Технологија

Волонтери „уловија“ сигнал од сондата Војаџер 1, НАСА со три пати посилни телескопи не успеа

Волонтерите кои работеле со стар радио телескоп во селото Двингло, во холандската провинција Дрент, успеале да фатат сигнал од вселенската сонда Војаџер 1, лансирана во 1977 година.

Сондата со мисија да ги истражува надворешните планети на Сончевиот систем сега е оддалечена речиси 25 милијарди километри од Земјата, што е повеќе од четири пати повеќе од растојанието од Плутон, пишува NL Times.

Иако сигналот е слаб поради големата оддалеченост, тој бил успешно откриен, соопшти организацијата која управува со телескопот.

– Радиосигналите на сондата се движат со брзина на светлината, а моментално се потребни 23 часа за да стигнат до Земјата – соопштија од организацијата.

Телескопот Dwingle, изграден во 1956 година, морало да биде повторно надграден за да ги прими сигналите на Војаџер 1.

НАСА користи антени од Deep Space Network, кои се дизајнирани за поголем опсег на фреквенција и се со дијаметар од 70 метри, додека телескопот Dwingle е со дијаметар од 25 метри.

Сондата Војаџер 2 беше лансирана на 20 август 1977 година, а Војаџер 1 малку подоцна - на 5 септември 1977 година. Целта на мисијата беше да се истражи далечниот дел од Сончевиот систем, а тие собраа податоци за Јупитер, Сатурн, Уран и Нептун, а потоа го продолжија своето патување до меѓуѕвездениот простор. Војаџер 1 го напушти Сончевиот систем на 25 август 2012 година, а Војаџер 2 го направи истото на 5 ноември 2019 година.

И двете вселенски летала ја носат таканаречената „златна плоча“ низ вселената. На неа има снимки од Земјата, од звуци на животни и музика од различни епохи до пораки до вонземјаните на 59 јазици.

Свет

Лидерите на ЕУ ја испратија првата порака до Трамп по инаугурацијата

Лидерите на ЕУ му посакаа успех на Доналд Трамп во неговиот втор мандат како претседател на САД, јави ДПА.

Претседателката на Европската комисија Урсула фон дер Лајен и претседателот на Европскиот совет Антонио Коста попладнево на платформата Х ги објавија своите најдобри желби до новиот американски претседател.

„ЕУ со нетрпение очекува да работи тесно со вас за да се справи со глобалните предизвици“, напишаа двајцата, пренесе ДПА.

Во објавата на Х го има повикот до новата администрација за тесна соработка со ЕУ.

„Заедно, нашите општества можат да постигнат поголем просперитет и да ја зајакнат нивната заедничка безбедност. Ова е трајната сила на трансатлантското партнерство“, напишаа Кошта и Фон дер Лајен во заедничката објава на Х./МИА

Свет

Безос, Закерберг, Пичаи, но и Ходорковски, учествуваа на инаугурацијата на Трамп

Директорите на главните технолошки компании во САД учествуваа на инаугурацијата на избраниот претседател Доналд Трамп, откако донираа милиони долари за потребите на оваа церемонија, но имаше покането и видни личности од други земји како Русија.

Со ова, американските технолошки милијардери ја покажуваат својата наклонетост кон староновиот претседател на САД, а во обид да купат услуги нивните компании да не станат предмет на истраги или да не бидат премногу регулирани.

На инаугурацијата денеска присуствуваа основачот на Амазон, Џеф Безос, директорот на Meта, Марк Закерберг, првиот човек на „Епл“, Тим Кук, и шефот на Гугл, Сундар Пичаи.

Медиумскиот магнат Руперт Мердок, претседателот на ФИФА, Џани Инфантино, и поранешниот британски премиер Борис Џонсон исто така учествуваа на церемониите, вклучително и на миса во блиската црква „Св Јован“.

Многу од овие извршни директори го критикуваа Трамп за време на неговиот прв мандат, поради ставовите на староновиот претседател за климатските промени и имиграцијата.

Во ротондата на Капитолот денеска се појави и шефот на „СпејсИкс“ и Teсла, Илон Маск, кој е номиниран да води нов оддел за владина ефикасност во новата администрација. Маск потроши речиси 300 милиони долари помагајќи ја претседателската кампања и остана близок соработник на Трамп.

На инаугурацијата учествуваа и шефот на TikTok, Шу Зи Чу, додека неговата компанија се соочува со последиците од забраната во САД, како и Сем Алтман од „ОупенЕјАј“ но и Дара Косровшахи од Убер.

Михаил Ходорковски, поранешен руски олигарх, сега опозиционер и жесток критичар на Владимир Путин, во соопштение на Телеграм денеска откри дека добил покана за инаугурацијата на Трамп и решил да присуствува.

-Ме поканија на инаугурацијата, решив да отидам. Од љубопитност и треба повторно да се запознаам... Во Вашингтон има многу полициски патроли и улиците се затворени. Притоа, за церемонјиата се собраа стотици илјади луѓе. Сите ги пуштаат и нема некои големи проверки, напиша тој.

На настанот се појави и рускиот економист и опозиционер Андреј Иларионов, кој во 2000-те беше советник на Путин. На инаугурацијата на Трамп не беа поканети официјални руски лица. /МИА

Свет

Честитки од Лондон, Анкара, Стокхолм и Хелсинки за Трамп

Лидерите на Велика Британија, Турција, Шведска и Финска му ја честитаа денешната инаугурација на новиот претседател на САД, Доналд Трамп.

Во честитката, британскиот премиер Кир Стармер рече дека „со векови“ односите меѓу двата народа биле „пример за соработка и трајно пријателство“.

- Заедно го одбранивме светот од тиранијата и работевме на нашата заедничка безбедност и просперитет. Со долгогодишната наклонетост на претседателот Трамп и историските врски со Обединетото Кралство, знам дека длабокото пријателство ќе продолжи, рече Стармер.

Турскиот претседател Реџеп Таип Ердоган во својата честитка изрази надеж дека „вториот мандат на Трамп носи добро за целото човештво“.

- Бидејќи Трамп повеќе пати рече дека ќе стави крај на руско-украинската војна, ние како Турција ќе направиме се што е потребно во тој поглед. Треба да го решиме ова прашање што е можно поскоро, рече Ердоган.

Тој додаде дека ова прашање ќе биде на агендата на Турција во разговорите со новиот американски претседател.

Шведскиот премиер Улф Кристерсон му упати на Трамп „топли честитки на полагањето заклетва како 47-ми претседател на САД“.

- Шведска со нетрпение очекува да ја продолжи блиската соработка со САД, напиша тој во објава на X.

Финскиот претседател Александар Стуб во порака на Х рече дека му испраќа „искрени честитки“ на Доналд Трамп за неговата инаугурација како претседател на САД и оти „САД се клучен стратешки партнер и сојузник“ на Финска./МИА

притисни ентер