дер Белен и генералната порака дека македонскиот Парламент треба да го направи следниот чекор, а преговарачката рамка не може да се репреговара, ВМРО-ДПМНЕ повтори дека ставот нема да го смени. Според политичкиот аналитичар Петар Арсовски, пристапот на меѓународната заедница е очекуван и нивната цел е да извршат дипломатски притисок врз партиите за тие да конкретизираат како ќе го продолжат евроинтегративниот пат.
„Единствено што Македонија може во овој момент, ако сака да ја избегне таа обврска за уставните измени, е унилатерално да ги прекине преговорите со ЕУ. Притисокот кој доаѓа од меѓународната заедница кој доаѓа од геостратешки побуди, најмалку што ќе направи е ќе ги истера сите политички партии на површина да кажат точно што е нивната намера за правецот по кој треба да се движи државата.
За планот од три столба на опозицискиот лидер Мицкоски кој тврди дека може успешно да ја однесе земјава до преговорите за членство во ЕУ, но прво да се одржат предвремени избори, Арсовски вели европските челници даваат јасна порака - дека преземената обврска треба да се спроведе пред избори.
„Тие не се сигурни дека било кое ветување од Мицкоски дури и да дојде на власт ќе може да биде спроведено. Затоа, инсистираат тоа да се случи пред изборите и тоа е логично од нивна гледна точка. Од друга страна, од гледна точка на опозицијата логично е да преговара за уставни измени откако ќе поминат изборите и ќе ги консолидираат своите позиции.
Во меѓувреме за обезбедување на двотретинското мнозинство за уставните измени, дел од медиумите шпекулираа дека ДУИ има преговори со поранешниот премиер Никола Груевски. Сепак, од партијата на Ахмети категорично демантираат со одговор дека станува збор за лажна вест и потенцираат дека со него немаат контакт за ниту едно прашање.