Македонија денеска го празнува 2 август – Илинден. Ден со кој во 1903 година – со Илинденското востание и Крушевската република, а потоа и на вториот Илинден, во 1944 година со АСНОМ –беа поставени столбовите на Републиката и на државноста. Премиерот Зоран Заев ја предводеше делегацијата во Пелинце каде положи цвеќе, а го придружуваа вицепремиерите Груби и Николовски, како и министрите Оливер Спасовски и Радмила Шеќеринска. Цвеќе положија и делегации од пратениците од Собранието, кабинетот на шефот на државата и претставници на партиите.
Македонија денеска го одбележува еден од најголемите државни празници 2 август – Денот на Републиката. Пораките овде од Меморијалниот центар ги упати премиерот Зоран Заев.
Нема мерка која може да ја измери големата идеја за сопствена држава, рече премиерот осврнувајќи се на значењето на двата Илиндена. Порача и дека третиот Илинден е македонската борба и победа на демократските вредности.
„После сите историски битки, после сите негирања и присвојувања, со сите разноразни поствоени договори и прекројувања на државните граници на Европа, со сите директиви на Коминтерната и на сите останати заговорнички теории, на 2 август во 1944 година Демократска Федерална Македонија се дефинираше на мапата на европските држави како конституента на Федеративна Народна Република Југославија, подоцна Социјалистичка Федеративна Република Југославија. И уште еден илинденски принцип чуваме и негуваме и постојано повикуваме да ни биде пример: Обединување и единство околу најважните прашања за нашата земја. Да престанеме да се биеме в гради за тоа кој е поголем патриот заради партиските интереси и заради повеќе гласови на изборите.
Премиерот во својот говор се осврна и на актуелните случувања и предизвици со кои се соочува земјава – придобивките од членството во НАТО и аспирациите за членство во ЕУ. Зборувајќи за закочените евроинтеграции изрази убедување дека пречките ќе бидат отстранети.
„Секогаш бевме и остануваме на сончевата страна за мирољубиво решавање на сите недоразбирања и конфликти. Наместо извор на проблеми, ние станавме извор на идеи и иницијативи за решенија кои регионот, го водат напред. Ние денес со гордост сме една од водечките земји кои наспроти блокадите и ризиците од нови ѕидови, ги слушаат потребите на своите народи и рушат граници. Јас сум уверен дека Република Бугарија е пријател и дека е многу блиску денот кога и македонскиот и бугарскиот народ ќе се уверат дека Бугарија нема да биде пречка за Северна Македонија. Заедно ќе го обезбедиме тоа, бидејќи од двете страни има паметни и способни луѓе, визионери, кои ќе си дадат шанса и ќе се разберат, во интерес на своите народи.
На чествувањето на Илинден во Пелинце настапија и фолклорни ансамбли и хорот на Националната опера и балет. Прославата, која беше спроведена под силно полициско обезбедување и протоколи, ја следеа и граѓани кои како што велат традиционално секој Илинден доаѓаат на излет во дворот на Меморијалниот центар.
Меморијалниот центар во Пелинце, посветен на Првото заседание на АСНОМ, отворен е во 2004та и од тогаш таму се чествува Илинден. Во музејот се наоѓа копија на собата во манастирот „Прохор Пчински”, и спомен - собата во која се изложени документите од создавањето на македонската држава.