Заев за весникот, по цели осум месеци ја разоткрива црната дупка во бегството на Груевски, од неговиот стан до албанската граница.

-Сега знаеме како. Со лифт се симнал во подрумот, а потоа се сокрил во багажникот на автомобилот со кој бил изнесен од земјата. Во Албанија го чекало унгарско дипломатско возило“, - вели Заев за ФАЦ.

До сега во јавноста имаше разни теории за бегството на екс премиерот од земјава, но ова е првпат носител на висока политичка функција да открие детали за бегството на Груевски од органите на прогонот, и да каже дека тој бил пречекан од унгарски дипломати на границата со Албанија. За наводите во интервјуто на премиерот Заев, од обвинителството за Канал 5 велат дека во јавноста излегуваат со став само врз основа на докази. На прашањето од весникот пак, зошто поранешниот премиер не бил спречен од надлежните органи да побегне, Заев вели дека ги следеле законите.

-Го набљудувавме, но согласно нашите закони, ние можеме да го правиме тоа само кога тој се движи во јавност, не и во неговите приватни простории. Во земјата вообичаено е криминалците кои се повикани во петок за отслужување на затворска казна, викендот да го поминат дома. Не можевме тоа да го смениме само за Груевски,вели Заев за ФАЦ

Груевски минатата недела беше уловен од унгарските медиуми како се сретнува во стан со претставникот на тамошното МНР, Иштван Јо. Бегството на Груевски беше главна тема и на вчерашната расправа во унгарскиот парламент, каде опозицијата ја обвини власта дека му помогнала да избега од правдата. На ова реплицираше унгарскиот министер за надворешни работи Петер Сијарто, кој кажа дека со Груевски комуницираат за како што кажа, да добијат најавтентични информации за Западен Балкан.