Неделава беше изгласана резолуција за назначување на Кардин на таа должност.
Во меѓувреме, Менендес, сенатор од Њу Џерси кој падна во немилост, не ја признава вината и покренатата федерална тужба против него. Кардин, високорангиран сенатор од Мериленд познат по својата активност за заштита на човековите права, веќе по втор пат ќе го замени Менендес како раководител на комитетот.
Кардин раководеше со овој комитет од 2015 до 2018 година откако на Менендес му беа покренати обвиненија за корупција, што потоа судот ги отфрли.
Сенаторот Кардин, кој идната недела полни 80 години, објави дека нема да се номинира за резибор идната година.
Менендес минатата недела го ослободи местото претседател на комитетот, а според правилата на партијата затоа што се покренати обвиненија за кривично дело.
Во споредба со онаа во 2015 година, федералната тужба против него овојпат е многу посериозна (за мито обвинета е и неговата сопруга), и повеќе од половина од демократите во Сенатот повикаа тој да си поднесе оставка.
Кардин е автор на законот Магнитски, американски закон создаден во чест на адвокат од Русија кој беше измачуван до смрт од руските власти, а што предвидува санкции против нарушителите на човековите права во целиот свет.
Менендес е обвинет за незаконско лобирање во полза на Египет и примање мито од над милион долари.
Назначувањето на Кардин за претседател на комитетот сигнализира дека се можни промени во американските односи со Египет. Тој неодамна ја искритикува одлуката на Бајден овој месец да додели 235 милиони долари воена помош на Египет, земја која не е позната по почитување на човековите права.
-Ако сакаме да покажеме на светот дека почитувањето на човековите права е клучен аспект од интересите за национална безбедност на САД, треба да направиме уште повеќе таквите влади да се повикаат на одговорност, изјави Кардин по овој повод.
И други законодавци повикаа разгледување на одлуката на администрацијата за помош за Египет, во позадина на обвиненијата против Менендес.