Балкан

Вучиќ од Брисел: Ги предупредив за теророт на Курти

Разговорите ќе продолжат, но што ќе биде понатаму малку зависи од нас и Борел, вели Вучиќ.

Српскиот претседател Александар Вучиќ изјави денеска, по средбата со европските посредници Жосеп Борел и Мирослав Лајчак во врска со деескалација на ситуацијата на Косово, дека разговорите ќе продолжат на дневна основа бидејќи веруваме дека мирот и стабилноста се од клучна важност, но и дека ги предупредил европските посредници дека Србите се во тешка положба поради теророт на косовскиот премиер Албин Курти, јави дописникот на МИА од Белград.

Запрашан дали европските посредници инсистирале на трилатерална средба на која тој ќе биде на маса заедно со Курти, Вучиќ рече дека секогаш доаѓал на секој разговор и дека смета дека дијалогот е корисен и лековит и дека е важно да се разговара за секој проблем за да тој се надмине.

-Но, во овој момент, не гледам причина да разговарам со човекот кој произведува провокации секој ден бидејќи тоа е неговата фанатична идеологија и мислам дека (трилатералните разговори) ќе донесат штета, и затоа мислам дека тоа е бесмислено, рече Вучиќ.

„Денеска преставив посебен извештај за повредите на лицата кои беа уапсени, а тие не беа виновни за ништо... Им го предадов на Борел и Лајчак, во каква состојба се, кој ги претепа, до тој степен што хирургот Албанец не сакаше да потпише, велејќи дека тоа можеле да го направат само ѕверови.

Кога станува збор за разбирањето на ЕУ, Вучиќ порача дека мора да разбереме едно - дека Косово е независна држава за мнозинството земји од ЕУ.

-Тоа е нивно дете. Го чувале кога бил во лулка, сега тинејџерот е малку палав, но сепак го чуваат. Нашата позиција е многу тешка, сè што се однесува на Украина не важи за Србија, но тоа е право на посилниот на кое треба да се навикнеме, рече претседателот на Србија.

На прашањето дали е постигнат некаков договор, тој рече дека не може да каже дека е направен чекор за деескалација, тие (европските посредници) направија се што е во нивна моќ да разговараат за тоа и добро да разберат што се случува на терен.

-Она што ќе се случи понатаму зависи малку од Борел и нас, а повеќе од оние кои не беа заинтересирани за мир и стабилност. Во секој случај, мислам дека секогаш е добро кога ќе слушнете некого и ќе можете да разјасните нешто. Не гледам ништо штета од состаноците, ако се случи нешто добро, одлично – ако не, што да правиме. Наше е да направиме се што е во наша моќ, да се потрудиме, да сфатиме колку е тоа важно..., рече тој. /МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Гранит Џака е осуден поради лажен сертификат за ковид вакцина

На капитенот на швајцарската фудбалска репрезентација, Гранит Џака, му е изречена условна парична казна од 150.000 швајцарски франци поради набавка на лажен ковид-сертификат.

Одлуката е донесена од Јавното обвинителство во Луцерн, а Џака јавно потврди дека ја прифаќа казната и ја презема одговорноста за своите постапки.

Казната е одредена во висина од 50 дневни износи по 3.000 швајцарски франци, со условен период од две години.

Тоа значи дека фудбалерот нема да мора да ја плати сумата од 150.000 франци, под услов да не стори друго кривично дело во наредните 24 месеци. Тој веќе ги подмирил судските трошоци.

По завршувањето на постапката, швајцарскиот репрезентативец се огласи на социјалните мрежи за да ги потврди деталите од одлуката на обвинителот.

„Пред неколку недели лично се огласив овде и изјавив дека ја преземам одговорноста за мојата одлука. Стојам зад тоа. Откако дадов целосен исказ пред јавното обвинителство, обвинителот сега донесе одлука“, изјави Џака.

Потоа ја објасни казната што му беше изречена. „Со казнен налог, бев осуден за прибавување лажна потврда и добив условна парична казна во висина од 50 дневни износи по 3.000 швајцарски франци, со двегодишен пробен период. Тоа значи дека казната нема да се изврши освен ако не сторам ново кривично дело во тој период. Веќе ги платив процедуралните трошоци. Ја прифаќам одлуката и ја преземам одговорноста“, рече фудбалерот.

Тој исто така им се заблагодари на сите што го поддржуваа во изминатите неколку недели. „Ви благодарам за бројните пораки за поддршка во последните неколку недели. Тие многу ми значат“, додаде тој.

Скандалот излезе на виделина во средината на септември, кога швајцарскиот весник „Блик“ (Blick) објави дека е покрената истрага против Џака. Неколку дена подоцна, фудбалерот призна дека во 2022 година прибавил лажна ковид-потврда.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

СДСМ: Уште еден Спутник, Српска лига на далечинско, конгрес без членови

Саша Богдановиќ држи прв изборен конгрес на здружение Српска лига. Најавено уште во март. Сега, кога арамијата бара алиби за избори, сателитот добива датум.

