По неколкуте експлицитни најави дека ќе следуваат мерки за корумпираните политичари, американската амбасадорка во земјава Анџела Агелер објави дека веќе почнале со конкретни проверки.
„Тимот за санкции од Вашингтон е тука за поагресивен поглед на минатите и сегашните корумпирани актери и да ги разгледа сите можни одговори. На правосудниот сектор во Македонија му требаат повеќе истраги, гонење, за да се покаже дека никој не е над законот“. – напиша Агелер на твитер.
Овој чекор треба да ги загрижи политичарите кои се, биле или планираат да влезат во криминал и корупција, оценува аналитичарот Петар Арсовски, кој смета дека овој тим од Вашингтон прави сериозна анализа и е во директна координација со американската администрација.
-Во принцип треба да се плашат сите оние кои биле вклучени во некакви коруптивни зделки. Мислам дека граѓаните, судејќи по последните анкети ќе се радуваат бидејќи еден од главните проблеми кои ги критикуваат во недостаток на напредокот на Македонија, е баш таквата ендемска корупција. Ова е еден од посесриозните чекори кои сме ги виделе, особено директен чекор од американската администрација што можеби навестува некаква поексплицитна борба со корупцијата, барем од нивна страна. – изјави Петар Арсовски, политички аналитичар.
Дека борбата со корупцијата ќе биде приоритет на Вашингтон, Агелер потенцираше уште пред да пристигне во дипломатската мисија во земјава. Мандатот го почна со пораките дека неказнивоста во Македонија мора да заврши, корупцијата е канцер кој го кочи напредокот на државата, а придонесува и за масовно иселување на младите.
На изненадување на многумина, таа директно го критикуваше и именувањето на Ислам Абази за шеф на обвинителството за организиран криминал, со порака дека САД се збунети од неговиот избор, особено поради потрошените милиони долари за обуки на обвинителите..
Дека ќе има проширување на црната листа со корумпираните на одговорни функции од земјите на Западен Балкан, пред неколку денови најави и специјалниот претстваник на Стејт Департментот, Ескобар.
-Штом луѓето го знаат тоа, лидерите треба да преземат акција да ги отстранат овие луѓе од одговорни позиции. Треба да ги тргнат тие луѓе од партиските списоци. И ова важи за сите држави во регионот“, „Корупцијата е најголем проблем за регионот. Многу е јасно дека сите партии кои се најнационалистички партии во регионот се и најкорумпирани. И тоа е факт., изјави Габриел Ескобар, заменик-помошник државен секретар на САД.
Можноста на црната американска листа да се ставаат и корумпираните се отвори откако Бајден лани го потпиша актот познат како Магницки. Досега од земјава по тој основ на листата се најдоа поранешниот премиер Никола Груевски и екс директорот на УБК Сашо Мијалков.