Бриселските медиуми за средбата во Париз: Сојузниците манифестираа единство, но многу прашања се и натаму отворени - Канал 5

Европа

Бриселските медиуми за средбата во Париз: Сојузниците манифестираа единство, но многу прашања се и натаму отворени

- Во невообичаената манифестација на усогласеност, американските претставници Стив Виткоф и Џаред Кушнер ги поддржаа напорите предводени од Европа за договор за безбедносни гаранции за Киев.

Бриселските медиуми за средбата во Париз: Сојузниците манифестираа единство, но многу прашања се и натаму отворени

И покрај постоечките тензии во трансатлантските односи, Европа и САД на вчерашниот состанок на Коалицијата на подготвените во Париз презентираа „редок обединет фронт за Украина“, што ќе им овозможи на францускиот претседател Емануел Макрон, британскиот премиер Кир Стармер и претседателката на Европската комисија, Урсула фон дер Лајен да тврдат дека е постигнат дипломатски напредок во усогласувањето на повоените безбедносни гаранции за Киев, оценуваат бриселските медиуми во освртите на резултатите од вчерашната париска лидерска средба.

- Во невообичаената манифестација на усогласеност, американските претставници Стив Виткоф и Џаред Кушнер ги поддржаа напорите предводени од Европа за договор за безбедносни гаранции за Киев, вклучително и за долгорочен план за зајакнување на одбраната на Украина, наведува „Политико“.

Во медиумските извештаи се посочува дека во декларацијата од средбата европските држави се согласиле да испратат свои војници на терен по прекинот на огнот со „американска гаранција за одвраќање на каква било обновена руска агресија“.

Медиумите ја пренесуваат и изјавата на Макрон дека САД ќе имаат водечка улога во следењето на какви било прекршувања на идниот мир, додека европските сили ќе бидат стационирани „далеку од линијата на контакт“ со Русија, како и дека земјите од Коалицијата на подготвените се согласиле да дадат „политички и правно обврзувачки гаранции“ со цел да осигурат дека Украина нема да биде принудена на капитулација или повторно загрозена откако ќе завршат непријателствата.

- Дали тоа значи борба против Русија? Гаранцијата, се вели во текстот, „може да вклучува“ воена акција. Тоа како да е Член 5 (од Договорот на НАТО), а сепак не е Член 5, прашува „Еурактив“ во својата анализа на средбата.

Според порталот, сето ова засега „останува целосно теоретско“, имајќи предвид дека Русија манифестира „отпор кон прифаќање на прекин на огнот“ и веќе ја отфрли идејата за какво било распоредување на европски трупи на украинска територија.

Во освртите се посочува и дека американските претставници Виткоф и Кушнер, како и некои европски лидери, меѓу кои и германскиот канцелар Фридрих Мерц, сепак не ја потпишале декларацијата за распоредување мултинационални сили во Украина, која би требало да стапи во сила по воспоставувањето на прекин на огнот.

Ова според медиумите, е показател оти скептицизмот кон распоредувањето на европски сили во Украина се протега и надвор од Вашингтон и во дел од главните градови во Европа.

Дополнително се пренесува и изјавата на Мерц дека германски војници наместо во самата Украина, би можеле да бидат стационирани во соседните земји, како Полска или Романија, како и оценките дека некои европски земји се „помалку заинтересирани“ или „неподготвени“ за испраќање свои сили.

Во тој контекст се пренесува и изјавата на грчкиот премиер Киријакос Мицотакис дека Грција нема да учествува во европските сила во Украина, иако, како што се наведува, официјални лица изјавиле оти Атина не исклучува „други форми на поддршка, вклучително и поморскиот надзор“.

- Во секој случај, големото прашање е дали Европејците на крајот ќе бидат подготвени да ги спроведат овие гаранции и да ги ризикуваат животите на своите војници. Ако не се подготвени експлицитно да испратат војници додека војната трае, зошто би го сториле тоа во идна криза?, наведува „Еурактив“.

Бриселските медиуми оценуваат дека декларацијата од париската средба „била разводнета“ за време на преговорите, посочувајќи дека во предлог верзијата на документот било наведена „обврска на САД да ги поддржат европските сили во случај на напад“, додека во конечниот текст се говори само за „континуирана поддршка од страна на САД“.

Дополнително, од конечната верзија на декларацијата „исчезнал“ и делот кој се однесувал на „континуираната долгорочна“ американска воена помош и снабдувањето со оружје за Украина.

Ова, според медиумите ја прави природата на американското учество во безбедносните гаранции „многу нејасна“, бидејќи сè уште не е познато колку далеку се подготвени да одат САД во однос на своите обврски.

Белгискиот експерт за Русија, Јан Балијау во изјава за државното Радио 1 вели дека европските земји би требало да се задоволни со тоа што го имаат.

