Ајде да ги ставиме фактите на маса.

За 35 години независност ВМРО беше на власт речиси половина од тоа време - од Георгиевски, преку Никола Груевски и неговите 11 години, до Мицкоски денес.

И во тие години се земаа кредити. И во тие години се создаваа обврски.

Сега Мицкоски и неговата Влада за само две години направија околу 4 милијарди евра нов долг.

Тоа е темпо што никој во историјата на независна Македонија не го постигнал.

Организираната банда зборува за „наследени долгови“, а истовремено нејзината Влада продолжува да се задолжува секоја недела, касата е празна, а парите завршуваат во криминални партиски тендери.

Да земаа кредити за да се отплатата долгови, вкупниот долг ќе се намалуваше, немаше да се зголемува.

А Мицкоски го зголемува на 4 милијарди евра.

Разликата е јасна:

• 8 милијарди евра на сите Влади за 35 години.

• 4 милијарди евра за само две години и тоа без резултати за граѓаните.

Статистиката и процентите од БДП не ги полнат фрижидерите.

Граѓаните најдобро ја гледаат вистината во своите паричници и во сметките што треба да ги плаќаат нивните деца и внуци.

Оваа организирана криминална група нема граници - ниту во задолжувањето, ниту во лагите.

СДСМ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Токму затоа денес сакам директно да се обратам кон моите битолчани кои пред 10 месеци избраа континуитет препознавајќи ги промените и четиригодишниот напредок на својот град низ нашата заедничка соработка и партнерство градејќи ја иднината на Битола. Денес кога правиме сублимат на сработеното во првата година од овој мандат, сумирајќи ги резултатите на нашиот заеднички труд на граѓаните на Битола, мој и на моите соработници од локалната самоуправа, можам да кажам дека и покрај сложените проблеми на теренот што за некои делови од градот значат инфраструктура недопрена со децении, а некаде никогаш вистински решени проблеми, чекор по чекор ја остваруваме визијата за поубав и инфраструктурно поуреден град, спортски активна и успешна младина и културен подем достоен за Битола. Од нумерички аспект тоа значи најголем број одобрени проекти од владата на државно ниво или вкупно 81 проект од двата владини повици од унгарскиот кредит. Над 10км обновена и новоизградена патна инфраструктура во урбаниот и руралниот дел на нашата општина. Инвестиции во водоводната и канализационата мрежа во должина од над 3 километри, реконструкција и изградба на 24 спортски училишни терени и четири типски спортски сали, 220 нови паркинг места на некогашните узурпирани градски простори или како дел од новоизградените улици.

Понатаму, изграден простор за згрижување на 475 деца преку адаптација на новата градинка Пчеличка која ја отворивме во домот за доенчиња и мали деца и каде се згрижени 76 деца. Градинката во Нова Битола која ќе згрижува 153 деца очекувам да започне со работа до крајот на годинава и интензивна работа на градинката во комплексот АРМ каде идната година листата на чекање ќе биде намалена за уште 246 деца. Покрај сите предизвици со кои се соочуваме како од демографска така и од инфраструктурна природа продолжуваме да инвестираме за нашата иднина. Младата популација според констатираните потреби на населението и слушнатиот глас низ секојдневните средби со нашите сограѓани. Затоа работиме и на проектот којшто го ветивме за изградба на училиште во населбата Буковски ливади со комплетна опременост соодветна за воспитно-образовната институција за што инвестираме над 31 милион денари. Ја продолжуваме реконструкцијата на Центарот за спорт и рекреативни активности, поранешната боксерска сала.

Проект поддржан од Владата во вредност од над 40 милиони денари, со што ќе добиеме прекрасна спортска сала над 1000 метри квадратни за да можат нашите боксери кои нижат успеси да добијат адекватни услови за спортување. А тука создаваме можност и за тие кои се занимаваат со авантуристички спортови.

Во спортската инфраструктура покрај во терените и објектите на образованието, образовните институции инвестираме и подготвуваме проектна документација и за други локации. Во соработка со Фудбалската федерација на Македонија ќе следува целосна реконструкција на ќумурното игралиште, а ќе се гради и нов спортски терен помеѓу него и спортската сала Боро Чурлевски. Професионалните спортски клубови продолжуваат да бидат наша гордост и да ја имаат општинската поддршка и кога постигнуваат победи и високи резултати, но и кога се соочуваат со пораз, затоа што само на тој начин се поттикнува спортскиот дух кај играчите, се зголемува поддршката и довербата од нашите ценети навивачи, а за идните млади спортисти се отвараат спортски перспективи и можности преку напредок и развој на младинските школи и училишниот спорт. Ако претходниот мандат бевме локална самоуправа која за првпат во Битола изгради вело инфраструктура во должина од над 5 километри, веќе работиме на подготовки за нови 2,7км велопатеки. Киното Партизан е уште еден објект од културата за кој е обезбедена инвестиција од 96 милиони денари за изградба на мултинаменски објект кој ќе биде самоододржлив и ќе може да се користи за кино и театар, но и за изложби и други мултимедијални настани.

