Анкета: Повеќе од половина од верниците би поддржале признавање на македонската црква под ОА

 Верниците на Македонската Православна Црква–Охридска Архиепископија немаат никаква дилема дека МПЦ-ОА заслужува признавање на нејзината автокефалност од останатите православни цркви.

Повеќе од половината се подготвени да поддржат признавање на автокефалност на црквата под древното име Охридска Архиепископија наместо МПЦ-ОА.

Ова го покажува најновото истражување на јавното мислење во рамки на проектот „Република Северна Македонија како мултиконфесионално општество", што во континуитет го спроведуваат „Институтот за политички истражувања–Скопје" (ИПИС) и интернет порталот „Религија.мк", со финансиска поддршка на Фондацијата „Конрад Аденауер" (КАС).

На прашањето „Дали би поддржале признавање на автокефална црква под древното име Охридска Архиепископија наместо МПЦ-ОА?", 54.9 отсто од испитаниците одговориле позитивно, 29.5 проценти не се согласуваат со тоа, а 15.7 проценти од испитаниците се уште немаат став по ова прашање.

Речиси две третини, или 74.4 проценти од верниците на МПЦ-ОА, сметаат дека МПЦ-ОА треба да бара автокефалност во нејзиното признавање во православниот свет, додека пак 10.3 отсто испитаници се согласуваат со статус на автономна црква. Високи 88.1 проценти од верниците сметаат дека МПЦ-ОА треба да продолжи да бара признавање во православниот свет, бидејќи речиси едногласно е мислењето дека таа заслужува да биде прифатена во семејството на православните цркви.

-Кога станува збор за перцепцијата на граѓаните околу тоа која од православните цркви има пријателски, а која непријателски однос кај верниците мислењето е поделено. Освен што е највисок процентот на испитаници кои сметаат дека прво Руската црква, а потоа и Вселенската патријаршија имаат пријателски однос кон МПЦ-ОА, повисок е процентот на испитаници кои рекле дека Српската црква има пријателски однос, отколку што е тоа случајот со Грчката или Бугарската црква, иако спорот на МПЦ-ОА е пред се со СПЦ. Сепак, според одговорите најнегативна е перцепцијата кон Српската Црква. Во тој контекст и 33.4% од испитаниците оцениле дека причината за непризнавањето на МПЦ-ОА е „политичка, поради противење на СПЦ", покажува анализата на резултатите од истражувањето.

Иако православните верници сакаат признавање на автокефалноста и се подготвени за тоа да поддржат и прифаќање на древното име Охридска Архиепископија, сепак се уште не се подготвени да прифатат обединување со ПОА – црквата на Јован Вранишковски. Во случај ако Вселенската патријаршија тоа го побара, 54.1 проценти од испитаниците на такво нешто не се согласуваат, додека пак 18.4 проценти се согласни на обединување на двете цркви со цел издавање Томос за автокефалност.

Повеќето испитаници го гледаат праќањето писма до Вселенскиот патријарх од страна на највисоките претставници на извршната власт како позитивно, но голем дел од граѓаните сметаат дека овие писма нема да имаат некое влијание.

МПЦ-ОА и Архиепископот г. г. Стефан генерално уживаат висока доверба кај своите верници, која речиси е изедначена. Дека „имаат доверба" во архиепископот одговориле 40.8 отсто, а дека „донекаде имаат доверба" одговориле дополнителни 29 отсто од испитаниците, што е кумулативна доверба од околу 70% од верниците.

-Ова истражување направи обид и за мерење рејтинг на доверба и кај останатите владици на МПЦ-ОА, при што беше користен метод на двоен одговор. На прашањето „Кој од владиците на МПЦ-ОА најмногу го почитувате", испитаниците требаше да се изјаснат без притоа да им бидат прочитани имињата на владиците, а имаа право на два одговора. На прв одговор најмногу се изјасниле за Дебарско-кичевскиот Митрополит г. Тимотеј, потоа Повардарскиот митрополит г. Агатангел и за епископот Антаниски г. Партениј. На вториот одговор, најмногу од испитаниците се изјасниле за владиката Агатангел, потоа владиката Тимотеј и за владиката Партениј, велат спроведувачите на истражувањето.

Според нив, и ова истражување покажува висок процент на религиозност кај православните верници во поглед на декларативноста, но и во поглед на практикувањето на верата. На прашањето „дали постите" 24 отсто изјавиле „да често, според црковните обичаи", односно во согласност со верскиот календар, дополнителни 28 отсто од испитаниците кажале дека „да, понекогаш постат", 22 отсто постат „многу ретко" додека 26 отсто „не постат воопшто".

На прашањето „дали се причестуваат", процентите се во согласност со одговорите на претходното прашање, со оглед дека за да се причести во црква претходно треба да се пости, па така 18 отсто изјавиле дека „често се причестуваат" и дополнителни 23 отсто дека „се причестуваат понекогаш", 23% изјавиле дека „ретко се причестуваат", додека 36 отсто дека „не се причестуваат никогаш".

