Најавено е дека рестораните и гостилниците, помали сместувачки капацитети за туристи и автошколите ќе бидат отворени во понеделник, а со некои ограничувања, училишните часови за некои одделенија од основните и средните училишта и градинките ќе продолжат со работа.

Со одлука на владата, сите продавници, вклучително и трговските центри, ќе имаат дозвола да работат повторно од понеделник. Баровите и гостилниците ќе можат да ги служат гостите во затворени простории, се отвораат туристички сместувачки капацитети со капацитет до 30 гости, но планинарските и хостели сепак остануваат затворени, објави портпаролот Јелко Кацин по владината седница во Брдо кај Крањ.

Големите трговски центри што досега биле затворени, ќе треба да ги применат сите епидемиолошки и други мерки за да спречат ширење на вирусот при реактивирањето, предупреди словенечката влада, а истото важи и за баровите и гостилниците на кои им било дозволено да работат само на отворени тераси.

„Денес, ние во принцип ја прифативме одлуката за повторно отворање на градинките и првите три одделенија од основното училиште, потоа отворањето на средните стручни училишта и домовите“, рече Кацин пред словенечките медиуми по владината седница.

Тој потврди дека размислуваат повторно да дозволат некои спортски активности за колективни спортови, но тоа сè уште не е решено. Исто така, сè уште не е решено кога ќе можат да се отворат фитнес центрите.

Владата исто така ја укина дотогаш важечка одредба со која се бара од сопствениците на станови да ги чистат и дезинфицираат скалилата и лифтовите и другите простори, што извесно време предизвикало полемики затоа што некои сметале дека мерката не е неопходна.

Новиот бран на олеснителни мерки во Словенија доаѓа по скоро две недели, откако сите криви на графиконите на ширењето на вирусот се намалуваат или се стабилни, па се проценува дека епидемијата е под контрола.

Сепак, се предупредува дека вирусот сè уште е присутен кај популацијата и дека во случај на непочитување на мерките што сè уште се во сила, епидемиолошката слика може брзо да се влоши.