Сепак, одбележувањето на 117 години од неговата смрт повторно доаѓа во чувствително време во односите со Бугарија и жестоката полемика која изминатиот период се води на релација Софија - Скопје околу идентитетот на револуционерот.

По повод годишнината од смртта на Делчев, премиерот Спасовски на социјалната мрежа Фејсбук порача дека тој е лик кој сплотува и обединува, не само во Македонија, туку и пошироко, а Делчев го нарече патоказ кон иднината. Лидерот на СДСМ пак Зоран Заев, револуционерот го нарече обединувачки симбол на македонската независност, а неговото чествување според него, треба да ги обединува сите.

Чествувањето на Гоце Делчев треба да обединува исто како што обединуваше Гоце Делчев како водач на македонското револуционерно дело. Ние денес, се поклонуваме пред моштите на Гоце Делчев во црквата Св. Спас, каде што беа свечено пренесени од Софија, откако неговите другари оставија аманет до следните поколенија „светите мошти да бидат погребани во главниот град на независна Македонија“.- Зоран Заев – Претседател на СДСМ

Лидерот на опозициската ВМРО-ДПМНЕ пак Христијан Мицкоски кој оддаде почит пред гробот на Делчев порача дека доколку Македонија се фокусира на европските процеси, официјален Брисел ќе ги осуди бугарските барања и позиции.

Традиционално и годинава на гробот на Делчев положија цвеќиња повеќе делегации од државно-политичкиот врв, а освен од претседателскиот кабинет, на гробот се поклонија и министрите Шеќеринска и Адеми кои беа дочекани со свирежи и скандирања од група на навивачи.

Гоце Делчев е роден на 4 февруари 1872 година во Кукуш, во семејството на Султана и Никола. Образованието го завршил во Солун и Софија, а учителствувал во Штип. Како член на ТМОРО работел на создавање мрежа на бази, комитети и комитски чети на организацијата. Делчев е убиен од Османлиската војска на денешен ден во 1903 година во селото Баница. Неговите посмртни останки најпрво се чувале во Баница, а потоа во Софија од каде во 1946 година биле пренесени во црквата „Св. Спас“ во Скопје.