Забава

Завршен содржинскиот дел од спортско-адреналинскиот парк во Карпош

Содржинскиот дел од Спортско – адреналинскиот парк во Карпош е завршен и деновиве се очекува да се изврши технички прием и пуштање во употреба, информираат од Општина Карпош.

Градоначалникот на Општина Карпош, Стефан Богоев, при денешната посета, информира дека во паркот се засадени 70 висококвалитетни дрвја, украсни растенија, а поставен е и систем за наводнување.

– Целосно се промени ликот на овој потег. Кај спортско – качувачката карпа, денеска имаме и адреналински дел, игралишта за фудбал и одбојка на песок, детско игралиште, сквер, обновен скејт парк и нова урбана опрема (клупи за седење, корпи за отпадоци, локери за велосипеди и лед осветлување). Нашиот фокус е и целосно раззеленување на делот до бунарите на реката Лепенец, до мостот „Газела", со што целосно ќе се заокружи овој потег, рече Богоев.

Во увид во состојбата на паркот, како што информираат од општина Карпош, денеска беше и вицепремиерката за економски прашања, Мила Царовска заедно со раководителот на Секторот за соработка при Мисијата на ЕУ во Скопје, Никола Бертолини.

Царовска, како што стои во соопштението, посочила дека Владата и понатаму ќе продолжи да ги поддржува локалните самоуправи, зошто со ваков тип на проекти се создаваат уште подобри услови за живот и рекреација на граѓаните на Скопје.

За овој проект, Општина Карпош доби грант од ЕУ, кој се спроведува преку Единицата за спроведување на Проектот за локална и регионална конкурентност и Светска Банка.

Бертолини напомена дека ЕУ не се занимава само со аспекти од законодавството и процедурите, туку тие работат и на реално подобрување на квалитетот на животот на луѓето.

– Спортот е најдобар начин за поврзување меѓу луѓето, а тука имаме можност и за доза адреналин. Повикувам на одговорно користење на овој парк, истакна претставникот од Мисијата на ЕУ во Скопје.

Од општина Карпош, исто така, информираат дека се одржани и потребните обуки на лицата кои ќе бидат задолжени за адреналинскиот дел, така што претставници од Македонската спортска – качувачка федерација поминале тридневна обука, под мониоторинг на сертифицирана фирма според EN 15567 стандардот.

Свет

Во Германија почна судењето на мајка на три деца- убила жена од љубомора и избегала во Турција

Во Германија во тек е судењето на Салија К.(50), која е обвинета за убиство на Јасмина Т. со соучесник во 2011 година, бидејќи стапила во романтична врска со тогашниот партнер на Салија, Ибрахим.

По бруталното убиство Салија со двете деца побегна во Турција и дури годинава е предадена на германските власти.

Повеќе од 13 години по убиството на Јамина, Салија, која е мајка на три деца, се најде на суд во Дортмунд.

Таа е обвинета дека го планирала и извршила страшното убиство на младата Јамина со соучесник, кој претходно бил осуден на доживотен затвор, само затоа што тогаш имала односи со партнерот на Салија.

Голото тело на Јасмина било пронајдено на паркинг во Холандија, а две години подоцна за нејзиното убиство на доживотен затвор е осудено нејзиното поранешно момче Адем И.

Утврдено е дека во 2011 година Адем и Салија смислиле план да ѝ се „одмаздат на Јасмина за неверството“. Имено, Јасмина започнала врска со партнерот на Салија, Ибрахим К., кој тогаш имал 35 години. Најпрво за 1.000 евра ангажирале насилници, кои со дрвени стапови во дворот брутално го претепале Ибрахим и му ги скршиле коските.

После тоа имало план да ја киднапираат Јасмина и да ја силуваат, за да ѝ „докажат дека е к**ва“.

„Планирале да ја силуваат за да ја обесчестат и да ја означат како к**ва. Според обвинителството, обвинетиот ја нападнал жртвата, ја врзал и ја одвлекол во продавница. Мажите кои требало да ја силуваат чекале таму. Кога одбиле тоа го направиле пред камери, Адем и Салија ја однеле жртвата во нејзиниот стан“, рече обвинителката денеска на судењето.

Потоа, како што изјавил, решиле да ја убијат Јасмина бидејќи нивниот првичен план за одмазда пропаднал.

Во нејзиниот стан, додека била врзана со сајли, ја претепале, а потоа ја задавиле“, рече обвинителот.

За време на судењето Салија цело време молчела. Треба да сведочи и претходно осудениот Адем И.

Свет

Заврши најсмртоносната мисија на ОН- за 10 години загинале 300 „сини шлемови“

Обединетите нации денеска ја завршија 10-годишната мировна мисија во Мали, по барање на владата на земјата, која рече дека силите на светската организација се несоодветни да одговорат на растечкиот насилен екстремизам во оваа западноафриканска земја.

„Товарот во Мали беше огромен и тежок“, рече командантот на силите на ОН од 13.000, Мамаду Гаје, на церемонијата на завршување во главниот град Бамако, пренесува АП.

Тој изрази уверување до безбедносните сили на Мали дека ќе ја решат кризата во земјата.

За 10 години загинале повеќе од 300 членови на мировната мисија на ОН во Мали, што ја прави најсмртоносна мировна мисија во светот, наведува американската агенција.

Малиските власти се борат да го задржат бунтот на исламистичките екстремисти од 2012 година.

Тие беа турнати во градовите на северот на земјата, благодарение на операцијата предводена од Франција, чии војници ја напуштија земјата минатата година.

Меѓутоа, бунтовниците се прегрупираа и почнаа да ја напаѓаат војската на Мали и нејзините сојузници, вклучително и силите на Обединетите нации.

Во јуни, владејачката воена хунта побара од мисијата на ОН да ја напушти земјата.

Живот

Град им нудел милиони на луѓе за да се доселат, но имало бизарен услов- никој не се јавил

Градот Каинан во јапонската префектура Вакајама смислил необичен план за привлекување жители, а понудата вклучувала и финансиска помош за новодојдените.

Стратегијата била дизајнирана за 2021 година, но за кандидатите имало услов - тие да го носат презимето Сузуки.

Како „родно место“ на Сузуки, било одлучено да се игра на таа карта, а посебно се мислело на 750.000 граѓани кои го носат тоа презиме и живеат во Токио и соседните префектури (Чиба, Саитама и Канагава).

Најавено е дека секое семејство што ќе се пресели ќе добие по 1 милион јени (6.300 евра), како и исто толку за секое дете под 18 години, пренесува The Guardian.

Меѓутоа, две години по започнувањето на кампањата, објавени се поразителни резултати.

„Потврдувам дека никој со презиме Сузуки не се преселил во Кајнан. Едно лице се распраша, но не отиде подалеку од тоа“, откри Томонари Фуџита, шеф на канцеларијата за развој.

Покрај паричната стимулација, на луѓето очигледно не им делувал и слоганот дека со преселбата „ќе се поврзат повторно со своите предци“.

Забележано е дека кланот Сузуки се преселил во денешен Кајнан за време на периодот Хејан (794-1185).

„Гледаме сериозен пад на бројот на жители. Мислевме дека со кампањата ќе привлечеме луѓе со презимето Сузуки, но се чини дека имало и други пречки“, изјави Фуџита.

Официјалните лица се надеваат дека новиот хотел, чија изградба ќе биде завршена во 2024 година, ќе ги инспирира граѓаните со презимето Сузуки да дојдат и да се поврзат со местото на нивното потекло.