NLB Pay - прв и единствен мобилен паричник на пазарот кој ги интегрира Visa и MasterCard картичките

НЛБ Банка е прва и единствена банка на пазарот која ги интегрира двата картични бренда Visa и MasterCard во мобилниот паричник NLB Pay. 

Оваа нова и единствена функционалност овозможува да ги дигитализирате сите Visa и MasterCard платежни картички издадени од НЛБ Банка во мобилниот паричник NLB Pay и да плаќате бесконтактно, само со доближување на мобилниот телефон до ПОС терминал во земјата и во странство.

„Фокусот на НЛБ Банка е секогаш да биде прва банка на пазарот која на иновативен начин ќе одговори на потребите и барањата на своите клиенти. Пред една година го воведовме мобилниот паричник NLB Pay со дигитализација на MasterCard картичките, а денес сме горди што можеме да одговориме позитивно на барањата на нашите клиенти со воведување и на Visa картичките. Отсега ќе може да ги дигитализирате сите картички издадени од НЛБ Банка во NLB Pay мобилниот паричник. Плаќањето е лесно, бесконтактно и безбедно и се реализира само со доближување на мобилниот телефон до ПОС терминал.“, изјави Антонио Аргир, Претседател на Управниот одбор на НЛБ Банка. 

NLB Pay мобилниот паричник е мобилна апликација наменета за корисниците на платежни картички издадени од НЛБ Банка, кои поседуваат мобилен уред со Android оперативен систем кој поддржува NFC технологија. NLB Pay мобилниот паричник овозможува бесконтактни плаќања на ПОС терминали во земјата и во странство. Инсталирањето на NLB Pay мобилниот паричник, дигитализацијата на картичките и користењето на услугата се бесплатни. 

Апликацијата е достапна за преземање на Google Play store на следниот линк.

Со воведувањето на оваа услуга, НЛБ Банка продолжува да ги следи светските трендови на поедноставување и приближување на банкарските услуги кон своите клиенти. Мобилните банкарски услуги со својата достапност, едноставност, брзина и безбедност при користењето, на клиентите им овозможуваат заштеда на време и средства, им даваат можност да ги завршат своите банкарски обврски 24 часа на ден, 7 дена во неделата.

Повеќе информации можете да добиете на следниот линк.

Кривичниот суд ја потврди казната затвор од девет години за Ѓоко Поповски

Кривичниот суд денеска на повтореното судење ја потврди казната од девет години затвор за поранешниот помошник-министер за внатрешни работи Ѓоко Поповски, кој е обвинет за злоупотреба на службената положба во случајот „Триста".

Судиката Добрила Кацарска, која е на чело на Судечкиот совет, повторно му ја одреди истата пресуда на Поповски.

Поповски беше осуден на казна затвор од девет години на 22 мај лани, но Апелациониот суд ја укина пресудата и случајот го врати на повторно судење во Кривичниот суд.

Тој е обвинет дека злоупотребувајќи ја службената положба и овластување извршил набавка на 300 возила за МВР во периодот од 2008 до 2012 година и го оштетил буџетот на МВР за 453.570 евра.

Прв состанок на работната група за изработка на Концепцијата за инклузивно образование

Концепцијата треба да биде упатство за сите фази од спроведувањето на инклузивното образование во државава и да одговори на сите нејаснотии за кои ќе се дискутира.

Работната група што треба да ја изработи Концепцијата за инклузивно образование, која произлезе од новиот Закон за основно образование, денеска ја одржа првата работна средба. На неа присуствуваа и министерот за образование и наука Арбер Адеми и претставничката на Канцеларијата на УНИЦЕФ во земјава, Патриција ди Џовани, кои ја потенцираа важноста на инклузијата.

Концепцијата треба да биде упатство за сите фази од спроведувањето на инклузивното образование во државава и да одговори на сите нејаснотии за кои ќе се дискутира.

Законот за основно образование кој Собранието го изгласа во јули предвидува учениците со посебни потреби да се вклучат во редовното образование и од учебната 2022-2023 година посебните училишта повеќе да не запишуваат ученици. Тие  ќе прераснат во основни училишта со ресурсни центри, кои ќе помагаат за спроведување целосна инклузија во редовните училишта.

– Мислам дека направивме храбар чекор напред со донесување на Законот за основно образование, кој сега мора да се имплементира доследно и затоа е оваа работилница. Треба да развиеме концепција за инклузивно образование со која буквално секое дете ќе има придобивка од законското решение, изјави министерот Адеми пред почетокот на средбата на работната група.

Претставничката на УНИЦЕФ, Ди Џовани истакна дека се работи за исклучително важен сегмент, треба да почне да се применува донесениот закон кој, како што рече, е пресвртница во историјата на нашата земја.

– Она што сега треба да се направи е да се увериме дека секое дете ќе може да има корист од овој новодонесен закон. Ги охрабрувам сите учесници да размислуваат на кој начин сите деца во Северна Македонија ќе може да имаат бенефит од реализацијата на овој закон, додаде претставничката на УНИЦЕФ.

На работната средба учествуваа претставници на МОН и Бирото за развој на образованието, од факултетите за наставници, вклучително и од институтите за педагогија, психологија, специјална едукација и рехабилитација, претставници од НВО-секторот, наставници од редовните училишта, директори на специјални училишта, како и родители на деца со посебни потреби.

Образовните експерти се согласуваат дека по оваа крупна новина имале реакции и сомнежи дека тоа може да профункционира, но велат дека инклузијата никогаш нема да се случи ако некогаш не се почне да се работи на тоа прашање.

Тие нагласуваат дека е важно сите страни да се вклучат во доаѓањето до целта – секое дете да има квалитетно образование, посочувајќи дека инклузијата не се однесува само на деца со пречки во развојот, туку за сите деца кои во текот на школувањето наишле на каков било проблем,

Законот предвидува Концепцијата за инклузивно образование да биде изработена за шест месеци, така што работната група ќе има состаноци во наредните месеци, под водство на Бирото за развој на образованието.

Ќе се користат и позитивни меѓународни искуства што ќе бидат приспособени на потребите на нашето општество. На денешниот прв состанок на работната група учествуваа двајца странски експерти за образование – Филомена Периера од Португалија и Љиљана Симиќ од Србија.

Се подготвува ново законско решение за пазарџиите, лиценците ќе останат

 Ново законско решение се подготвува за работењето на пазарите. Владата, односно Министерството за економија работи на решение заедно со претставници на сите стопански комори.

Ова го најави министерот за економија Крешник Бектеши денеска на прес-конференција одговорајќи на новинарско прашање.

Според него, се одложува законското решение донесено оваа година.

– Тоа нема да опстои како решение предложено пред една година. Во меѓувреме разговараме со сите засегнати страни за да најдеме решение, изјави Бектеши, додавајќи дека остануваат на предлогот пазарџиите да поседуваат лиценца за работа.

Пазарџиите согласно постојното законско решение од јануари треба да поседуваат лиценца за работа која ја обезбедуваат едно здружение, а со новото, како што се најавува, лиценците ќе ги издаваат сите стопански комори. 

притисни ентер