- Фактот е дека САД сакаат да соработуваат со своите европски сојузници кога станува збор за Украина, е важен сигнал, смета Билијау.

Според него, проблем може да претставува одбивањето на Русија да се согласи на распоредувањето на европски војници во Украина, но доколку САД цврсто застанат зад таквиот план, маневарскиот простор на Москва за негово одбивање би бил стеснет.

- Со одбивањето, Русија би можела потенцијално да го загрози својот однос со Трамп, смета Билијау.

Неговиот соговорник во истата радиоемисија, аналитичарот Арно де Декер, пак смета дека за да се реализираат договорените безбедносни гаранции во Париз, мора прво да се постигне прекин на огнот

- До тогаш договорите постигнати во Париз ќе останат само убави ветувања, изјави Де Декер.

Во однос на договореното, пак, тој оценува дека се поставува и прашањето колку е тоа спроведливо од страна на Коалицијата на подготвените и САД.

- Зборовите на хартија можат да кажат многу, но треба да видиме и дела, додаде Де Декер.

Медиумите оценуваат дека по вчерашната средба во Париз е јасно дека постојат конкретни планови и какви се позициите на сите, по што во наредните недели и месеци ќе мора да работи на некаков вид зближување меѓу Русија и Украина.

Сепак, конечниот заклучок во анализите е дека поголемиот дел од она што беше договорено на вчерашната средба во Париз нема да се материјализира сè додека не се воспостави прекин на огнот меѓу Русија и Украина, што засега е многу нејасно кога или дали ќе се случи.

Тагови: ЕУ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Експлозии на повеќе локации во Молдавија: Пронајдени остатоци од беспилотни летала

Утрово неколку беспилотни летала навлегоа во молдавскиот воздушен простор, по што следеа експлозии на повеќе локации. Според досегашните информации, нема повредени лица.

Експлозии на повеќе локации во Молдавија: Пронајдени остатоци од беспилотни летала

Министерството за одбрана на Молдавија соопшти дека националниот систем за надзор детектирал повеќе беспилотни летала над молдавската територија, вклучително и во близина на Анениј Ној, Штефан Вода, Тудора и Каушени.

Полицијата потоа извести дека жители од неколку области пријавиле експлозии надвор од населените места. На повеќе локации беа пронајдени делови за кои постои сомневање дека потекнуваат од беспилотни летала.

Во близина на Каушени, полицијата пронашла остатоци од летало по пријави за експлозија и густ чад. Слични предмети биле пронајдени и во близина на Дубовка и Хинчешти, како и меѓу Делакау и Пухачени.

Експлозија предизвика пожар и оштети објект

Еден од посериозните инциденти е забележан во близина на Крокмаз, во областа Штефан Вода.

Пожар во вегетацијата избувна откако летало се урна во лозје, а беа оштетени и прозорците на близок земјоделски објект. Според достапните информации, нема повредени лица.

Полицијата ги истражува околностите на сите инциденти и апелираше до граѓаните да не им приоѓаат на пронајдените делови од летала, туку веднаш да ги известат надлежните служби.

Сè се случи за време на рускиот напад врз Украина

Инцидентите беа забележани додека Русија изведуваше нов голем напад со беспилотни летала и ракети врз Украина.

Молдавските власти сè уште немаат објавено конечни информации за потеклото на сите пронајдени летала, ниту пак тврдат дека Молдавија била нивната цел. Истрагата е во тек.

Санду: Пет руски ракети и беспилотни летала го нарушија нашиот воздушен простор

Претседателката на Молдавија, Маја Санду, го осуди утринскиот руски напад врз Украина и изјави дека војната, според нејзините зборови, „опасно стигнала до Молдавија“.

„Пет руски воздушни средства, вклучително ракети и беспилотни летала, го нарушија нашиот воздушен простор и експлодираа на наша територија. Москва ги загрозува животите низ Европа и мора да биде запрена“, напиша Санду на платформата „X“.

Извор: Индекс.хр

Тагови: Молдавија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Ѓорѓиевски: Мостот на „Љубљанска“ во функција до крајот на годината

Градоначалникот на Град Скопје, Орце Ѓорѓиевски, Претседателот на Владата на Република Македонија, Христијан Мицкоски и Градоначалникот на Општина Карпош, Сотир Лукровски, денеска извршија увид во градежните активности на мостот на „Љубљанска“. 

Ѓорѓиевски: Мостот на „Љубљанска“ во функција до крајот на годината

По години застој, продолжува финалната фаза од поврзувањето на улиците „Љубљанска“ и „Скупи“, со цел до крајот на оваа година мостот да биде ставен во функција.

