Неповолната вест која треба да ја официјализира и португалското претседателство на прес-конференција, ја објави бугарското МНР доцна попладнево. Цитирајќи го заменикот министер за надворешни работи, Румен Александров во Луксембург, Софија порачува дека не отстапува од декларацијата на бугарскиот парламент и оти останува отворена за дијалог со претстојното словенечко претседателство.
-Ова вклучува Македонија експлицитно да се откаже од територијалните, малцински и историски претензии кон Бугарија, промена на натписи/ споменици кои влеваат омраза кон Бугарија во Македонија, активирање на процес на рехабилитација на жртвите од југословенскиот комунизам. Бугарија инсистира на тоа дека спроведувањето на Договорот за добрососедство треба да е вклучено меѓу условите во идната рамка за преговори на Скопје. , се вели во соопштението.
Во изјава за бугарската БТВ Александров изјави дека земјите членки ги разбрале барањата на Софија.
-Беше покажано разбирање кон чувствителноста на бугарската страна, кон аргументите кои ги искажавме и загриженоста која ја имаме. Во таа смисла, беше споделена неопходноста Македонија да направи напори за да стигнеме до взаемно прифатливо решение., изјави Румен Александров, заменик министер за надворешни работи на Бугарија
Денешниот совет за општи работи, според медиумските извештаи, мина во знакот на предупредувањата на поголем дел од министрите дека со бугарското вето се урива кредибилитетот на Унијата, а германскиот министер Рот повтори дека билтералните прашања не треба да го попречуваат процесот на проширување.
-Комитетот на федералната Влада смета дека Албанија и Македонија ги исполнија условите и конечно можат да започнат со преговори и мора да биде јасно дека ЕУ како целина, поддржана од 27 земји членки сега испраќа сигнал за имплементација на ветувањата кои државите ги дадоа, изјави Михаел Рот, германски државен секретар за Европа
На маса, неофицијално, била ставена и опцијата за раздвојување на Македонија и Албанија од преговарачкиот пакет и Тирана да добие зелено светло, но таквото сценарио било далеку од консензус.