Таа тврди дека ги почитувала сите протоколи и не знае како се заразила. Веќе е во самоизолација и засега нема никакви симптоми.
-Не можам да бидам сигурна на каков начин сум го добила вирусот, но сите контакти кои ги имав последниве денови беа со целосно почитување на мерките за заштита, со маска, на дистанца и со редовна дезинфекција. – пишува Лукаревска.
Во пресрет на парламентарните избори раководството на владејачката партија веќе започна со теренски активности. Кандидатите од втората изборна единица вчера беа во посета на Куманово, а дел од нив беше и Лукаревска која ја носи втората позиција. Присутен беше и премиерот Оливер Спасовски како носител на двојка, а од неговата партија веќе соопштија дека се тестирал и ги чека резултатите. Лидерот на СДСМ Зоран Заев вели дека ги преземаат сите мерки за заштита, сепак потпретседателот Зекири се заразил надвор од партијата, на ифтар кај неговиот брат.
-СДСМ е голема партија со над 120 илјади членови и мерките целосно се почитуваат. Бројката од двајца заразени покажува дека вирусот е реалност и тој постои. Во овие два случаи не сме почитувале до крај, пред сè како луѓе. Зекири е заразен одејќи на ифтар кај својот брат, снаата веројатно од своето семејство. Не сме почитувале доволно. Со Филипче зборевме, кај Луакревска е целосно олабавено и правото на пренос не е исто како кај Зекири. – Зоран Заев – претседател на СДСМ.
По прес конференцијата на Заев се огласи Зекири кој појаснува дека на ифтарските вечери бил во својот дом и не ги прекршил забраните за движење, а средба со потесното семејство имал на Бајрамскиот викенд.
Ризичните контакти на партиски состаноци со Зекири и Лукаревска, во самоизолација ги ставија голем дел од од функционерите - вицепремиерката Мила Царовска, министерот за информатичко општество Дамјан Манчевски, дополнителната заменичка во МВР Славјанка Петровска, директорот на финасиска полиција Арафат Муареми и советникот за односи со јавност на премиерот Марјан Забрчанец. Сите на социјалните мрежи објавија дека засега немаат симптоми.
Поради контакт со лице позитивно на корона вирусот, во самоизолација е и градоначалникот на Чаир, Висар Ганиу.
Инаку, три дена пред да дознае Зекири дека е носител на вирусот, беше гостин на телевизиска дебата со генералниот секретар на ВМРО ДПМНЕ Игор Јанушев, чиј што тест покажа дека е негативен.