Иако телото е пронајдено уште во средата, веста ја објави само денес словенечкото Министерство за надворешни работи, јавуваат словенечките медиуми, додавајќи дека шпанските власти ја известиле словенечката амбасада во Мадрид за пронаоѓање на трупот.
Според словенечките портали, младиот човек бил застрелан со автоматска пушка, а неговото тело било пронајдено на карпа покрај морето, кај плажата Пенон дел Кура, недалеку од ноќен клуб.
За да го повлечат телото на младиот човек, пожарникарите морале да користат јажиња бидејќи теренот бил многу недостапен. Иако резултатите од обдукцијата сè уште не се познати, се соопштува дека младиот човек бил застрелан во градите и абдоменот.
Полицијата веднаш ја оградила сцената на крвавото злосторство и ја почнала потрагата, а форензиката барала и докази во морето.
Порталот „Марибор24“ пренесува дека биле испукани најмалку седум истрели кон младиот човек, а известија и дека тој имал полициско досие.
Шпанскиот Ел Паис пишува дека ова најново, брутално убиство е само продолжување на крвавата серија убиства во регионот Коста дел Сол, популарен кај туристите. Иако досега нема потврда дека смртта на младиот Словенец е поврзана со организиран криминал, локалните медиуми во Шпанија потсетуваат дека ова е типичен начин за ликвидација на мафијата, додавајќи дека оваа година во Малага беше најлоша со насилни смртни случаи.