На прашањето „дали имате домашна слава", што е чест обичај кај македонските православни христијани, високи 70 проценти одговориле потврдно.

Истражувањето на јавното мислење, спроведено од „ИПИС", „Религија.мк" и Фондацијата „Конрад Аденауер", е направено во ноември 2020 година. Биле вклучени 1015 испитаници од православна вероисповед, со задржување на генералниот сооднос во поглед на базичните демографски карактеристики како пол, возраст, професија и образование. Маргиналната грешка е помеѓу +/-3.2% со 95% интервал на веродостојност.

Ова, е прво вакво специјализирано истражување, во кое учествувале само испитаници кои се декларирале како православни верници, и е насловено како „Перцепции за позицијата на Македонската Православна Црква – Охридска Архиепископија – доверба на верниците, релации со државата, патот до автокефалност"./МИА

Во Египет се откриени најстарите саркофази и досега изгубен храм (ВИДЕО)

Египетските археолози откриле изгубен погребен храм во областа Сакара со најстари саркофази некогаш пронајдени на тие древни гробишта.

Египтологот Захи Хавас и неговите колеги го ископале погребниот храм на кралицата Неарит, една од сопругите на кралот Тетис, првиот фараон на Шестата египетска династија. Откриле и 52 гробни места со повеќе од 50 дрвени саркофази. Овие дрвени ковчези се стари околу 3000 години и се најстарите саркофази пронајдени во Сакара.

"Овие се дрвени ковчези. Тие прикажуваат многу богови на кои што им се поклонувале во тоа време, заедно со разни упатства од Книгата на мртвите за кои се сметало дека им служи на мртвите за да го пронајдат вистинскиот пат кон другиот свет", се вели во соопштението на египетското министерство за туризам и антиквитети.

Археолозите пронашле стотици ковчези на разни високи функционери и свештеници во Сакара во изминатите неколку месеци, кои датираат од доцниот период на древен Египет и периодот на Птоломеидите, пишува ABC News.

Во најновото ископување биле пронајдени постари саркофази од периодот на Новото египетско кралство што траело од 16 век п.н.е. до 11 век п.н.е.

„Ова откритие потврди дека Сакара се користела како некропола и за време на Новото Кралство“, се вели во соопштението на Министерството.

Експертите пронашле уште едно светилиште направено од тули од кал на длабочина од 24 метри. Хавас вели дека работата ќе продолжи се додека не се достигне гробната комора.

„На гробните места, пронајдовме голем број археолошки артефакти и статуи што ги претставуваат боговите како Озирис и Птах-Сокар-Озирис“, додаде Министерството.

Сакара се наоѓа на околу 25 километри јужно од пирамидите на платото во Гиза, и таму е познатата скалестата пирамида на фараонот Џозер, прва од фараонската ера. Додека Мемфис бил главен град на древен Египет, Сакара служела како негова некропола.

Египќаните ги закопувале своите мртви пред 3000 години. Но, таму биле погребани не само благородниците, туку и граѓаните од средната и работничката класа.

Влада: Пензиите повисоки во просек за 185 денари, ќе се исплаќаат од 26 јануари

Владата на денешната седница ја разгледа и усвои Информацијата за исплата на пензии за месец јануари 2021 година

Согласно законското усогласување што се врши според движењето на индексот на трошоците на животот, пензиите бидат повисоки и тоа најниските пензии за 134 денари, а просечната пензија ќе биде повисока за 185 денари и со нив ќе можат да располагаат преку мрежата на банкомати и во трговската мрежа од 26.01.2021 година.

– Пензиите за граѓаните кои не користат картички ќе бидат исплатени во четири групи според следниот распоред согласно висината на пензијата: За пензии со висина до 11.000 денари, исплата да се изврши на 26.01.2021 година (вторник), за пензии со висина 11.001 – 14.000 денари, исплата да се изврши на 27.01.2021 година (среда), за пензии со висина 14.001 – 18.000 денари, исплата да се изврши на 28.01.2021 година (четврток), и за пензии со висина над 18.001 денари, исплата да се изврши на 29.01.2021 година (петок), соопштија од владината прес – служба.

Даниловски: За два месеца треба да имаме колективен имунитет

Во моментов имаме стагнација на кривата на заразени, но сепак нови поголеми пикови од продолжувањето на работното време на угостителските објекти не би требало да има, вели професор д-р Драган Даниловски.

Според него, за два месеца треба да имаме колективен имунитет на населението добиено по природен пат, но сепак, вакцините се добредојдени за намалување на смртноста. Според епидемиологот Даниловски нема простор за паника од новиот британски сој на вирусот....

Даниловски вели дека не се очекува, но може да има благи пикови поради продолженото работно време на кафеаните. Тој најавува дека за 100 дена би требало да го достигнеме прагот на природен колективен имунитет, но сепак со вакцината ќе се намали смртноста.

Доктор Даниловски вели дека во последните недели нема регистрирано нови мутации на коронавирусот и дека нема простор за паника од новиот британски мутиран сој на вирусот.

Со доктор Даниловски разговараше Сања Трајковска Ставров.

притисни ентер