Обвинителството побара и доби четири ефективни и шест куќни притвори, како и осум мерки на претпазливост за 19-те новоосомничени во истрагата за трагичниот пожар во кочанската дискотека Пулс, додека амбасадорот во Норвешка Кучи се уште е надвор од земјата. Според информации на Канал 5, побаран е притвор за екс директорот на ДЗС, Шабан Салиу, а за поранешниот министер за економија Ваљон Сарачини домашен.
Јавниот обвинител Љупчо Коцевски не прецизираше кој од осомничените каква мерка добил. Потврди дека станува збор за 2ца екс и еден актуелен директор на ДСЗ, 3-ца екс-министри за економија, а меѓу новоосомничените се градежни и пазарни инспектори, државни секретари и повеќе службеници. Со ова, осомничени се сите екс-министри за економија од 2012 година, со исклучок на актуелниот Бесар Дурмиши, а Коцевски образложи зошто.
Осомничени се и сите директори на ДЗС од 2012та година, бидејки како што вели Коцевски истрагата до сега покажала дека и сегашната и претходните раководни структури целосно ги запоставиле своите надлежности. Вели тие не вршеле контроли, надзори и проценка на ризик, не само во Пулс, туку во дискотеките низ целата држава. Низа пропусти биле утврдени и во работата на локалната самоуправа. Во однос на раководството на ДПИ, Коцевски информираше дека проверките за 2-цата осомничени екс директори продолжуваат, а за актуелниот не постоел законски основ за гонење.
Наведувајки примери од слични трагични пожари во клубови во Романија, САД и Бразил, чии законски норми ги зеле во предвид при истрагата , Коцевски ја образложи и временската рамка по која се води обвинителството. Тој објаснува дека освен оние кои имаат диреткна вина, се сомничат и оние лица чија серија на пропусти од отворањето на дискотеката па се до пожарот, довеле до тоа дискотеката да работи и да се случи катастрофата. Министерот за внатрешни работи Панче Тошковски вели секој кој се огрешил ќе одговара и порача дека истрагата не треба да биде место за политички препукувања.
За пожарот во Кочани во моментов се осомничени 45 физички и 3 правни лица. Коцевски информираше дека до сега се собрани 1000ци материјални докази, а истрагата е се уште во тек. Нагласи дека таа треба да заврши за 2 месеци.