Битола повторно станува град во кој културата блеска во најсилно светло. Во изминативе 10 месеци имавме над 100,000 посетители на нашите манифестации. За овој културен раст општината преку програмата за култура обезбедува околу 45 милиони денари, што е седум пати помалку од 310 милиони денари за спортската инфраструктура, но доволно за битолската култура далеку да се слушне, а сите посетители на настаните за убавите впечатоци долго да зборуваат.

Додека го издигнуваме нивото на интегритет, антикорупција и транспарентност, наш активен партнер во многу процеси се младинските организации, младинскиот совет, младинскиот центар, невладиниот сектор, бизнис секторот, жените претприемачи и сите граѓани.

За ранливите категории, Општина Битола преку програмата за социјална заштита за 2026 година обезбедува вкупно 14 милиони 600 илјади денари. Меѓу нив се издвојуваат 1 милион и 500 илјади денари за поддршка на лицата со ретки болести за нивните патни трошоци и други потреби, како и дополнителни средства за обезбедување услуги за рехабилитација и стручна поддршка за лицата со попреченост, вклучително логопедски, дефектолошки, психолошки и психосоцијални третмани, како и рехабилитација и други третмани за децата со попреченост. Дополнително, предвидени се 500,000 денари за адаптација на домови за лица со попреченост со цел подобрување на пристапноста и условите за самостојно живеење. Партнерски

дејствуваме во реализација на проекти од европски и други фондови, а посебен акцент ставаме и на енергетската ефикасност на објектите во наша надлежност. Еден од капиталните проекти на оваа локална самоуправа е и противпожарната зграда во поранешната касарна, која ќе биде објект кој ги задоволува сите стандарди за ефикасна интервенција.

Општината инвестираше над 52 милиони денари на парцела од 3300 квадратни метри со корисна површина од 1600 метри квадратни до фаза на карабина со поставена дограма. Втората фаза преку грант на Министерството за одбрана на САД опфаќа дел од архитектурата со која објектот ќе биде целосно адаптиран и енергетски ефикасен со намена за својата дејност.

Вредноста на договорот за грантот е во висина од околу 1 милион американски долари. Со сите споменати инвестиции, Битола заслужува да биде град кој ќе ве пречека најавувајќи ги придобивките од се претходно споменато, кои ве очекуваат како гостин или жител на нашиот град.

Ваквата наша интенција е препознаена и од владата со чија поддршка инвестираме и во изградба на булеварскиот влез како што одамна и беше потребен на Битола.

Ова не е дневна политика и популизам, туку континуирана и стратешка заложба на тим со јасна цел и визија, силна мотивираност и посветеност, насоченост, работа на проектна документација и работа на терен.

Предизвици за град како Битола има уште многу создадени од различни фактори. Дел од аспект на старото автентично градско јадро, дел гледани како резултат на стариот генерален урбанистички план непроменет повеќе од 25 години, а дел настанати како последица на повеќегодишното неинвестирање во градот.

Нив не ги решаваат скечеви, герила акции или желба да се придобие довербата на граѓаните.

Решението е во конкретни проекти и многу работа. Денес додека Битола се подготвува за големиот фестивал Браќа Манаки, а градежната механизација е постојано на терен и кога нашата држава одбележува 35 години независна Македонија со манифестации низ градовите, честитајќи го овој значаен јубилеј, посакувам заедно низ конструктивност, идеи, инвентивност, достојно да си ја честитаме независноста, градејќи поубаво место за живеење на сите наши граѓани.

Тони Коњановски, градоначалник на општина Битола

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Министерството за земјоделство, шумарство и водостопанство подготви мерки и одлуки кои се насочени кон интензивирање на откупот на винското грозје од сортата вранец, заштита на сточниот фонд, олеснување на субвенциите и проверка на почитувањето на законските правила на пазарот. Мерките се утврдени врз основа на сознанијата од терен, официјалните податоци и анализата на расположливите институционални механизми, соопшти министерот за земјоделство, шумарство и водостопанство, Борче Серафимовски на денешната прес-конференција.

