Портпаролката на „Audi“ денеска потврди дека сите возила на компанијата кои пристигнале во САД засега треба да се чуваат на местото на испорака и не треба да им се предаваат на дилерите.
Трговците на мало во Америка треба да се фокусираат на намалување на нивните сегашни залихи, кои се доволни за околу два месеци, пишува „Spiegel“.
„Audi“ моментално има повеќе од 37.000 автомобили на залиха во САД кои не подлежат на новите тарифи и можат да се продаваат по старите цени, додаде портпаролката.
„Audi“ нема сопствен производствен капацитет во САД, а неговите возила за американскиот пазар се произведуваат во Мексико, Германија, Унгарија и Словачка.
Матичната компанија на „Audi“, „Volkswagen“, исто така ги предупреди своите дилери во САД и најави дополнителни трошоци, објави „Wall Street Journal“ минатата недела.
Администрацијата на Трамп воведе царини од 25 отсто за сите автомобили произведени надвор од САД, а од мај новите давачки ќе важат и за 150 категории на автоделови.
Извор: Б92