Африканската свинска чума по Бугарија стигна и во Србија

Африканската свинска чума по Бугарија стигна и во Србија. Од денеска Агенцијата за храна и ветеринарство донесе забрана за увоз на свинско месо и преработки.

Директорот на агенцијата Атанасов информацијата ја потврди и за Канал 5. Свинската чума ја има во околината на Белград, Младеновац и Смедеревска Паланка. Ловечките здруженија се организираат, утре треба да потврдат кога ќе почне ловот на диви свињи. Овој викенд акцијата не почнала поради забраната за движење во шумите заради заштита од пожари.

По потврдата на антракс во местото Страговиште во општина Зајас денеска нема пријава на нови случаи за заболени животни, ниту луѓе. Она што е ново е дека во 22 обележени места во Македонија сомнителни дека ќе се појави антракс ќе започне вакцинација на овците, козите, кравите и коњите. Според правилата животните во обележаните места низ цела Македонија ќе бидат веднаш вакцинирани.

На седми август официјално било потврдено дека има антракс во општина Зајас. Местото е чисто и биле запалени девет мрши, потврдуваат од агенцијата. До оваа институција имаше големи критики дека ја прикривале информацијата. Првиот човек на агенцијата повтори дека се прави сензација од нешто што се појавувало со години, и дека состојбата е целосно под контрола. 30 вработени од факултетот за ветерина се уште се на превентива со антибиотици бидејќи биле во контакт со заболеното животни.

Димитров и Османи утре во работна посета на Данска

Во рамки на посетата, како што е најавено, предвидени се одделни средби со министерот за надворешни работи на Данска, Јепе Кофод, со главниот советник за европски прашања во Канцеларијата на данскиот премиер Вибеке Пастернак Јоргенсен.

 Вицепремиерот задолжен за европски прашања Бујар Османи и министерот за надворешни работи Никола Димитров, утре ќе престојуваат во работна посета на Данска, во чиј фокус ќе биде донесувањето на одлуката за датум за почеток на пристапните преговори со Европската унија во октомври годинава.

Во рамки на посетата, како што е најавено, предвидени се одделни средби со министерот за надворешни работи на Данска, Јепе Кофод, со главниот советник за европски прашања во Канцеларијата на данскиот премиер Вибеке Пастернак Јоргенсен, како и со други релевантни соговорници.

На средбите, како што се наведува во соопштението владиниот Сектор за односи со јавноста, вицепремиерот Османи и министерот Димитров ќе го истакнат значењето од донесувањето на одлуката за датум за почеток на пристапните преговори со Европската унија во октомври оваа година.

Детално ќе брифираат за постигнатото во реформските активности од европската агенда, за внатрешно политичките случувања, добрососедските односи, како и за состојбите во регионот, а воедно ќе бидат разменети мислења и за билатералните односи меѓу двете земји, се вели во соопштението. 

Голем интерес за Купи куќа – купи стан, изготвен и нов прирачник

Министерството за финансии изготви прирачник за проектот „Купи куќа, купи стан", што е поставен на веб-страницата на Министерството.

За неполни три месеци откако стапија во сила новите услови, интересот кај граѓаните е голем, соопшти денеска Министерството за финансии.

– Намалените каматни стапки, новиот модел Купи стан за млади, како и дополнителната едногодишна субвенција на месечната рата за секое новородено или посвоено дете, е причината за големиот интерес, стои во соопштението.

Согласно новите услови, каматната стапка за моделот „субвенција на рата" за првите три години изнесува 2,9 проценти, а за третата и за четвртата година 3,9 проценти. Намалена е и каматната стапка за моделот „субвенција на учество" и таа сега изнесува четири проценти за цело времетраење од исплатата на кредитот зголемена за шестмесечен еурибор.

За младите до и со наполнети 35 години, потсетуваат, е воведен нов модел „Купи стан за млади". Притоа, корисниците што ќе го одберат моделот „субвенција на рата", од државата ќе добијат субвенции во висина од 70 проценти од ратата во првите пет години од отплатата на станбениот кредит.

– Така на пример, за кредит од 50.000 евра вкупниот износ на субвенцијата изнесува 11.900 евра. Оние, пак, што ќе го одберат моделот за помош при отплата на учеството, од државата ќе добијат субвенција во висина од 70 проценти од учеството за станот. За кредит од 50 илјади евра, државата ќе субвенционира 8.750 евра. Дополнително, корисниците на субвенциониран станбен кредит, за секое новородено или посвоено дете ќе добијат дополнителна едногодишна субвенција на месечната рата во висина од 30 проценти, појаснува Министерството.

Новина има и кај моделот „Купи куќа за возраст над 35 години". Сега оние што ќе аплицираат за овој модел ќе добијат поголема субвенција. Лицата над 35 години ќе добијат субвенции од 80 отсто од месечната рата во првите пет години за изградба или купување нова куќа, или 80 проценти од учеството при купување или изградба на куќа. 

Алкалоид инвестира 11 милиони евра во проширување на производните капацитети

Новите производни одделенија ќе се простираат на површина од 7.000 м² и ќе создадат услови за реализирање на околу 200 нови вработувања.

Посветеноста на перманентниот раст и развој, следењето на трендовите и најновите достигнувања во сферата на фармацијата, се главните причини поради кои во изминативе дваесет години „Алкалоид АД Скопје“ се задржа на курсот за континуирано инвестирање вложувајќи преку 200 милиони евра, алоцирани воглавно во сегментот Фармација. Инвестициските потфати во производствени капацитети и опрема, лаборатории, институт за истражување и развој, центар за контрола на квалитетот, модерен SAP софтвер, технологија и добро обучен персонал – менаџментот на „Алкалоид“ ги смета за неопходни предуслови за зголемување на пласманите и интензивирано глобално позиционирање на производите на брендот „Алкалоид“. Во таа насока, се инвестициите во новите производни одделенија чиј износ ќе достигне 11 милиони евра и кои како и останатите, ќе се изведуваат во согласност со строгите барања за Добра производствена практика (GMP).

Од планираните 11 милиони евра, 3,5 милиони ќе бидат наменети за целосно технолошко подготвување на одделението „Пакување на цврсти форми“, со површина од 2.000м². За потребите на одделението, нарачана е техничко-технолошка опрема во вредност од 5,2 милиони евра, вклучувајќи две автоматски линии за пакување. 2,3 милиони евра ќе бидат инвестирани за изградба на два нови ката наменети за производство на цврсти фармацевтски форми и придружен простор за техничко-технолошка опрема со вкупна површина од 5.000 м².

Сето ова ќе овозможи зголемување на капацитетите за производство за најмалку 50%, односно од сегашниот капацитет од речиси 2 милијарди таблети и капсули годишно, на повеќе од 3 милијарди парчиња цврсти фармацевтски форми.

„Согласно стратегијата за развој и долгорочниот план за капитални вложувања, ‘Алкалоид’ иницира нова фаза во инвестициските активности која има за цел зголемување на производните капацитети на компанијата. Планираната инвестиција е во склад со политиката на компанијата за вложување во капитални проекти, а со оглед на тројното зголемување на консолидираните приходи од продажби во изминативе 15 години, ваквиот потфат беше неопходен за овозможување на уште поинтензивни пласмани и континуиран раст“ – изјави г. Живко Мукаетов, Генерален директор и Претседател на Управниот одбор на компанијата.

Комплетирањето на оваа инвестиција, планирано за првата половина од 2020 година, ќе создаде услови за реализирање на околу 200 нови вработувања во сегментот Фармација.

притисни ентер