За време на заедничката прес-конференција во Киев со германскиот канцелар Олаф Шолц, францускиот претседател Емануел Макрон, италијанскиот премиер Марио Драги и романскиот претседател Клаус Јоханис, Зеленски им рече на своите колеги дека рускиот напад врз Украина е еднаков на напад врз цела Европа.

„Русија сака да покаже дека обединета Европа не е во состојба да биде ефикасна и дека европските вредности не функционираат за заштита на слободата. Можеме и треба да го скршиме ова сценарио и да им докажеме дека Европа ќе продолжи да биде слободна, демократска и обединета. " рече украинскиот претседател.

Зеленски рече дека најдобриот начин да се демонстрира „нашата заедничка и силна позиција“ е да се поддржи украинската интеграција во Европската унија, додавајќи дека статусот на Украина како кандидат за членство во ЕУ „може историски да ја засили слободата во Европа и да стане една од клучните европски одлуки на првата третина од 21 век“.

Зеленски рече дека Украина е подготвена да работи за да стане полноправна членка на ЕУ.

„Ние разбираме дека патот кон Европската унија е навистина пат и не е еден чекор. Но, овој пат мора да започне и ние сме подготвени да работиме за нашата држава да се трансформира во полноправна членка на Европската унија, Украинците веќе го заслужија правото да тргнат по овој пат“, рече тој.

Украинскиот претседател ги повика лидерите на ЕУ да ѝ дадат на неговата земја брзо членство во блокот преку скратена процедура за да се спротивстави на руската агресија.

Зеленски рече дека вкупниот број руски ракети употребени против цивилното население во Украина „веќе достигна 3.000 овој месец“, додавајќи дека колку побрзо Украина добие помоќно оружје од Запад, толку побрзо ќе може да ги прекине руските напади.

„Секоја серија на такви залихи е еднаква на спасени Украинци. И секој ден на одложување на одлуките е шанса за руската војска да убие Украинци или шанса да ги уништи нашите градови. Има директна врска: Колку помоќно оружје добиваме, побрзо можеме да го ослободиме нашиот народ и да ја ослободиме нашата земја“, рече Зеленски.