Паметно вложувајте пари во облека што трае – Овие безвременски класични парчиња мора да ги имате - Канал 5

Магазин

Паметно вложувајте пари во облека што трае – Овие безвременски класични парчиња мора да ги имате

Денес, кога модните трендови се менуваат со брзина на светлина, некои парчиња облека остануваат вечен симбол на стил и елеганција.

Паметно вложувајте пари во облека што трае – Овие безвременски класични парчиња мора да ги имате

Вложувањето во парчиња класична гардероба е основа за штедење пари и решавање на дилемата „што да облечам“. Класичната гардероба е доказ дека вистинската елеганција е во едноставноста, а паметното купување е најисплатливо долгорочно.

Бела кошула

Ова сестрано парче изработено од квалитетен памук или лен ги надминува сите стилови и сезони. Со завратени ракави на фармерки, делува лежерно и шик, додека под сако или џемпер дава нота на префинетост.

И белата памучна маичка исто така се комбинира со сè.

Едноставен црн фустан

Тој е моден спас во последен момент и решение за секоја прилика, од деловен состанок во комбинација со нежни балетанки, до вечерно излегување со впечатлив накит и високи потпетици.

Класичен мантил

Идеален за преодни сезони, ѝ дава елеганција на секоја комбинација, без оглед дали го носите врз деловен костум или лежерен спортски аутфит со патики. Неговиот крој и ремен што го нагласува струкот одговараат на секоја фигура.

Квалитетни фармерки

Побарајте од оние со цврст памук и минимум еластин. Одлично одговараат и во комбинациите за работа и оние за слободно време.

Црно сако

Сакото на секоја комбинација на облека ѝ дава доза на елеганција, лесно се усогласува и во деловните и во лежерните варијанти. Клучно е совршено да одговара во рамената.

Маичка со пруги

Морнарските пруги, обично темно сините на бела позадина, се сметаат за неутрален дезен кој дава впечаток на лежерна париска елеганција. Ваквата маичка е идеална за под сако, мантил или кожена јакна, правејќи ја секоја комбинација визуелно интересна.

Кожна јакна

Без разлика дали станува збор за класичен „бајкерски“ модел или поелегантна, минималистичка верзија, нејзина најголема вредност е во тоа што со годините станува сè подобра. Може да се носи подеднакво добро и со женствен цветен фустан и со едноставни комбинации.

Класични панталони

Панталоните по мерка се секогаш безбеден избор, а разновидноста на кроеви, бои и материјали ви овозможува да ги прилагодите на вашиот вкус и пригода.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Невреме направи пустош на Крит- се урна мост, има повредени (ВИДЕО)

Силно невреме што ја погоди јужна Грција предизвика широко распространети поплави на Крит, при што две лица беа повредени кога се урна мост додека го преминувале во регионот Ретимно, соопштија локалните власти.

Невреме направи пустош на Крит- се урна мост, има повредени (ВИДЕО)

Повредениот пар патувал со автомобил преку мост во Ливадија, планинско село околу 40 километри југозападно од Ираклион, кога ненадејните поплави оштетија дел од структурата, објави Екатимерини.

Двајцата се однесени во болница на лекување, но нивната состојба сè уште не е позната. Бурата предизвика и прекин на електричната енергија, оставајќи ги Зонија, Ливадија и Аноигеја без струја.

Обилните дождови во планинскиот регион Милопотамос ги принудија властите да ги затворат сите училишта и градинки. Училиштата се затворени и во Ханија и Ретимно.

Градоначалникот Јоргос Кладос побара од министерот за климатски кризи и цивилна заштита, Евангелос Турнас, да прогласи вонредна состојба во општина Милопотамос поради обилните дождови што го погодија регионот, предизвикувајќи сериозни проблеми, главно во планинските села.

Во Зонијана, автомобили беа однесени од поројните дождови, според извештаите. Слична ситуација беше пријавена и во Ливадија, а патиштата низ Крит претрпеа големи штети.