Во Орбан–Вучиќ медиумите го продаваат како поранешен функционер на СДСМ. Градоначалник на Центар, 2017 година. Намерно се прескокнува ЗНАМ, прва верзија. Екипата што ја делеше партијата, заедно со Максо. Прво партијата. Потоа гласачите. Сега нова фирма.

Помлада верзија на Стоилковиќ. И полоша.

Неспособен оперативец, со години на услуга на српската БИА. Кога на јавноста ѝ е јасно дека министерот работи српско-руско-кинеска агенда, треба нова верзија да ги собере гласовите што Стоилковиќ ги губи.

Иста матрица како Српската лига во Србија: еден човек, членовите не се гледаат.

Лигата таму излезе од проруски ориентирани фашисти, претходно Трета Србија, име што алудира на Трет рајх.

Богдановиќ нема капацитет да ја прочита службата. Извршува.

Почетокот на годината, фалејќи го Вучиќ, СДСМ ги нарекува Усташи. Иста кампања како во Србија, каде студентите се Усташи. Иста како талогот на арамијата, по терк на Ванчо.

На мрежите се кити со Вучиќ и со однос кон Русија. Уште еден српско-руски Спутник, покрај Левица, анти-НАТО и анти-ЕУ, и покрај Платформата, ЗНАМ 2.0, за 1,6 милиони.

Уште една проруска, антизападна партија во Македонија.

Арамијата, стар руски прокси, не знае да склопи партија што барем на старт гледа кон Европа. Далечинскиот му е правен во Кремљ. Друг јазик не познава.

Полетувањето е неуспешно пред да заврши конгресот. Овој Спутник, оваа нова Лајка на Вучиќ, нема да се врати.

Сателит не е опозиција. Тоа е алиби за банда што останала без рејтинг и без пари.

Скопје, 09.10.2026

СДСМ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Автомобилизам

Во гаража го направиле најширокиот автомобил на светот- полицијата не можела да му напише казна (ВИДЕО)

Група американски ентузијасти создадоа автомобил кој ретко се гледа на патот.

Тие создадоа возило кое е широко три метри од стар Форд, кое може да достигне брзина поголема од 110 километри на час, објави Аутонет.

Кога решија да го преполови стариот Форд Фестива и да го прошират на неверојатни три метри, членовите на американскиот Јутјуб канал Prop Department имаа необична идеја. Сепак, тие не застанаа само на изградба на автомобил кој изгледа сосема поинаку од сè што среќаваме во сообраќајот. Тие исто така успеаја да добијат документација што им овозможува да го возат по јавни патишта.

Резултатот е автомобил кој е речиси широк колку што е долг, а неговиот изглед на улиците привлекува огромно внимание.

Тие користеа уште три автомобили за конверзијата.

Основата на овој необичен проект беше Форд Фестива, мал градски автомобил познат на европскиот пазар како Киа Прајд.

За да ја реализираат својата идеја, авторите набавија уште три автомобили што ги користеа за делови. Секој од нив чинеше само неколку стотици долари.

Прво, го отстранија ентериерот на возилото, а потоа ја исечоа каросеријата по должина. Дополнителни челични елементи беа инсталирани во просторот помеѓу двете половини, така што структурата ја задржа потребната цврстина.

Прилагодувањето на погонскиот систем беше особено тешко. Погонското вратило мораше да се продолжи за повеќе од еден метар за да може моторот да ја пренесува моќноста на тркалата.

Промените не го заобиколија ниту ентериерот. Контролната табла и предниот дел од автомобилот беа прилагодени на новата ширина со помош на делови изработени на 3D печатач.

Исто така, беа инсталирани дополнителен генератор за напојување, како и систем за климатизација.

Има два волани и дури 14 држачи за чаши.

Еден од најнеобичните детали се наоѓа во кабината на овој Форд.

Автомобилот има два волани поставени пред предните седишта, додека на централната конзола има дури 14 држачи за чаши.

И покрај огромната ширина и бројните модификации, возилото е способно да достигне брзина поголема од 110 километри на час.

Неговите креатори открија и дека толку широк автомобил може да има практични примени. Благодарение на големиот простор, тој е погоден за транспорт на гломазни предмети, големи купувања, па дури и дрва.

Полицијата ги запре, но тие можеа да продолжат да возат

Најголемиот предизвик не беше само да се направи автомобил широк три метри, туку да се обезбеди дека на такво возило му е дозволено да учествува во сообраќајот.

Имено, ширината на Фордот ги надминува вообичаените дозволени димензии на патничките автомобили. Затоа, неговите креатори мораа да добијат посебни дозволи за вонреден транспорт, како и соодветно осигурување.

За време на првото сериозно тестирање, кое траеше два дена, тие поминаа повеќе од 640 километри.

Полицијата ги запре неколку пати, проверувајќи ги регистарските таблички, документацијата и начинот на кој толку широко возило се движи по сообраќајната лента.

Сепак, откако утврди дека возачите ги имаат потребните документи, полицијата им дозволи да го продолжат своето патување секој пат.

Така, автомобилот создаден од стар Форд, и покрај неговите необични димензии, успеа да влезе на јавни патишта во согласност со посебните дозволи.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.