Му се судеше на Илија Петрушевски, вработен во затворот Идризово обвинет за насилство сторено во Собранието, за време на крвавиот четврток во 2017.
Обвинетиот Петрушевски рече дека не чувствува вина за кривичното дело за кое се товари и тврди дека воопшто не го удрил и не го допрел Заев кобната вечер туку бил само присутен.
Заев рече дека воопшто не се сеќава дали човекот бил во прес салата критичната вечер, а обвинетиот тврдеше дека воопшто не го удрил премиерот и му се извини, па двајцата се ракуваа.
Тој не побара отштета и како премиер му порача на судот да ги земе сите околности во предвид и да донесе правична одлука за она што се случило.
– Очекував во секоја секунда да го изгубам животот. Чувствував страв, животот ми беше загрозен. Имав чувство кое никогаш дотогаш не сум го имал, дека ќе ми заврши животот. Очекувам социјалниот аспект и судот да го има во предвид, јас не побарав никаква штета ниту надомест на штета од страна на обвинетите лица во овој случај. Секако одмереноста на крајот останува на судот. За мене е многу значајно судот да дели правда имајќи ги сите овие аспекти предвид и верувам дека и граѓаните тоа го очекуваат. Нема да го вратиме ние времето. Секако ако би можеле да го вратиме тогаш најголемата добивка ќе биде да не се повтори делото односно да не го направи некој тоа. Но, имајќи предвид дека нема да го вратиме времето, можеби ние ќе останеме со нашите лузни, но да внимаваме на тоа, на децата да не оставаме лузни, заради тоа што се работи на родители на деца, изјави Заев.