„Во изминатиот период бев во постојана и непосредна комуникација со земјоделците, сточарите, откупувачите и преработувачите. Разговаравме за состојбите во производството, динамиката на откупот и неизвесноста што ја создава пласманот на дел од земјоделските производи. Одговорите што ги подготвивме произлегуваат од реалните состојби и се насочени кон конкретните потреби на производителите“, образложи министерот Серафимовски.

За интензивирање на откупот на винското грозје, тој најави дека на следната седница на Владата ќе биде предложена измена Одлуката за условите за користење на средствата од компензационите фондови. Кредитната линија што се реализира преку Развојната банка изнесува 793,48 милиони денари, односно околу 12,9 милиони евра. Од нив, 553,48 милиони денари се наменети за откуп на винско грозје од сортата вранец, а 240 милиони денари за откуп на оризова арпа.

„На барање на винарските визби, ќе ги олесниме условите за користење на средствата наменети за откуп на вранецот. Грејс-периодот ќе го зголемиме од три на 18 месеци, по што ќе следуваат дополнителни 18 месеци за отплата, со фиксна годишна каматна стапка од еден процент. Како заложно обезбедување ќе може да се користи и произведеното вино“, прецизира министерот Серафимовски, додавајќи дека со овие измени треба да се подобри ликвидноста на винарските визби и да се зголеми нивниот капацитет за преземање на грозјето во период кога бербата се очекува дополнително да се интензивира.

На прес-конференцијата беа соопштени и последните податоци за состојбата со сипаниците кај овците. Болеста е потврдена во 64 жаришта - 50 во Источниот, седум во Североисточниот, шест во Вардарскиот и едно во Скопскиот регион.

„Апелирам до сточарите доследно да ги почитуваат институционалните превентивни препораки, веднаш да ги пријавуваат сомнителните случаи и да не користат заедничка опрема меѓу стадата без целосна дезинфекција. Еден од главните утврдени ризици за пренесување на заразата е стрижењето со ножици што претходно не биле дезинфицирани“, апелираше министерот Серафимовски.

Во меѓувреме, преземени се активности за обезбедување вакцини преку Европската комисија, Република Турција и ФАО. Министерот укажа дека нивното обезбедување нема да значи автоматско започнување со вакцинација.

„Одлуката за евентуална вакцинација ќе се темели исклучиво на стручна проценка на епидемиолошката состојба, степенот на ризик и можните ветеринарно-здравствени и економски последици“, образложи министерот Серафимовски.

Во делот на субвенциите, во изминатиот период се исплатени вкупно 948,78 милиони денари, односно околу 15,4 милиони евра, на 30.389 корисници. Притоа, тој најави дека исплатата ќе продолжи и по другите мерки, а паралелно се подготвува олеснување на условите за остварување на правото на субвенции.

„Неповолните временски услови и ограничените можности за пласман доведоа дел од производителите објективно да не можат да го исполнат условот за најмалку 30 проценти продадено или предадено производство. На следната седница на Владата ќе предложиме укинување на овој услов за производителите во лозарството, овоштарството и поледелството“, најави министерот Серафимовски.

Осврнувајќи се на состојбите со откупот на пиперката, оризовата арпа, вранецот и другите земјоделски производи, министерот соопшти дека Министерството мобилизира дополнителни системски капацитети за проверка на пазарните практики. Покрај редовните контроли на Државниот инспекторат за земјоделство, во текот на оваа работна недела Министерството за земјоделство, шумарство и водостопанство ќе достави образложена иницијатива до Комисијата за заштита на конкуренцијата.

„Состојбите нема да ги разгледуваме само преку поединечните контроли на откупните пунктови, туку и низ целокупната структура и функционирањето на пазарот. Од Комисијата ќе побараме да утврди дали постојат индиции за недозволено усогласување меѓу откупувачите, злоупотреба на пазарна моќ или примена на нефер трговски практики кон производителите“, рече министерот Серафимовски, притоа појаснувајќи дека Комисијата ќе оцени дали постои основа за постапување согласно Законот за заштита на конкуренцијата и Законот за забрана на нефер трговски практики во синџирот на снабдување со земјоделски и прехранбени производи.

Министерот уверува дека однапред нема да се прогласува одговорност, но нема да се остави неискористен ниту еден финансиски, инспекциски или законски механизам за фактите да бидат независно и стручно проверени.

„Пазарните услови не смеат да бидат оправдување за непочитување на договорите, нетранспарентна класификација или префрлање на целиот ризик врз земјоделците. Кога се работи за нивниот труд и приход, институциите мора да постапуваат навремено, координирано и одлучно“, порача министерот за земјоделство, шумарство и водостопанство, Борче Серафимовски.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.