Заев: Прашањето за Гоце Делчев треба да го решава Мешовитата комисија

„Прашањето за Гоце Делчев е за решавање во рамки на Комисијата, а не е на политиката. 

,,Сакаме ова прашање да го реши Комисијата, како што најде добри решенија за Свети Кирил и Методиј, Свети Наум, Климент Охридски и цар Самоил, да го реши и ова во духот на таа заедничка историја, заради заедничко славење. Верувам дека ќе го најдат решението и за Гоце Делчев, наше е да охрабриме", посочи претседателот на Владата Зоран Заев во вечерашното интервју во рамки на емисијата „Само вистина" и нагласи дека договорот меѓу Македонија и Бугарија треба да обединува, да прави мостови на пријателство и ниедна страна да не се обидува да присвојува нешто.

Тој истакна дека е многу важен пријателскиот договор склучен со Бугарија и нагласи дека од неговиот бугарски колега, премиерот Бојко Борисов нема никаква закана ниту коментар кон Македонија.

„Важно е дека во Договорот Бугарија зема обврска да не подржува во нашите европски и евроатлантски интеграции. И Бугарија, тоа го прави, не само фигуративно", рече премиерот Заев нагласувајќи дека поддршката од бугарска страна за Македонија, Албанија и Западниот Балкан е очигледна, враќајќи го фокусот на Европа на овој регион.

Тој посочи дека во телефонскиот разговор со Борисов станало збор за деталите за претстојниот самит на Берлинскиот процес во Софија, за совладувањето на здравствено-економската криза предизвикана од КОВИД-19 и унапредување на економската соработка.

„Мудрите и паметни политики на неизбрзување, ја направија Македонија да биде успешна во исполнување на своите стратешки цели од коишто пак зависи и животот дома, економски и перспективен за сите граѓани", оцени премиерот Заев во врска со прашањето дека Владата не реагираше на Меморандумот кој се појави во јавноста, дека Бугарија поставува услови за Македонија од кои зависи преговарачкиот процес на земјата.

Премиерот Заев повтори дека е потребна внимателност и да се даде шанса за постигнување на решенија. Тој посочи, дека изминатите 30 години, не научија дека така не се решаваат проблемите, туку само се таложат.

„Затоа и времето покажа, со Преспанскиот договор со Грција и Договорот со Бугарија дека политичарите кои носат храбри одлуки за својата земја, не значи дека губат избори, граѓаните знаат и да ги наградат", оцени Заев кој подвлече дека земјата во изминатиот период и во неговиот прв мандат како премиер, нашата земја оствари членство во НАТО, одлука за почеток на преговорите со Европската Унија.

„Ете, порано беше незамисливо, но јас неодамна имав шанса, еве во Атина, да зборувам за економски напредок, соработка перспектива, што е најдобро за сите граѓани", рече премиерот во ,,Само интервју" за Канал 5 телевизија.

Доктор не се туширал 5 години, сега кажува зошто (ВИДЕО)

Џејмс Хамблин го изненади светот кога објави дека не се туширал пет години.

Докторот и предавач на Јејл за неговата книга Clean: The New Science of Skin решил да спроведе експеримент врз себе.

Имено, Хамблин во книгата решил да се фокусира на нашиот најголем орган – кожата. Преку експериментирање и истражување дошол до неколку важни лекции. Прво, тој вели дека опсесијата со сапун може да предизвика алергии.

„Целото патување преку истражување и учење во мојата книга за микробиомот на кожата и историјата на верувањата за хигиената и чистотата навистина ме натера да ги променам моите навики“, вели тој.

Според него, микробите се присутни во околината и тоа нема да се промени ако човек се истушира. Наместо тоа, тој верува дека микробите се неопходни за одржување на здрава рамнотежа, на пример во дигестивниот систем.

„Знаете дека обидот да се искоренат микробите во цревата не е најдоброто нешто што можете да го направите“, истакнува тој.

Иако не користи шампон или гел за туширање, Хамблин ги мие рацете со сапун. Покрај тоа, одржува одредени навики, а водата е сепак важен дел од нив.

