По година и половина, бројни испитани сведоци, илјадници прочешлани документи и вештачења, ОЈО ГОКК го запре предметот тежок 167 милиони евра за перење на пари и злоупотреба на јавна набавка за мазут за ТЕЦ Неготино во кои имаше 13 осомничени, меѓу кои и сопственикот на компанијата РКМ – Ратко Капушевски, екс-директорот на ЕСМ, Васко Ковачевски и сопственикот на „Пуцко Петрол“ – Асмир Јахоски – од истрагата не произлегле докази дека ги сториле кривичните дела. Предметната обвинителка Коларевиќ на брифингот со новинарите посочи дека според доказите, колку што бил баран мазут за време на енергетската криза, толку бил испорачуван, дури и по поевтина цена, а истиот не се продавал на црниот пазар.

„Луѓето кои сега ја водат АД ЕСМ и се и во секторот производство потврдија дека од ваквата тогаѓна постапка имало корист, на штета, во спротивно, државата ќе се соочела со рестрикции. Целосно ја следеле динамиката на испорака, според документацијата во ниту еден момент не се чекал пораст на цената пред да се испорача мазутот во ТЕЦ Неготино.“

Јахоски, како што велат од обвинителството, кој преку „Пуцко Петрол“ немал лиценца за набавка на мазут, па како физичко лице дава гаранција во пари на Хеленик Груп за набавката на мазутот, а РКМ поседува лиценца и се единствените кои се пријавиле на тендерот кои потврдиле дека можат да ја испорачаат побараната количина.

„Банкарската гаранција за да фирмата може да конкурира на тендерот ја дава бизнисменот Асмир Јахоски, бидејќи тој има договор со РКМ од 1,2 милиони евра и во рамки на тој договор оди во Грција и набавува мазут за потребите на РКМ, односно гарантира со негови пари дека мазутот ќе биде испорачан.“

Од обвинителството додаваат, бидејќи била кризна состојба, договорите кои ги склучувале РКМ и ЕСМ не подлежат на закон за јавни набавки, туку биле исклучок. Воедно велат, ЕСМ ако смета дека е оштетена може да поднесе жалба до вишото ЈО, по што оттаму ќе одлучат дали истрагата ќе продолжи или ќе запре.

Со реакција за запирањето на предметот се огласија од ВМРО-ДПМНЕ според кои истрагата е запрена по налог на шефот на обвинителството Абази, од кого побараа оставка го обвинија дека одработувал за интересите на претседателот на СДСМ Филипче, екс-премиерто Заев и лидерот на ДУИ – Ахмети.

Абази на брифингот со новинарите како одговор на ова порача дека во ниту еден случај во неговиот мандат не наложил, вршел притисок или интервенирал обвинител да донесе некаква одлука и дека во целост ја почитува нивната независност во работата, па оттаму вели, нема ниту зошто да поднесе оставка.

Во меѓувреме, предметот за еколошкиот дел на случајот продолжува.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.