Рано наутро беше упатен итен апел до граѓаните да ги ограничат своите движења и да ги избегнуваат областите околу Зониана, Ливадија и Милопотамос.

Фериботските услуги од атинските пристаништа Рафина и Лаврио се прекинати, а се очекува пристанишните власти подоцна во текот на денот да издадат ажурирање дали заминувањата можат да продолжат од пладне па натаму.

Националната метеоролошка служба (EMY) прогнозира нестабилно време во јужна Грција, особено на Крит, до недела, со силни ветрови во Егејското Море.

Тагови: Крит мост

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Забава

Сидни Свини сподели разголени снимки од одморот (ФОТО)

Врската помеѓу актерката Сидни Свини и музичкиот менаџер Скутер Браун се чини дека станува посериозна, а двојката повеќе не се обидува да ја крие својата љубов. 

Сидни Свини сподели разголени снимки од одморот (ФОТО)

Свини објави серија фотографии на социјалните мрежи во среда од одморот што го помина со Браун и пријателите.

Одмор на плажа

На една од фотографиите, 29-годишната ѕвезда од серијата „Еуфорија“ позира во црвен костим за капење сличен на оние што ги носат ѕвездите од серијата „Спасување“. На друга фотографија, Браун ја држи Свини во раце, без маица. Другите објави го прикажуваат двојката и нивните пријатели како скијаат на џет-ски, планинарат, танцуваат и гледаат огномет. „Кога твојот маж ќе те однесе до ѕвездите“, напиша Свини во описот на фотографијата.

Една година заедно

Двојката е заедно околу една година, а се запознаа на свадбата на Џеф Безос и Лорен Санчез. Свини покажа и дека нивната врска станува сериозна со неодамнешните промотивни фотографии за нејзината линија долна облека. На нив, таа носи златен ѓердан со два привезоци на кои се напишани иницијалите „S“ и „B“, кои се однесуваат на неа и 40-годишниот Браун.

Откако почнаа да се забавуваат минатата година, извор близок до двојката рече дека тие „се обидуваат да ја држат својата врска подалеку од очите на јавноста, но во исто време уживаат во времето поминато заедно“. Истиот извор додаде: „Тие не сакаат ништо да форсираат и само уживаат во времето поминато заедно“.

Минатиот декември имаше тврдења дека Свини и Браун се зближуваат. „Скутер и Сидни се во одлични односи. Нивната врска е стабилна и сериозна“, рече извор во тоа време.

Тагови: Сидни Свини

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Димитровски: Советничките прашања се инструмент за транспарентност на Советот

„Од формирањето на овој состав, правото да се практикува инструментот советнички прашања, како еден од принципите на транспарентност при управувањето е добро поставен и немам намера да дозволам, под разни притисоци овој инструмент да биде исклучен.“

Димитровски: Советничките прашања се инструмент за транспарентност на Советот

„Од формирањето на овој состав, правото да се практикува инструментот советнички прашања, како еден од принципите на транспарентност при управувањето е добро поставен и немам намера да дозволам, под разни притисоци овој инструмент да биде исклучен и со работата на Советот да биде скриен. Секој советник си носи одговорност пред јавноста за своето однесување и за своите дискусии и за своето молчење и можеби најважно од се, секој советник си носи одговорност за одлуките кои ги поддржува“, истакна Даме Димитровски претседател на Совет на Град Скопје на денешната седница.

Димитровски посочи дека седниците на Советот мора да бидат транспарентни со тоа што, правото за поставување прашања од страна на советниците не смее да се одземе ниту пак да се ограничи правото на градоначалникот да даде одговор на поставените прашања.

„Ние не можеме да дозволиме да не бидат седниците на Советот транспарентни и мора да бидеме одговорни за своите постапки. Најпрво, не смееме да им го одземеме правото на советниците да поставуваат прашање и второ не смееме да му го ограничиме правото на градоначалникот да даде одговор на поставеното прашање“, рече Димитровски, се наведува во соопштението на ВМРО-ДПМНЕ..

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер