Вака ќе го паметат Андреј Горѓиевски неговите школски пријатели од ОУ Лазо Трповски, кои на нивното некогаш омилено збирно место во Трговскиот центар Лептокарија, во негова чест отворија книга на жалост.. Стотици граѓани се потпишаа во книгата. Оние кои не беа во можност, пораките за последно збогум ги испраќаа на социјалните мрежи, кои потоа беа впишувани во книгата...

„Прво не ми се верува дека за Андреј мора во оваа форма да кажам нешто. Андреј ни беше другар во основно учевме заедно. Ќе го памтиме по големата ведрина, по насмевките, по неговата искра немирна која што ја имаше уште од мал, таа нескротлива желба да се смее да се забавува и да помага што многу ми е драго што низ годините не ја изгуби и тоа е реткост. И што да кажам освен да почива во мир и верувам дека на поубаво место е сега. “

Утрово Андреј Горѓиевски беше погребан на градските гробишта во Бутел, каде го испратија бројни роднини, пријатели, колеги.. 43 годишниот музичар трагично го загуби во пожарот во дискотеката во Кочани, каде според сведоштвата иако првично се спасил, се вратил за да спаси што повеќе животи..

Повеќе колеги музичари од утрово се збогуваат со Андреј и преку социјалните мрежи потсетувајќи на неговата хуманост.. Калиопи во своето интервју за хрватски ИН Магазин потсети и на моментот кога ДНК ја продаде наградата „Златна бубамара“ за 20.000 евра, а парите ги донираа за лекување на младо момче..

Си замина дел од моето второ семејство- напиша Ана Костадиновска –придружен вокал во бендот ДНК и една од преживеаните.. Кобниот 16-ти март животот го загубија уште неколку членови од групата..

Професорката Сара Пројковска која исто така беше придружен вокал на бендот беше погребана на гробиштата во Лисиче...

Погребот на Музичарот Ѓорги Ѓоргиев се одржа на градските гробишта во Струмица, а претходно во основното музичко училиште во Струмица беше одржана и комеморација во негова чест.

Во Штип беа погребани клавијатирустот Филип Стевановски, гитаристот Александар Коларов, како и фотографот Александар Ефремов..

На градските гробишта во Бутел беше погребан и бит-боксерот Мартин Атанасовски познат како Буцо Битбокс..

Тонецот Игор Велков беше погребан на гробиштата во Нерези..

Дел од колегите од музичката естрада на социјалните мрежи му посакаа и побрзо закрепнување на Владимир Блажев - Панчо кој во моментов според информациите е се уште хоспитализиран, но надвор од животна опасност..

Во пожарот животот трагично го загуби и 25 годишниот фудбалер Андреј Лазаров..Од неговиот тим Шкупи соопштија дека тагата е преголема а неговите соиграчи иако се обиделе не можеле да продолжат со тренизите..Преходно Лазаров играл и за Кавадаречкиот клуб Тиквеш, кој во негова чест го повлече дресот со број 16 кој тој го носел..

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.