Иако законодавно-правната комисија едногласно одлучи дека автентично толкување на членот 11 од Законот за помилување нема да има со објаснување дека членот не постои, СДСМ и ВМРО ДПМНЕ низ различна призма ги гледаат последиците од нивната одлука.
Според претседателката на собраниската комисија Мираковска, собранието даде мислење по кое Уставниот суд не треба да се меша.
Одлуката на Уставниот суд за член 11а од законот, не носи последици на помилувањата, велат од министерството за правда.
-Пред Уставниот суд е член 11а, а автентичното толкување е за членот 11. Ако Уставниот суд го укине или поништи 11а, тоа нема да има влијание на помилувањата, бидејќи вчера Собранието потврди дека тие се невалидни, односно дадени на непостоечки член, и се ништовни од моментот на давање, наведуваат од Министерството за правда во врска со одлуката на Уставниот суд и Извештајот на Законодавно-правната комисија.
Според премиерот Заев аболицијата од поранешниот претседател Иванов била незаконска. Од ВМРО ДПМНЕ велат дека во владејачката партија има правна конфузија и тврдат дека во 2016та година четворица уставни судии кои се блиски до СДСМ со издвоено мислење потврдиле дека во законот постои одредбата која му дава право на претседателот на државата да даде помилување. Им препорачаа на судиите да побараат помош од Венецијанската комисија.
Уставниот суд сега ја чека формално одлуката од Собрание за членот 11, за да може да расправа за членот 11а од иситот закон. Според информациите оттаму, ќе им биде потребно повеќе време за консултации, бидејќи сите судии имале различно толкување.