Голем број истакнати бугарски историчари не размислуваат како историчарите во заедничката комисија утврдена со Договорот за добрососедство, вели универзитетскиот професор Михаил Иванов, кој е еден од потписниците на писмото поддржано од голем број истакнати бугарски интелектуалци контра содржината на меморандумот на Софија испратен до земјите членки, во однос на историјата и јазикот.
Иванов кој бил советник на поранешниот претседател Жељу Желев во изјава за бугарското национално радио ја критикува визијата на историчарите од комисијата и како што вели нивниот обид таа да се наметне како политичка позиција
-Во меморандумот за објаснување, кој беше пренесен главно преку странски медиуми, се вели дека Македонија мора да се раздели со тоталитарното минато на Југославија. Но, исто така, мора и ние да се разделиме со нашето тоталитарно минато, со нашиот начин на размислување. Треба да се направи детална анализа на ситуацијата. Не би сакал тоа што се прави да биде на штета на бугарскиот дух, култура и меморија
Инаку, односите Скопје-Софија одново се на тест по последната средба на министерот Османи и резервата на премиерот Заев дека во декември може да не се одржи пристапната конференција, што е во фокусот и на медиумските анализи во Софија.
Министерката Шеќеринска денеска изјави дека договорот со Бугарија не беше само за решавање на проблемите туку и за градење на доверба и на добрососедски односи
-Вложуваме во добрососедските односи, очекуваме тоа да го направи и бугаријадефинитивно одлуките што ќе се носат до крајот на годината ќе влијаат позитивно или негативно на тие односи и тоа нема да бидат само нашите билатерални односи, туку ќе влијаат на регионот. Очекуваме токму државите што ги отвораа вратите, сега да ја покажат истата волја, интерес и желба да помогнат регионот да тргне напред, рече министерката Радмила Шекеринска.
Евентуалното вето за Македонија би било спротивно на декларираната поддршка на Софија за евроинтегрирањето на западен Балкан.
Бугарскиот премиер Борисов неодамна во телефонскиот разговор со премиерот Заев беше дециден дека Софија нема да го блокира почетокот на преговорите, а дека двајцата премиери ги охрабруваат историчарите да ги затворат отворените прашања. Заев викендов оцени дека предлозите на Захариева до Османи не биле ниту европски, ниту добросооседски, но беше уверен дека сепак со Борисов ќе дојдат до решение..
Посетата на Заев се очекува да се одржи пред 10 ноември, кога во Софија, Македонија и Бугарија заеднички ке претседаваат со Берлинскиот процес, под покровителство на Берлин.