Иако цитрусните овошја се познати по високата содржина на овој важен витамин, многу други намирници содржат уште поголеми количини, а исто така имаат и помала содржина на јаглехидрати, пишува The Mirror.

Здравата исхрана е исклучително важна за целокупната состојба на телото, а витамините играат клучна улога во одржувањето на здравјето. Меѓу 13-те есенцијални витамини што му се потребни на нашето тело, витаминот Ц зазема посебно место. И додека еден просечен портокал содржи околу 53 мг витамин Ц, некои други намирници повеќекратно ја надминуваат оваа количина.

Зошто ни е потребен витамин Ц?

Витаминот Ц игра важна улога во многу процеси во телото. Тој е моќен антиоксиданс кој ги штити клетките од оштетувања предизвикани од слободните радикали. Исто така, помага во зајакнување на имунитетот, одржување здрава кожа, коски, 'рскавица и крвни садови и го забрзува заздравувањето на раните.

Покрај тоа, витаминот Ц ја подобрува апсорпцијата на железото од храната, што е важно за превенција на анемија. Ако го нема доволно, може да доведе до авитаминоза позната како скорбут, болест што предизвикува слабост, замор, крварење на непцата и побавно заздравување на раните.

Храна што содржи повеќе витамин Ц од портокалите

Голем број овошја и зеленчуци содржат значително поголеми количини на витамин Ц од портокалите. Еве листа на некои од најбогатите природни извори:

Црвени пиперки – Шолја сечкана црвена пиперка содржи околу 190 мг витамин Ц, речиси три пати повеќе од портокал со средна големина.

Киви - Една порција киви обезбедува околу 137 мг витамин Ц, речиси двојно повеќе од портокалот.

Црни рибизли - Содржи околу 200 мг витамин Ц на 100 грама црни рибизли, што ги прави еден од најбогатите извори.

Млада зелка - Содржи околу 180 мг витамин Ц на 100 грама.

Јагоди – Шолја јагоди содржи околу 85 мг витамин Ц.

Кељ - Една порција кељ обезбедува околу 80 мг витамин Ц.

Брокула - Содржи 79 мг витамин Ц на 100 грама брокула.

Прокељ - Една порција содржи околу 75 мг витамин Ц.

Колку витамин Ц ни е потребен?

Иако витаминот Ц е важен, претерувањето со него не се препорачува. Дневна количина од над 1000 мг може да предизвика проблеми со желудникот како што се надуеност, дијареја и болки во стомакот. Доколку се случи ова, симптомите обично исчезнуваат по намалување на количината.

Препорачаната дневна количина на витамин Ц е 90 мг за мажи над 19 години и 75 мг за жени во истата возрасна група. Бидејќи телото не може да го складира витаминот Ц, важно е редовно да го внесувате преку исхраната.

Додатоците во исхраната можат да помогнат во случаи кога исхраната не е доволно разновидна, но секогаш се препорачува да се консултирате со лекар пред да земете какви било додатоци. Тие никогаш не треба да бидат замена за балансирана, здрава исхрана.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.