Вухан сега е најголемиот карантин во историјата, заедно со блиските милионски градови Хуанганг и Ежоу , како и другите помали градови. Вкупно 20 милиони луѓе се под карантин најавен од кинеските власти во средата за да се спречи застрашувачкото брзо ширење на вирусот.
Празните улици на Вухан се уште пострашна глетка заради новогодишните украси – утре се слави Кинеската нова година, проследена традиционално со двонеделна прослава со Пролетниот фестивал и Фестивалот на светилките. Во оваа прилика, стотици милиони Кинези обично патуваат кај своите семејства или одат на одмор, како во Кина , така и во странство.
На снимките кои доаѓаат од градот може да се видат војници со маски кои ги блокираат влезовите на железничката станица во градот.
Жителите брзо ги испразнија полиците на продавниците за да се подготват за евентуален недостиг на храна и присилно престојување во домовите.
Пусти се и улиците на Пекинг , каде претходните години имаше река од луѓе , кои се подготвуваа за дочекот на лунарната Нова година.
Бројот на загинати, во меѓувреме, се искачи на 26, а бројот на заразени на 830, барем според официјалните бројки. Пред неколку дена, научниците од „Империал колеџ“ во Лондон тврдеа дека со вирусот можеби се заразени 1.700 луѓе, кога официјалниот број беше помал од 300.