Ова го изјави денеска српската премиерка Ана Брнабиќ во Големото собрание на Српскиот национален совет во Загреб.

Брнабиќ е дел од високата делегација на Србија, во која е и министерот за човекови и малцински права и социјален дијалог Томислав Жигманов, првиот претставник на хрватското национално малцинство во српската влада. Претходно денеска, Брнабиќ во Бански двори се сретна со премиерот Андреј Пленковиќ.

„Односите меѓу Србија и Хрватска се оптоварени со многу прашања, недоразбирања, несогласувања, длабоки рани и голема недоверба, толку многу што ниту една наша посета на Загреб или која било посета на хрватските претставници на Србија не беше обична посета, туку секогаш нешто повеќе од тоа и така натаму“, рече Брнабиќ.

Премиерката на Србија сака поредовна, вообичаена размена.

„Сакаме тие да бидат обични посети, да бидат почести и поредовни и секоја од нив да не биде негативен или непријателски симбол, туку нормален работен ден што ќе го искористиме за да разговараме за сите отворени прашања и теми кои се важни за иднина, за сите наши граѓани и за целата наша економија“.

Таа им се заблагодари на двајцата претставници на малцинствата во Хрватска и Србија за нивниот придонес.

„Затоа ми е мило, ми се чини, што успеавме да направиме добар и квалитетен исчекор во 2023 година, барем засега, бидејќи тоа кај нас никогаш не се знае, пред сѐ благодарение на Милорад Пуповац и Томислав Жигманов. “, изјави Брнабиќ.

Србите во Хрватска и припадниците на хрватскиот народ во Србија се тие кои играат огромна улога во воспоставувањето подобри односи и доверба. Таа особено ја поздрави Декларацијата за соработка меѓу Србите од Хрватска и Хрватите од Србија, која на 5 јануари во Загреб ја потпишаа Жигманов и Пуповац.

„Искрено се надевам дека на овој начин се отвори нова димензија на соработка која многу брзо ќе даде конкретни резултати, а можеби и мојата посета на Загреб е конкретен резултат на тоа“, изјави шефицата на српската влада.

Таа во својот говор во собранието во салата „Ватрослав Лисински“ потсети дека на 6 јануари министерот за надворешни работи Ивица Дачиќ и министерот за малцинства и човекови права Томислав Жигманов и министерот за евроинтеграции Тања Мишчевиќ учествувале на божиќниот пречек на СНВ во Загреб. Малку подоцна, хрватскиот премиер Пленковиќ и српскиот претседател Александар Вучиќ се сретнаа на маргините на Светскиот економски форум во Давос, рече таа.

По ова, продолжи Брнабиќ, следеше посетата на хрватскиот шеф на дипломатијата Гордан Грлиќ Радман на Суботица и нова средба со неговиот колега Дачиќ, како и билатерална средба на надлежните органи за прашањето на исчезнатите лица.

„Очекуваме и ќе работиме на одржување политички консултации на министерствата за надворешни работи на нашите две земји оваа година“, рече Брнабиќ. Таа рече дека средбата со Пленковиќ била конкретна и конструктивна и оти се надева дека таа е прва во низата.

„Разговаравме за проекти како што е повторно воспоставување на железничкиот сообраќај меѓу Белград, Загреб и Љубљана, но ги допревме сите отворени прашања, без разлика колку се тешки и емотивни и како да се работи за нивно решавање“, рече српската премиерка.

Таа на присутните им порача дека владата на Србија е посветена и многу се грижи за Србите во Хрватска. Истовремено, таа изјави дека од 2016 година за проектите на српската заедница се издвоени шест милиони евра.

„Испративме и 2,5 милиони евра помош за Хрватска по земјотресот во 2020 година, како и помош и поддршка за СПЦ во Хрватска“, истакна Брнабиќ. На крајот од говорот таа рече дека Хрватите и Србите се насочени еден кон друг „неколку векови“.

„Нашите народи се и мора да бидат гарант за мирот, стабилноста и просперитетот на овој дел од Европа“, рече Брнабиќ и ѝ честиташе на Хрватска за достигнувањата во 2023 година, пристапувањето во еврозоната, Шенген и други успеси како што е Договорот за избегнување двојно оданочување со САД.

„Во регион како нашиот, кој е релативно мал, се потпираме еден на друг, секој успех значи поголема стабилност и подобар потенцијал за сите нас“, рече Брнабиќ, честитајќи му на Пленковиќ за успесите на Хрватска.

Таа го заврши говорот со реченицата: „Конечно, со љубов кон Србија и почит кон Хрватска, вие сте залог на нашата заедничка иднина. Нашата визија за таа иднина, која ја градиме посветена на европските идеали, е надежта дека ќе создадете општества во кои разликите вистински ќе се негуваат и општества кои ќе ги задржат тие разлики како свое богатство“.

Брнабиќ шест години е премиерка на Србија и ова е трета влада што ја предводи, а оваа недела одбележа шест месеци од мандатот на третата влада. На Големото собрание на СНВ заедно со премиерот Пленковиќ присуствуваа и министерот за внатрешни работи Давор Божиновиќ и министерот за надворешни работи Гордан Грлиќ Радман, објави хрватски Индекс.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.