- Скопје предолго чекаше, време е да се движи напред! Дадениот збор за мене е обврска. А довербата што ја добив од вас, мојот народ, е одговорност што ја носам секој ден. Да работам, да ги решавам проблемите што со години стоеле заглавени и да испорачувам резултати што ќе ги почувствувате во сопственото секојдневие. За нашиот град, ова поврзување има огромно значење. Нова сообраќајна врска меѓу северниот и западниот дел на Скопје, подобар пристап до Злокуќани, Бардовци и Индустриската зона, побрз и побезбеден излез кон обиколницата и растоварување на булеварите „Партизански одреди“ и „Илинденска“. Зад сето ова стои она што им е најважно на граѓаните - помалку време во колони, полесно стигнување до работа и повеќе време со семејството – изјави градоначалникот Ѓорѓиевски.

Значајно е да се нагласи дека застојот поради потребното мислење и дозвола од Конзерваторскиот центар за заштита на локалитетот „Скупи“ е надминат.

- Со сериозна работа и одговорен пристап, дозволата која моите претходници ја закочија е обезбедена, заштитата на културното наследство е запазена, а градежните активности од денес продолжуваат со засилен интензитет – нагласи Ѓорѓиевски.

Градоначалникот Ѓорѓиевски истакна дека се гради современо и целосно сообраќајно решение, со коловоз широк 12 метри и четири сообраќајни ленти, по две во секој правец, на вкупна површина од 5.350 квадратни метри. Од двете страни ќе има пешачки и велосипедски патеки, секоја широка по два метра, со вкупна површина од 3.815 квадратни метри, кои ќе овозможат безбедно и удобно движење за сите учесници во сообраќајот. Изградени се потпорни ѕидови од двете страни на булеварот, со 2.050 кубни метри бетон, атмосферска канализација во должина од 473 метри и улично осветлување со 40 столбови, за поголема безбедност и прегледност.

Паралелно, Град Скопје работи и на изградбата на мега парк на површина од 70.000 квадратни метри во Карпош, со партерно и хортикултурно уредување, пешачки патеки, хидрантска мрежа и урбана опрема.

- Создаваме нов простор за прошетки, рекреација и дружење, а продолжуваат и активностите за расчистување на кејот на Вардар. Скопјани заслужуваат уреден кеј и зеленило во кое ќе уживаат сите генерации - рече Ѓорѓиевски.

Градоначалникот Ѓорѓиевски изрази голема благодарност до премиерот Христијан Мицкоски за огромната поддршка и личната посветеност, кој со конкретни дела покажува како се сакаат сопствениот град и државата.

- Таа поддршка ни дава сила да ги придвижуваме заглавените проекти и заедно да ги правиме Скопје и Македонија поубаво место за живеење. Скопјани заслужуваат модерен и функционален град. Град во кој се стигнува полесно, се живее поубаво и се гледа дека некој се грижи – истакна Ѓорѓиевски.

Тагови: Орце Ѓорѓиевски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Разорни поплави во Шпанија: Водата носи сè пред себе

Стогодишна жена загина во катастрофалните поплави што ја погодија општината Мадригерас во шпанската провинција Албасете. Водата носеше сè пред себе и предизвикаа огромна штета, јавуваат шпанските медиуми.

Разорни поплави во Шпанија: Водата носи сè пред себе

Несреќната стогодишничка се наоѓала во својот семеен дом кога водата нагло навлегла внатре и таа не успеала да се спаси, потврдија регионалните власти на Кастиља-Ла Манча.

За само два часа наврнаа повеќе од 140 литри дожд на квадратен метар

Поплавата започна во петокот околу 18:15 часот, кога општината ја зафати силен пороен дожд што непрекинато паѓаше речиси два часа. Според првичните мерења, во тој краток период наврнале повеќе од 140 литри дожд на квадратен метар.

Ситуацијата брзо се влошила бидејќи огромни количини вода од блиските клисури и околните ридови се слеале во населбата, целосно поплавувајќи ги улиците на Мадригерас.

На социјалните мрежи набрзо се појавија снимки на кои се гледа како каллива вода ги преплавува патиштата и навлегува во домовите.

Регионалната влада веднаш го активираше првото ниво на тревога од специјалниот план за заштита од поплави (Meteocam), додека службите за итни случаи, пожарникарите и спасувачките екипи ја поминаа целата ноќ на терен, помагајќи им на жителите и расчистувајќи ги остатоците што ги нанела водата. Шпанскиот премиер Педро Санчез исто така се огласи за настанот на социјалната мрежа „X“, изразувајќи сочувство до семејството на починатата жена и истакнувајќи дека обилните дождови предизвикале сериозни штети во неколку делови од земјата, притоа повикувајќи ги граѓаните на крајна претпазливост и почитување на упатствата на службите за итни случаи.

Извор: Индекс.хр

Тагови: поплави Шпанија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер