Македонија

„Алкалоид“ со донација за студентските и училишните домови во Скопје

И покрај сите предизвици кои ги постави почетокот на новата учебна година, 1 октомври го означува стартот на едно ново поглавје во македонското образование.

Покрај училиштата, со работа ќе започнат и студентските и училишните домови, кои како установи од јавен интерес обезбедуваат сместување за околу 12.000 студенти на територијата на градот Скопје. Заради капацитативната специфика во услови на пандемија, овие установи ќе имаат посебни протоколи за нивното функционирање што ќе подразбира високо ниво на хигиена и честа дезинфекција. За таа цел, „Алкалоид АД Скопје“ донираше производи од својата палета антисептички и дезинфекциски средства.

„Донацијата на средства за дезинфекција од компанијата ‘Алкалоид’ не само што ќе го заштити здравјето на учениците, студентите и вработените туку и ќе го олесни спроведувањето на протоколите. Се надевам дека истите ќе се сфатат сериозно и ќе се почитуваат бидејќи тоа е единствениот начин да ја надминеме оваа состојба и да ги заштитиме нашите најблиски“ – изјави г. Дарио Николовски, директор на „Државен студентски дом“ Скопје.

Околу предизвиците на отварањето на студентските и училишните домови во вонредни околности, Министерката за образование и наука, г-ѓа Мила Царовска нагласи:

„Навистина ми е драго што во вакви вонредни околности, односно во време кога се соочуваме со пандемија успеавме да најдеме начин да ги отвориме студентските и училишните домови и да обезбедиме сместување на студентите и учениците, коишто ќе ги следат предавањата и праксата со физичко присуство. Огромна благодарност до компанијата ‘Алкалоид’ којашто покажа вистинска општествена одговорност и донираше средства за дезинфекција и за одржување на хигиената во домовите. Во оваа прилика би сакала да ги повикам студентите и персоналот во домовите да ги почитуваат протоколите за заштита, бидејќи само така можеме да го спречиме ширењето на Ковид-19. Да се заштитиме самите себеси, но и нашите најблиски. Со почитувањето на мерките сите заедно допринесуваме за зачувување на јавното здравје“

1 октомври наместо 1 септември. Далечинско учење наместо конвенционална настава. Учебна година во која сите чинители во образовниот процес имаат една заедничка цел: спроведување на процесот на едукација и зачувување на здравјето на учениците и студентите преку почитување на предвидените здравствени мерки и протоколи.

„Оваа необична учебна година по многу нешта ќе се разликува од сите досегашни почетоци, но едукацијата е клучен фактор за развој на здраво општество и неминовно е дека ќе мора да се направи адаптација кон новото нормално, имајќи го предвид најважното: здравјето на студентите. Во таа насока, ние како компанија дадовме мал придонес кон адаптација на новите прилики во студентските и училишните домови донирајќи антисептици и средства за дезинфекција. На сите ученици и студенти, во оваа прилика би сакал да им посакам успешен почеток и добро здравје. Вие сте нашата иднина и треба да поставувате исклучителни примери кои треба да се следат. Почитувајте ги мерките за заштита и чувајте се!“ – истакна генералниот директор и претседател на УО на „Алкалоид АД Скопје“.

Донацијата која „Алкалоид АД Скопје“ ја намени за студентските и училишните домови во Скопје се состои од 16.000 литри антисепички средства („MEDICAL®“ гел и „ЕCOSAL Forte® “ полиалкохолен раствор) и 17.100 литри готов раствор за чистење и дезинфекција „DEZINTAL® 0,2%“ во вкупен износ од близу 5 милиони денари.

Фудбал

Пеп Гвардиола по разводот се сели од вилата, што ја купил за 10 милиони евра (ФОТО)

Пеп Гвардиола наводно ќе се исели од семејниот дом во Барселона вреден 10 милиони евра, пренесуваат шпанските медиуми.

Неодамна се појави веста дека шпанскиот фудбалски тренер и неговата сопруга Кристина Сера се разведуваат по повеќе од 30 години брак.