"Сè уште понекогаш ја влажнам косата. Кремите, пилинзите и дезодорансите ги нема во мојата бања. Но, сепак ги мијам забите. Го правам само она што сметам дека е задоволително или навистина медицински неопходно", заклучил тој.


Кремљ ја менува временската зона на окупираните подрачја во Украина,се воведува московско време

Кремљ денеска објави дека ќе започне со наметнување на московската временска зона во делови на Украина кои се незаконски анектирани и делумно под контрола на руските сили.

Руското Министерство за индустрија и трговија ја објави веста на својот профил на Телеграм, велејќи дека четирите региони на Украина припоени од Русија - Доњецк, Луганск, Херсон и Запорожје - „ќе се префрлат на московско време“.

Четири украински региони беа незаконски анектирани од рускиот претседател Владимир Путин во есента 2022 година, откако одржаа „лажни“ референдуми. Русија не контролира целосно ниту еден регион, а западните влади го оценија потегот за нелегитимен.

„Во тек е постепена синхронизација на руското законодавство откако во земјата беа примени четири нови субјекти“, соопшти руското Министерство. „Во блиска иднина ДНР [самопрогласена Народна Република Доњецк], ЛНР [самопрогласена Луганска Народна Република], Запорожје и Херсонските области ќе бидат дел од друга временска зона, во која ќе важи московско време.“

Временската зона во Москва е еден час понапред од источноевропското стандардно време, кое е на сила низ цела Украина.

Министерството додаде дека тие поднеле нацрт-закон за ова прашање до руската Државна дума и дека допрва треба да биде потпишан.

Русија веќе го направи тоа на Крим кога режимот на Путин го анектираше полуостровот во 2014 година. Во март 2014 година, временската зона на Крим беше официјално усогласена со онаа на Москва, а целиот полуостров е еден час пред Украина.

Овој потег доаѓа неколку недели откако портпаролот на Кремљ, Дмитриј Песков, рече дека процесот на интеграција на територијата е во „полн замав“. „Обезбедувањето безбедност на цивилите кои живеат таму е главната цел на [специјалната воена] операција“, рече Песков.

Невладина организација: Иран годинава егзекутира над 50 луѓе

Иранските власти годинава веќе егзекутираа 55 лица, објави денеска невладината организација за човекови права, додавајќи дека зголеменото прибегнување кон смртна казна има за цел да се шири „терор“ во земјата потресена од протести.

Невладината организација Иран за човекови права (IHR) со седиште во Норвешка соопшти дека потврдила најмалку 55 егзекуции во првите 26 дена од оваа година.

Четири лица биле егзекутирани поради обвиненија поврзани со протестите, додека мнозинството од обесените (37) се егзекутирани за злосторства поврзани со дрога, рече истиот извор. Од невладината не соопштуваат зошто биле егзекутирани останатите 14 лица.

Најмалку 107 лица остануваат во ризик од егзекуција поради протестите, осудени на смрт или обвинети за злосторства што предвидуваат смртна казна, додаде ИЧП. Секоја егзекуција во Иран е „политичка“, бидејќи главната цел е „да се шири страв и терор во општеството“, нагласува ИЧП.

„За да се запре државната машина за убивање, не треба да се толерира никакво погубување, независно дали е политичко или не“, додаде директорот на ИЧП Махмуд Амири-Могадам.

Активистите го обвинуваат Иран дека ја користи смртната казна како инструмент за заплашување за да ги смири протестите кои започнаа на 16 септември, по смртта во притвор на Махса Амини, 22-годишна Курдка, уапсена три дена претходно за кршење на правилата за облекување на жените.

Според претставникот на ОН за човекови права Волкер Турк, „инструментализацијата на кривичната постапка“ во Иран за казнување на демонстрантите „е еднакво на убиство одобрено од државата“. ИЧП и другите невладини организации за човекови права допрва треба да објават статистички податоци за егзекуциите во Иран за 2022 година.

Но, ИЧП на почетокот на декември објави дека биле обесени повеќе од 500 луѓе, што е рекордна бројка во последните пет години.

притисни ентер