„Веќе трета година по ред како се реконструираат овие 5 километри од автопатот „Пријателство“. Но, на делницата Петровец – Катланово ниту работници, ниту механизација нема повеќе од половина година.“
На овој дел од автопатот во екот на одморите зголемена е фрекфенцијата на возилата. Камерата на Канал 5 токму на ова место затекна голем број возила – домашни и странски. Сообраќајот во двата правци се одвива по една коловозна лента и наизменично минување од едната во другата насока.
Проектот го извршува јавното претпријатие за државни патишта, но обновата е во застој откако се раскина договорот со градежната фирма.
Од ЈП Патишта до емитување на прилогот не ни одговорија на нашите прашања кога ќе се избере нова фирма за да продолжи реконструкцијата. Проектот е финансиран од ЕБОР со сума од над 7 милиони евра, но резултати на терен се уште нема.
Дека реконструкциите на патиштата во земјава бавно се реализираат и чинат многу, констатирал Државниот завод за ревизија анализирајќи 11 клучни инфраструктурни проекти.
Најголем дел од нив се реализираат токму преку ова претпријатие. Но, ревизорите утврдиле дека доволно пари за нивна реализација ЈП Државни патишта - нема. Приходите кои ги остварува на годишно ниво се помали од вредноста на вкупните инвестиции, што доведува до неизвесност во нивната реализација.
Констатирале дека земјава потрошила 58 милиони евра само за камати, провизии и казни за неповлечени средства, а патиштата и пругите никаде ги нема.
Очекувано, најкатастрофални податоци има за автопатот Кичево – Охрид кој се гради веќе осум години. За него има два заема досега, еден од 505 милиони долари и уште еден од 180 милиони долари. Досега, повлечени се 383 милиони долари, што на државата и донеле разни трошоци од речиси 30 милиони долари.