Цените на нафтата се зголемија до 89 долари, Русите најавија забрана

Цените на нафтата денеска пораснаа на меѓународните пазари до 89 долари, поддржани од растот на цените на дериватите во пресрет на намалената понуда од Русија и знаците за слабеење на новиот бран на инфекција со Ковид во Кина.

Цената на барел на лондонската берза по пладнево беше повисока за 1,17 долари од вчерашното затворање на трговијата и изнесуваше 88,64 долари. За исто толку поскапе и на американскиот пазар каде се тргуваше за 82,28 долари.

Трговците и понатаму се надеваат на брзо закрепнување на побарувачката во Кина по укинувањето на мерките за коронавирус, иако нивниот оптимизам накратко беше пригушен од новиот бран на ширење на вирусот. Денеска тие беа охрабрени од падот од 72 отсто на бројот на критично болни пациенти во споредба со највисокото ниво за овој месец. Бројот на смртни случаи од Ковид во болниците е намален за 79 отсто.

Кина е најголемиот увозник на нафта во светот, а олеснувањето на инфекцијата и постепеното нормализирање на животот би значело и закрепнување на економијата и побарувачката за гориво. Трговците укажуваат на растот на цените на дизелот, керозинот и мазутот во очекување на намалена понуда од Русија откако Г7 и нејзините сојузници ги ограничија цените на почетокот на февруари.

Русија најави дека на почетокот на февруари ќе ја забрани нивната продажба на пет месеци на сите земји кои воведуваат ценовно ограничување.

„Сметаме дека цената на нафтата порасна пред се поради наглиот раст на цените на нафтените деривати“, пишуваат во белешка аналитичарите на инвестициската банка JPMorgan, издвојувајќи го и одржувањето на рафинериите. Расположението е поддржано од фактот што годишната стапка на раст на американската економија во четвртиот квартал изнесуваше 2,9 отсто, надминувајќи ги очекувањата.

Претставниците на Организацијата на земјите извознички на нафта (ОПЕК) и нејзините партнери ќе се состанат следната недела за да разговараат за производствената политика. Изворите во ОПЕК + не очекуваат никакви промени. Одделно, ОПЕК денеска објави дека цената на барел кошничка нафта на нејзините членки е речиси непроменета на 84,47 долари.

Првите шест авиони „Рафал“ во Хрватска пристигнуваат оваа недела

Хрватскиот министер за одбрана, Иван Анушиќ, денеска соопшти дека неделава во Хрватска ќе пристигнат првите шест од вкупно 12-те купени борбени авиони „Рафал“.

„Со историски прелет од Бордо до Загреб, пилотите на хрватското воено воздухопловство, кои беа обучени Франција, в четврток ќе ги донесат моќните ловци и нови заштитници на хрватскиот воздушен простор“, напиша Анушиќ на социјалната мрежа Х.

Тој додаде дека модернизацијата на воздушната флота е најголемата инвестиција на Владата и Министерството за одбрана во безбедноста на државата.

Во 2021 година Хрватска потпиша договор со Франција за купување на 12 половни француски борбени авиони „Рафал“ во вредност од 999 милиони евра.

Првиот авион беше преземен во октомври минатата година во француската воена база во Мон де Марсан.

Во Франција на обука беа испратени околу 90 членови на техничкиот и летечкиот персонал. /МИА

Рикен нов генерален директор на Борусија Дортмунд

 Поранешниот германски фудбалер Ларс Рикен (47) е назначен за нов генерален директор на Борусија Дортмунд, соопшти бундеслигашот

Рикен речиси целата своја играчка кариера ја помина во Борусија Дортмунд, а од 2001 година е на чело на клупскиот тренинг центар. На новата должност ќе стапи на 1 мај.

Рикен доаѓа на местото на Ханс-Јоаким Вацке, кој претходно оваа сезона најави дека ќе се пензионира на крајот од сезоната.

„Уверен сум дека со неверојатната сила на овој клуб ќе оствариме големи победи“, порача Рикен.

Борусија Дортмунд во моментов е петтопласирана во Бундеслигата, а на почетокот на мај ќе игра против Пари Сен Жермен во полуфиналето од Лигата на шампионите. /МИА

Гласањето за претседател во затворот Идризово се одвива без проблеми

Во затворот Идризово гласањето за претседателските избори денеска се одвива без проблеми, иформираат за МИА од Избирачкиот одбор. 

-Подготвките за гласањето завршија одлично. Гласањето започна во 7 часот и се одвива без проблеми. Во Избирачкиот список за ова гласачко место број 2536 се запишани 887 избирачи, а до пладне на гласање излегоа 235, изјави за МИА членот на Избирачкиот одбор Тони Трајковски.

Согласно Избирачкиот список денеска треба да гласаат 2.147 лица кои се на издржување казна затвор или се во притвор.

За претседателските избори денеска гласаат и болните и изнемоштените и лицата во старските домови.

Членови на Избирачките одбори ги посетуваат во нивните домови за да гласаат и 6.935 болни и изнемоштени лица, чии пријави беа прифатени.

Запишани се и 534 избирачи, кои поднеле пријава за гласање, во посебниот извод од Избирачкиот список за лица кои за време на изборите се наоѓаат во установи за вон семејно згрижување, како и двајца избирачи со статус на внатрешно раселени лица, согласно евиденцијата на Министерството за труд и социјална политика.

Право на глас на седмите претседателски избори имаат 1.814.317 избирачи. Избирачките места се отвораат во 7 часот, а гласањето трае до 19 часот. Се гласа на 3480 избирачки места во целата земја.

притисни ентер