Тренерот на Манчестер Сити секогаш остануваше во семејната куќа кога се враќаше во Барселона. Луксузниот имот во најелитниот кварт на Барселона некогаш бил во сопственост на Рафаел Маркез, а Гвардиола го купил за 10 милиони евра пред четири години. Вилата има четири ката и голем базен, а зафаќа парцела од повеќе од 22.000 квадратни метри. Самата куќа има 8.000 квадратни метри.

Според шпанските медиуми, се очекува Пеп по разводот да се исели од вилата и да продолжи да живее во луксузниот имот во Салфорд, Англија.

За потсетување, тренерот на Манчестер Сити и неговата сопруга раскинаа во декември минатата година. Веста ја соопштија водителките на подкастот на Мамараци - Лаура Фа и Лорена Васкез. Тврдат дека за разводот бил информиран само најтесниот круг на луѓе, а бил избегнат секаков контакт со медиумите. Тие додаваат дека засега не е познато дали Пеп и Кристина го започнале официјалниот процес на развод.

Двојката беше заедно повеќе од 30 години. Тие се запознале во 1994 година, а се венчале во 2014 година во Матадепера во близина на Барселона. Заедно имаат три деца, Марија, Мариус и Валентина. „Ел Периодико“ пишува дека врската меѓу Пеп и Кристина, и покрај разводот, е „целосно срдечна, стабилна и пријателска“.

Двојката живее одвоено во последните пет години. Таа живееше во Барселона, а тој остана во Манчестер поради работата. Семејството на Кристина зад себе има успешна модна компанија, а странските медиуми пишуваат дека таа се вратила во Барселона токму поради работата. Кристина е и писателка, по потекло од Бразил.

Регион

Прв смртен случај од грип во Црна Гора

Поради вирусот на грип кој моментално беснее низ регионот, Институтот за јавно здравје во Црна Гора го пријави првиот смртен случај поврзан со оваа инфекција.

Станува збор за лице од Бијело Поље, на возраст од 72 години, кое не било вакцинирано против сезонски грип.

„Евидентиран е пораст на заболени граѓани. Во извештајниот период, втората календарска недела од 2025 година, во лабораторијата на Центарот за медицинска микробиологија на ИЈЗЦГ со помош на молекуларна дијагностика се анализирани 48 примероци за присуство на вирусот на грип, од кои 22 беа позитивни“, соопштуваат од ИЈЗ, пренесува Рина.

Од почетокот на надзорот на сезонскиот грип, поточно на 30 септември, а завршува на 12 јануари, анализирани се вкупно 386 примероци за присуство на вирусот на грип со помош на PCR дијагностика.

Инфекцијата е потврдена кај 43 лица. „Кај 40 лица е потврдена инфекција со вирус на грип од типот А, додека три лица се заразени со вирус на грип од типот Б“, се вели во соопштението.

Свет

Германија ѝ испорача на Украина моќно оружје

Германскиот министер за одбрана Борис Писториус ѝ го предаде на Украина првиот од новите самоодни хаубици на тркала RCH 155.

„Украина,ова е сигнал, може да смета на нас. Германија е подготвена да преземе одговорност во Европа“, рече министерот во Касел, каде што производителот на тенкови KNDS го произведува овој борбен систем.

Украинскиот амбасадор Олексеј Макеев симболично ја прими првата од вкупно 54 самоодни хаубици што Германија ќе ѝ ги испорача на Украина. Првите шест системи првично ќе останат во Германија за да се користат за обука на украински војници.

„Не ни требаат посредници, ни требаат сојузници“, рече амбасадорот во врска со можните преговори за завршување на војната. „Мора да се бориме за мир. Добро е да се знае дека Германија е на страната на Украина“, додаде тој.

Како што пишува Киев Индепендент, станува збор за хаубици со топови од 155 мм, поставени на оклопно возило со четири оски („8х8“).

KNDS, заедничко вложување меѓу германската KMW и француската Nexter, вели дека RCH 155 може да истрела до девет проектили во минута. Самоодната хаубица RCH-155 е комбинација од оклопниот транспортер GTK Boxer и автоматската артилериска купола PzH 2000, пишува Kyiv Independent.

Испукува гранати од 155 мм на растојание до 54 километри. Благодарение на основата на тркала, слична на тешко оклопно возило, може брзо да се движи по и надвор од патот со брзина поголема од 100 километри на час.

Украина е првата земја што го доби новиот RCH 155.