„Јас лично ќе бидам ангажиран во дијалогот и нема да жалам за напорот .Јас сум посветен да посредувам во дијалогот меѓу Белград и Приштина и очекувам тој да продолжи што е можно побргу“, рече Борел во интервју за агенцијата Танјуг пред неговата утрешна посета на Белград .
„Од клучно значење е косовските власти да го искористат овој нов момент и да ги намалат царинските давачки. Србија, исто така, мора да даде свој придонес за да пристигне во конструктивна атмосфера и да ги продолжи преговорите“, рече Борел, кој денес имаше серија состаноци со косовските лидери во Приштина.
Тој посочи дека ја гледа „посветеноста и политичката волја“ на Белград и истото го очекува и во Приштина, истакнувајќи ја улогата на ЕУ во „правење простор за постигнување и спроведување“ на договори за нормализација на односите и дека агендата на дијалогот ја утврдиле властите во Белград и Приштина .
„За мене, главниот приоритет е да им ставиме до знаење на сите зошто сме седнати на иста маса, што сакаме да постигнеме и што да започнеме. Нормализирањето на односите е деликатна материја, која допира до самото срце на идентитетот на луѓето. Свесен сум дека минатото сè уште е присутно, но ние мора да продолжиме понатаму “, ги образложи Борел своите ставови за дијалогот Белград-Приштина.
Пристигнувајќи во Србија, истакна тој, првенствено сака да ја покаже јасната посветеност на Унијата кон европската перспектива на Србија и на целиот Западен Балкан, бидејќи регионот има заедничка иднина и многу јасен интерес за зајакнување на соработката во областа на безбедноста, економијата и надворешната политика.
Борел инсистира на тоа дека „европската перспектива за Србија и Западен Балкан е приоритет за него лично и за Европската комисија“.
Според водечкиот европски дипломат, нормализацијата на односите со Приштина преку сеопфатен правно обврзувачки договор и внатрешните реформи фокусирани на владеењето на правото и медиумите се клучни за членството на Србија во ЕУ.
Унијата, посочува Борел, би сакала да ја зајакне соработката со Србија во областа на надворешната и безбедносната политика, бидејќи го цени нејзиниот придонес преку учеството во воени мисии и операции на ЕУ.
Тој оцени дека постои простор во кој Србија може да направи дополнителни напори за да ја усогласи својата надворешна политика со онаа на ЕУ.
„Нашите споделени предизвици бараат заеднички одговори“, истакна Борел. Престојот на Борел во Приштина и Белград е негова прва посета на регионот, откако тој беше поставен за шеф на дипломатијата на ЕУ.
Дијалогот Белград - Приштина е запрен од крајот на 2018 година кога Приштина воведе оданочување на стоките од Србија (и БиХ) во знак на одмазда за дипломатската кампања на Белград за повлекување на признавањето на независноста на Косово и спречување на приемот на Косово во меѓународните организации како Интерпол, УНЕСКО и приемот во ООН.
Белград со месеци ја повторува својата подготвеност да го продолжи дијалогот, но со единствен услов Приштина да ги укине царините, додека меѓународната заедница инсистира на тоа Белград истовремено да ја прекине кампањата против меѓународното членство на Косово.